ବୁଗୁଡ଼ା,୨୦।୩(କାଳିଚରଣ ଦାଶ): ମିଳୁନି ଜାଳେଣି ଗ୍ୟାସ, ଗ୍ୟାସ ଅଭାବରୁ ଅଧିକାଂଶ ହୋଟେଲ, ଫାଷ୍ଟଫୁଡ୍ ସେଣ୍ଟର ଓ ଚା’ ଦୋକାନ ବନ୍ଦ ହୋଇ ସାରିଥିବାବେଳେ ଏବେ ଘରମାନଙ୍କରେ ମଧ୍ୟ ଏହି ଆଶଙ୍କା ପରିଲକ୍ଷିତ ହେବାକୁ ବସିଲାଣି। ଗ୍ୟାସ ଅଭାବ ଜନିତ ସମସ୍ୟା ଯୋଗୁ ଅଙ୍ଗନାଓ୍ବାଡି କେନ୍ଦ୍ରଗୁଡିକରେ ରୋଷେଇ ବନ୍ଦ ହେବାକୁ ବସିଲାଣି । ବୁଗୁଡ଼ା ବ୍ଲକରେ ୨୩୧ ଅଙ୍ଗନାଓ୍ବାଡି କେନ୍ଦ୍ର ଥିବାବେଳେ ହଜାର ହଜାର ଶିଶୁ ଏହି କେନ୍ଦ୍ରଗୁଡିକରେ ନାମ ଲେଖାଇଛନ୍ତି। ସବୁ ଅଙ୍ଗନାଓ୍ବାଡି କେନ୍ଦ୍ରରେ କାଠ ପରିବର୍ତ୍ତେ ଗ୍ୟାସରେ ରୋଷେଇ କରିବା ପାଇଁ ସରକାରୀ ନିର୍ଦେଶ ରହିଛି ଏବଂ ପ୍ରତ୍ୟେକ ମାସରେ ଅଙ୍ଗନାଓ୍ବାଡି କର୍ମୀଙ୍କ ଖାତାକୁ ଗ୍ୟାସ ବାବଦକୁ ୯୦୦ ଟଙ୍କା ସରକାର ଦେଉଛନ୍ତି । ଅଙ୍ଗନବାଡି କେନ୍ଦ୍ରରେ ଗ୍ୟାସ ଯୋଗେ ରୋଷେଇ କରିବା ପାଇଁ ପ୍ରାୟ ଦୁଇ ତିନି ବର୍ଷ ତଳେ ଛତ୍ରପୁର ଗ୍ୟାସ ଡିଲର ପ୍ରତ୍ୟେକ ଅଙ୍ଗନବାଡି କେନ୍ଦ୍ରକୁ ଦୁଇଟି ଲେଖାଏ ଗ୍ୟାସ ଭର୍ତ୍ତି ହାଣ୍ଡି ସହ ଖାତା ମଧ୍ୟ ଦେଇଥିଲେ । ତେବେ ଗ୍ୟାସ ସରିବା ପରେ ଛତ୍ରପୁରସ୍ଥିତ ଡିଲର ୩ବର୍ଷ ହେଲା ଆଉ ଗ୍ୟାସ ଯୋଗାଇ ଦେଉନାହିଁ । ଛତ୍ରପୁର ଡିଲର ଖାତାରେ ବୁଗୁଡ଼ା ବ୍ଲକରେ ଥିବା ଡିଲର ଦ୍ୱାରା ଗ୍ୟାସ ବୁକ୍ ହେଉ ନ ଥିବାରୁ ଅଙ୍ଗନଓ୍ବାଡି କର୍ମୀମାନେ ନିଜ ନାମରେ ଥିବା ଗ୍ୟାସ ବୁକ୍ କରି ରୋଷେଇ କରୁଥିଲେ। ପୂର୍ବରୁ ପର୍ଯ୍ୟାପ୍ତ ପରିମାଣର ଗ୍ୟାସ ମିଳୁ ଥିବାରୁ କାମ ଚଳିଯାଉଥିଲା ଏବେ ଗ୍ୟାସର ଘୋର ଅଭାବ ଯୋଗୁ ରୋଷେଇ ବନ୍ଦ ହୋଇଯିବା ଆଶଙ୍କା ଦେଖାଦେଇଛି । ଅଙ୍ଗନାଓ୍ବାଡି କର୍ମୀଙ୍କୁ ଯୋଗାଇ ଦିଆଯାଇଥିବା ଗ୍ୟାସ ଖାତା ଛତ୍ରପୁର ଡିଲର ଅଧୀନରେ ଥିବାରୁ ସେହି ଖାତାରେ ସ୍ଥାନୀୟ ଗ୍ୟାସ ଡିଲର ପାଖରେ ଗ୍ୟାସ ବୁକ୍ ହୋଇ ପାରୁନଥିବା ବେଳେ ଛତ୍ରପୁର ଡିଲର ଗ୍ୟାସ ଆଣି ଦେଉନାହାନ୍ତି, ଫଳରେ ଅଙ୍ଗନାଓ୍ବାଡି କର୍ମୀଙ୍କ ମଧ୍ୟରେ ଭାଳେଣି ପଡ଼ିଗଲାଣି । ଏନେଇ ସିଡିପିଓ ବବିତା ପଣ୍ଡାଙ୍କୁ ପଚାରିବାରେ ସେ କହିଛନ୍ତି ଏବେ ତ ଚାଲିଛି ଆଗକୁ କ’ଣ ହେଉଛି ଦେଖାଯିବ ।