ସୁନା ଓ ରୁପା ଦରରେ କ୍ରମାଗତ ଭାବେ ହ୍ରାସ ପରିଲକ୍ଷିତ ହେଉଛି । ମଧ୍ୟପ୍ରାଚ୍ୟରେ ଯୁଦ୍ଧ ଭିତରେ ତୈଳ ଦର କ୍ରମାଗତ ଭାବେ ବୃଦ୍ଧି ପାଇବାରେ ଲାଗିଛି । ଏପଟେ ବିଶ୍ବରେ ସୁନା ଦର ଖସୁଛି । ନିବେଶକଙ୍କୁ ବି ଚିନ୍ତାରେ ପକାଇଛି ଦର । କିନ୍ତୁ ସାଧାରଣ ଲୋକଙ୍କୁ ବଡ଼ ଆଶ୍ବସ୍ତି ଦେଇଛି । ତେବେ ଭାରତରେ ସୁନା ଦରକୁ ନେଇ ବଡ଼ ଭବିଷ୍ୟବାଣୀ କରୁଛନ୍ତି ବିଶେଷଜ୍ଞ । ପ୍ରତିଦିନ ବିଶ୍ବ ବଜାର ଉପରେ ନଜର ରଖୁଥିବା ବିଶେଷଜ୍ଞ ଭାରତରେ ଦର କେଉଁ ସ୍ତରକୁ ଖସି ସେ ନେଇ ବଡ଼ ଆକଳନ କରିଛନ୍ତି ।
ବିଶେଷଜ୍ଞଙ୍କ କହିବା ମୁତାବକ ଭାରତରେ ସୁନା ଦର ଆହୁରି ଖସିବ । ଭାରତୀୟ ବଜାରରେ ସୁନା ଦର ୧୦ ଗ୍ରାମ ପ୍ରତି ୧ ଲକ୍ଷ ୨୭ ହଜାର ଟଙ୍କା ପର୍ଯ୍ୟନ୍ତ ଖସିବା ନେଇ ଆକଳନ କରାଯାଉଛି । ତେଣୁ ଏବେ ନକିଣି ଆଉ କିଛିଦିନ ଅପେକ୍ଷା କରିବାକୁ ପରାମର୍ଶ ଦେଉଛନ୍ତି ବିଶେଷଜ୍ଞ ।
ଗତ ୭ ଦିନ ମଧ୍ୟରେ ଭାରତରେ ୨୨ କ୍ୟାରେଟ୍ ସୁନା (22K Gold Price) ଦର ୧୦ ଗ୍ରାମ ପ୍ରତି ୧୨ ହଜାର ୫୫୦ ଟଙ୍କା ଶସ୍ତା ହୋଇଥିବା ବେଳେ ୨୪ କ୍ୟାରେଟ୍ ସୁନା (24K Gold) ଦର ୧୦ ଗ୍ରାମ ପ୍ରତି ୧୩ ହଜାର ୬୯୦ ଟଙ୍କା ଶସ୍ତା ହେଲାଣି । ଗତ ମାର୍ଚ୍ଚ ୧୫ ତାରିଖରେ ୨୨କ୍ୟାରେଟ୍ ସୁନ ୧ ଲକ୍ଷ ୪୬ ହଜାର ୩୫୦ ଟଙ୍କା ଥିଲା । ଯାହାକି ଆଜି ଅର୍ଥାତ ମାର୍ଚ୍ଚ ୨୧ ତାରିଖରେ ୧ ଲକ୍ଷ ୩୩ ହଜାର ୮୦୦ ଟଙ୍କାରେ ପହଞ୍ଚିଛି । ସେହିଭଳି ୨୪ କ୍ୟାରେଟ ଦଳ ମାର୍ଚ୍ଚ ୧୫ରେ ୧ ଲକ୍ଷ ୫୯ ହଜାର ୬୬୦ ଟଙ୍କା ରହିଥିବା ବେଳେ ଆଜି ୧ ଲକ୍ଷ ୪୫ ହଜାର ୯୭୦ ଟଙ୍କାରେ ପହଞ୍ଚିଛି ।
ବିଶେଷଜ୍ଞଙ୍କ କହିବା ମୁତାବକ ଭାରତରେ ସୁନା ଦଳ ୧ ଲକ୍ଷ ୨୭ ହଜାର ଟଙ୍କା ପର୍ଯ୍ୟନ୍ତ ପହଞ୍ଚିପାରେ । ଅର୍ଥାତ ଆସନ୍ତାକାଲି ବି ସୁନା ଦରରେ ହ୍ରାସ ପରିଲକ୍ଷିତ ହେବାର ସମ୍ଭାବନା ଅଧିକ ରହିଛି । ଭାରତୀୟ ବଜାରରେ ଆଜି ରୁପା ଦର ୧୦ ହଜାର ଟଙ୍କା ଶସ୍ତା ହୋଇ ୨ ଲକ୍ଷ ୫୦ ହଜାର ଟଙ୍କାରେ ପହଞ୍ଚିଯାଇଛି । ମାର୍ଚ୍ଚ ୧୫ ତାରିଖରେ ରୁପା ଦର ୨ ଲକ୍ଷ ୮୦ ହଜାର ଟଙ୍କା ଥିବାବେଳେ ମାର୍ଚ୍ଚ ୨୧ ତାରିଖରେ ଅର୍ଥାତ ଆଜି ତାହା ୩୦ ହଜାର ଟଙ୍କା ଶସ୍ତା ହୋଇଛି ।