ଭାରତୀୟ ଜନତା ପାର୍ଟି (ଭାଜପା) ଉଭୟ କେନ୍ଦ୍ର ଓ ଦିଲ୍ଲୀରେ କ୍ଷମତାରେ ଥିବାରୁ ଅମଲାତାନ୍ତ୍ରିକ ପ୍ରକ୍ରିୟା ସରଳରେ ଏବଂ ପ୍ରଭାବୀ ଭାବେ କାର୍ଯ୍ୟ କରିବ ବୋଲି ମନେକରାଯାଉଥ୍ତ୍ଲା। କିନ୍ତୁ ଏବେ ଏଭଳି ହେଉନାହିଁ। ନିକଟରେ ଦିଲ୍ଲୀ ବିଧାନସଭା ବାଚସ୍ପତି ବିଜେନ୍ଦ୍ର ଗୁପ୍ତା ମୁଖ୍ୟ ଶାସନ ସଚିବ ଦେବେନ୍ଦ୍ରଙ୍କୁ ଏକ ଚିଠି ଲେଖି ଦର୍ଶାଇଛନ୍ତି, ସରକାରୀ କର୍ମଚାରୀମାନେ ଜାଣିଶୁଣି ଏମ୍ଏଲ୍ଏଙ୍କ ଚିଠି କିମ୍ବା ଅନ୍ୟ ଯୋଗାଯୋଗ ମାଧ୍ୟମକୁ ଅଣଦେଖା କରୁଛନ୍ତି। କଲ୍ର ଉତ୍ତର ଦେଉନାହାନ୍ତି, ଚିଠିକୁ ଗ୍ରହଣ କରୁନାହାନ୍ତି କିମ୍ବା ମେସେଜଗୁଡ଼ିକୁ ପଢୁନାହାନ୍ତି। ଗତ ଦଶନ୍ଧିରୁ ଏଯାବତ ଦିଲ୍ଲୀ ପ୍ରଶାସନ ଦିଲ୍ଲୀ ସରକାର ନା ଲ୍ୟୁଟ୍ନାଣ୍ଟ ଗଭର୍ନର (ଏଲ୍ଜି)ଙ୍କ ନିର୍ଦ୍ଦେଶ ମାନିବ ତାହାକୁ ନେଇ ପ୍ରଶ୍ନ ଉଠିବା ସହ ଏଭଳି ସ୍ଥିତି ଲଗାତର ରହିଆସିଛି। ଏହା ଯୋଗୁ ବହୁ ସମୟରେ ପ୍ରଶାସନିକ କାର୍ଯ୍ୟ, ଆଇନଗତ ଲଢ଼େଇରେ ବିଳମ୍ବ ଘଟୁଛି, ଏପରିକି ନୀତି ଅଟକିଯାଉଛି। ମେ ୨୦୨୩ରେ କେନ୍ଦ୍ର ସରକାର ଗଭର୍ନମେଣ୍ଟ ଅଫ୍ ନ୍ୟାଶନାଲ କ୍ୟାପିଟାଲ ଟେରିଟୋରି ଅଫ୍ ଦିଲ୍ଲୀ (ଜିଏନ୍ସିଟିଡି) ଆଇନ, ୧୯୯୧କୁ ସଂଶୋଧନକରି ଅମଲାତାନ୍ତ୍ରିକ ନିଯୁକ୍ତି ଓ ବଦଳି କ୍ଷେତ୍ରରେ ଏଲ୍ଜିଙ୍କ କ୍ଷମତା ବୃଦ୍ଧି କରିଥିଲା। ଦିଲ୍ଲୀ ପ୍ରଶାସନ ଉପରେ କେନ୍ଦ୍ର ତାହାର ନିୟନ୍ତ୍ରଣକୁ ଦୃଢ଼ କରୁଛି ବୋଲି ଏହି ପଦକ୍ଷେପରୁ ଜଣାପଡ଼ିଥିଲା। ଏବେ ମଧ୍ୟ ପରିବର୍ତ୍ତିତ ନୂଆ କ୍ଷମତା ଗତିଶୀଳତାରେ ଅମଲାତନ୍ତ୍ରକୁ କାମ କରିବାରେ ସମସ୍ୟା ହେଉଛି। ନିର୍ଦ୍ଦେଶ ପାଇଁ ଏଲ୍ଜିଙ୍କୁ ଚାହିଁ ରହିବାର ଅଭ୍ୟାସ ବଳବତ୍ତର ଥିବା ଭଳି ଜଣାପଡ଼ୁଛି। ଏହା ସହ ଏମ୍ଏଲ୍ଏଙ୍କ କଥା ଅଧିକ ଶୁଣିବା ଭଳି ନୂତନ ଦୃଷ୍ଟିକୋଣ ଆପଣାଇବା କଷ୍ଟକର ମନେହେଉଛି। କର୍ମଚାରୀମାନେ ଏମ୍ଏଲ୍ଏଙ୍କୁ ଅଣଦେଖା କରୁଥିବାବେଳେ ସେମାନେ ମଧ୍ୟ ଏମ୍ଏଲ୍ଏଙ୍କ ପ୍ରତିନିଧିମାନଙ୍କ କଥା ଆଦୌ ଶୁଣୁନାହାନ୍ତି। ଅମଲାତନ୍ତ୍ର ମଧ୍ୟରେ ଏକ ବିଶ୍ୱାସ ଓ ବିଚାରଗତ ପରିବର୍ତ୍ତନ ଦରକାର, ଯାହା ନିର୍ବାଚିତ ପ୍ରତିନିଧିଙ୍କ ଦାୟିତ୍ୱକୁ ଗ୍ରହଣ କରିବା ସହ ତାହାକୁ ସମ୍ମାନ ଦେବା ଆବଶ୍ୟକ।
ଡିଜିପି ନିଯୁକ୍ତି ଅପେକ୍ଷାରେ
କେରଳର ପରବର୍ତ୍ତୀ ପୋଲିସ ମହାନିର୍ଦ୍ଦେଶକ (ଡିଜିପି) ନିଯୁକ୍ତି ପାଇଁ ଦୌଡ଼ ତୀବ୍ର ହୋଇଥିବାରୁ ନିଷ୍ପତ୍ତିନେବା ଗୁରୁତ୍ୱପୂର୍ଣ୍ଣ ହୋଇପଡ଼ିଛି। ଶାକ୍ଷି ଦର୍ବେଶ ସାହେବ ଜୁନ୍ରେ ଅବସର ନେବାକୁ ଥିବାରୁ ଜଣେ ଯୋଗ୍ୟ ପ୍ରାର୍ଥୀ ପାଇବା ପାଇଁ ବରିଷ୍ଠ ଆଇପିଏସ୍ ଅଧିକାରୀଙ୍କର ଏକ ତାଲିକାକୁ ଅନୁଧ୍ୟାନ କରାଯାଉଛି। ତାଲିକାରେ ସବୁଠୁ ବରିଷ୍ଠ ଅଧିକାରୀ ଭାବେ ଅଛନ୍ତି ବିଏସ୍ଏଫ୍ ମୁଖ୍ୟ ଦାୟିତ୍ୱରୁ ଫେରିଥିବା ୧୯୯୦ ବ୍ୟାଚ୍ ଅଧିକାରୀ ନୀତିନ ଅଗ୍ରଓ୍ବାଲା । ତାଙ୍କ ପଛକୁ ଅଛନ୍ତି ୧୯୯୧ ବ୍ୟାଚ୍ର ତଥା ଏବେ ଇଣ୍ଟେଲିଜେନ୍ସ ବ୍ୟୁରୋରେ କାର୍ଯ୍ୟରତ ରାବଡା ଏ. ଚନ୍ଦ୍ରଶେଖର। ଯୁବପିଢ଼ିର ଅଧିକାରୀମାନେ ମଧ୍ୟ ପଛରେ ରହିନାହାନ୍ତି। କେରଳର ଭିଜିଲାନ୍ସ ଆଣ୍ଡ ଆଣ୍ଟି କରପ୍ସନ ବ୍ୟୁରୋ ମୁଖ୍ୟ ରହିଛନ୍ତି ଯୋଗେଶ ଗୁପ୍ତା (୧୯୯୩ ବ୍ୟାଚ୍) ଏବଂ ରାଜ୍ୟ ଆଇନଶୃଙ୍ଖଳା ମୁଖ୍ୟ ମନୋଜ ଆବ୍ରାହମ (୧୯୯୪ ବ୍ୟାଚ୍) ତାଙ୍କ ପ୍ରଯୁକ୍ତିଗତ ନୀତି ପାଇଁ ଜଣାଶୁଣା। ଏହା ସହ ଏସ୍. ସୁରେଶ ଏବଂ ଏମ୍.ଆର୍.ଅଜିତ କୁମାର (ଉଭୟ ୧୯୯୫ ବ୍ୟାଚ୍) ଦୌଡ଼ରେ ରହିଛନ୍ତି। କିନ୍ତୁ ଅଜିତ କୁମାରଙ୍କ ବିରୋଧରେ ଦୁର୍ନୀତି ଅଭିଯୋଗ ଥିବାରୁ ସେ ବାଦ୍ ପଡ଼ିପାରନ୍ତି। ଯୋଗ୍ୟତା ଗୁରୁତ୍ୱପୂର୍ଣ୍ଣ ହୋଇଥିଲେ ମଧ୍ୟ ବହୁ ସମୟରେ ରାଜନୈତିକ ବିଷୟଗୁଡ଼ିକ ତା’ଠାରୁ ଅଧିକ ଗୁରୁତ୍ୱ ବହନକରେ। ରାଜ୍ୟ ସରକାର ଦେଇଥିବା ଏକ ଶର୍ଟଲିଷ୍ଟରୁ ୟୁପିଏସ୍ସି ତିନୋଟି ନାମ ଚୟନ କରିବ। ଏହାପରେ ସରକାର ଚୂଡ଼ାନ୍ତ ନିଷ୍ପତ୍ତି ନେବେ। ତେବେ କେରଳର ଡିଜିପି ନିଯୁକ୍ତି ଇତିହାସକୁ ଦେଖିଲେ ଏହି ଚୟନ ପ୍ରକ୍ରିୟାରେ ଯଦି ରାଜନୈତିକ ହସ୍ତକ୍ଷେପ ଓ ଶାସକ ଦଳ ସହ ବ୍ୟକ୍ତିଗତ ସମ୍ପର୍କର ଭୂମିକା ରହେ ତେବେ ସେଥିରେ ଆଶ୍ଚର୍ଯ୍ୟ ହେବାର କିଛି ନାହିଁ। ଚୂଡ଼ାନ୍ତ ନିଷ୍ପତ୍ତି ଜୁନ୍ରେ ନିଆଯିବ ବୋଲି କଳ୍ପନାଜଳ୍ପନା ପ୍ରକାଶ ପାଉଛି ।
ସେଣ୍ଟ୍ରାଲ ଡେପୁଟେଶନ ଚାପ
ସମୟ ଥିଲା ଆଇଏଏସ୍ ଓ ଆଇପିଏସ୍ ଅଧିକାରୀଙ୍କ ପାଇଁ ସେଣ୍ଟ୍ରାଲ ଡେପୁଟେଶନ ବା କେନ୍ଦ୍ରୀୟ ପ୍ରତିନିଯୁକ୍ତି ଥିଲା ଏକ ସ୍ବପ୍ନର ନିଯୁକ୍ତି। ଏଥିରେ ଦିଲ୍ଲୀ କ୍ଷମତା ପରିସରରେ ପ୍ରଭାବଶାଳୀ ଚାକିରିରେ ରହିବା ଏବଂ ଜାତୀୟ ନୀତି ନିର୍ଦ୍ଧାରଣରେ ସୁଯୋଗ ମିଳୁଥିଲା। କିନ୍ତୁ ଏବେ ମହାରାଷ୍ଟ୍ର ଏବଂ ଉତ୍ତରପ୍ରଦେଶ ଭଳି ବଡ଼ ରାଜ୍ୟ ସେମାନଙ୍କର ସବୁଠୁ ଭଲ ଅଧିକାରୀଙ୍କୁ ରାଜ୍ୟରେ ରଖିଦେବା ଦେଖିବାକୁ ମିଳୁଛି। ଅନ୍ୟପଟେ ଓଡ଼ିଶା ଏବଂ ଏଜିଏମ୍ୟୁ କ୍ୟାଡର ସେମାନଙ୍କ ଅଧିକାରୀଙ୍କୁ କେନ୍ଦ୍ରକୁ ପଠାଇ ଖୁସି ହେଉଛନ୍ତି। ଦେଖିବାକୁ ଗଲେ ରାଜ୍ୟ ଭଲ ଅଧିକାରୀ ଆବଶ୍ୟକ କରେ। ହେଲେ ଭିତ୍ତିଭୂମି କାର୍ଯ୍ୟଠାରୁ ଆରମ୍ଭ କରି କଲ୍ୟାଣକର ଯୋଜନା ପର୍ଯ୍ୟନ୍ତ ଶାସନରେ ଆହ୍ବାନ ବଢୁଥିବାବେଳେ ଦିଲ୍ଲୀକୁ ଭଲ ବାବୁଙ୍କୁ ପଠାଇ ନିଜର କ୍ଷତି କରୁଥିବା ଭଳି ମନେ ହେଉଛି। ଦିନ ଥିଲା କେନ୍ଦ୍ରୀୟ ପ୍ରତିନିଯୁକ୍ତି ଖ୍ୟାତି ଓ ପ୍ରଭାବର ବିଷୟ ଥିଲା, କିନ୍ତୁ ଏବେ ରାଜ୍ୟଗୁଡ଼ିକ ସମାନ ପ୍ରକାର କ୍ଷମତାର ଦାୟିତ୍ୱ ପ୍ରଦାନ କରୁଛନ୍ତି, ସେବାନିବୃତ୍ତ ପରେ ବି ନିଯୁକ୍ତି ଦେଉଛନ୍ତି ଏବଂ ସେମାନେ ଶୀର୍ଷ ରାଜନେତାଙ୍କ ନିକଟରେ ପହଞ୍ଚିପାରୁଛନ୍ତି। ଏଣୁ ଅନେକେ ବିଶ୍ୱାସ କରୁଛନ୍ତି, ଦିଲ୍ଲୀର କ୍ଷମତା ଯୁଦ୍ଧ ମଧ୍ୟରେ କାମ କରିବା ବଦଳରେ ନିଜ ରାଜ୍ୟରେ ରହି କିଙ୍ଗ୍ମେକର ହେବା ଭଲ। ରାଜନୈତିକ ଦିଗକୁ ଦେଖିଲେ ଅନେକ ରାଜ୍ୟ ସେମାନଙ୍କ ଅଧିକାରୀଙ୍କୁ ନେଇ କେନ୍ଦ୍ର ଉପରେ ଭରସା ରଖନ୍ତି ନାହିଁ। ଥରେ ରାଜ୍ୟ ଛାଡ଼ିଲେ, ସେମାନେ ଦିଲ୍ଲୀର ବିଶ୍ୱସ୍ତ ହୋଇଯାଇପାରନ୍ତି ବୋଲି ରାଜ୍ୟଗୁଡ଼ିକର ଭୟ ରହିଛି। ରାଜ୍ୟଗୁଡ଼ିକ ଅଧିକ ଅଧିକାରୀଙ୍କୁ ପଠାଇବାକୁ ପରୋକ୍ଷରେ କେନ୍ଦ୍ର ଚାପ ପକାଉଥିବାରୁ,ସେମାନେ ମନା କରିଦେଉଛନ୍ତି।
ଦିଲ୍ଲୀକା ବାବୁ
ଦିଲୀପ ଚେରିଏନ୍
Email: dilipcherian@gmail.com