ଭଞ୍ଜନଗର,୨୩।୩(ବାବୁଲା ପ୍ରଧାନ): ଇରାନ, ଇସ୍ରାଏଲ-ଆମେରିକା ମଧ୍ୟରେ ଲାଗିଥିବା ଯୁଦ୍ଧର ପରିଣାମ ଆମ ଦେଶ ସମେତ ଅନ୍ୟାନ୍ୟ ଦେଶକୁ ମଧ୍ୟ ଭୋଗିବାକୁ ପଡ଼ୁଛି। ଗ୍ୟାସ, ପେଟ୍ରୋଲ, ଡିଜେଲ ଆମଦାନୀ ଠିକ ଭାବେ ହେଉନାହିଁ। ତେଣୁ ଦେଶରେ ଏହାର ସଙ୍କଟ କିଛିଟା ଦେଖାଦେଇଛି। ଯାହାର ପରିଣାମ ସାଧାରଣ ଜନତା ଭୋଗୁଛନ୍ତି। ଏହିଭଳି ପରିସ୍ଥିତିରେ ଗଞ୍ଜାମ ଜିଲା ଭଞ୍ଜନଗର ଅଞ୍ଚଳରେ କମର୍ସିଆଲ ଗ୍ୟାସ ଆଉ ମିଳୁନାହିଁ। ଯାହାକିଛି ଘରୋଇ ବ୍ୟବହାର ଗ୍ୟାସ ସିଲିଣ୍ଡର ମିଳୁଛି। କମର୍ସିଆଲ ଗ୍ୟାସ ସିଲିଣ୍ଡର ନ ମିଳିବା ଦ୍ୱାରା ଭଞ୍ଜନଗର ସହରର ଅନେକ ହୋଟେଲ ଆଉ ଠିକ ଭାବେ ଖୋଲୁନାହିଁ । ଏହାର ମୁଖ୍ୟ କାରଣ ହେଲା କମର୍ସିଆଲ ଗ୍ୟାସ ନ ମିଳିବା। ଆଉ ଚୋରାରେ କିଣିଲେ ୨ ରୁ ୩ ହଜାର ଟଙ୍କା ପର୍ଯ୍ୟନ୍ତ ଦେବାକୁ ପଡ଼ୁଛି। ଯଦି ଚୋରାରେ କିଣି ବ୍ୟବସାୟ କରିବୁ ତେବେ ଦର ବୃଦ୍ଧି କରିବାକୁ ପଡ଼ୁଛି। ବର୍ଦ୍ଧିତ ଦର ଆମେ ବାଧ୍ୟ ହୋଇ ଗ୍ରାହକଙ୍କ ଉପରେ ପକାଉଛୁ ବୋଲି ଭଞ୍ଜନଗର ମୁଖ୍ୟ ସଡ଼କରେ ଥିବା ଜଣେ ହୋଟେଲ ମାଲିକ ଏଠାରେ ପ୍ରକାଶ କରିଛନ୍ତି।
ଅନ୍ୟପଟେ କିଛି ହୋଟେଲରେ ବର୍ଦ୍ଧିତ ଦରକୁ ନେଇ ମଧ୍ୟ ଗ୍ରାହକ ଅସନ୍ତୋଷ ବ୍ୟକ୍ତ କରିଛନ୍ତି। ଏନେଇ ଗ୍ୟାସ ଡିଷ୍ଟ୍ରିବ୍ୟୁଟରଙ୍କ ମତାମତ ନେବାପାଇଁ ତାଙ୍କ ଫୋନ ନମ୍ବର ରେ ଉଦ୍ୟମ କରାଯାଇଥିଲା କିନ୍ତୁ ତାହା ସମ୍ଭବପର ହୋଇପାରିନାହିଁ। ଯୁଦ୍ଧ ଯଦି ଲାଗିରହେ ଏବଂ ଗ୍ୟାସ, ପେଟ୍ରୋଲ, ଡିଜେଲ ଆମଦାନୀ କମିବ ତେବେ ଗ୍ରାହକ ମାନେ ଅନେକ ପ୍ରକାର ସମସ୍ୟାର ସମ୍ମୁଖୀନ ହେବେ। ଏହିଭଳି ପରିସ୍ଥିତିରେ କିଛି ଲୋକ ଜାଳେଣି କାଠ ବ୍ୟବହାର ଆରମ୍ଭ କରିଦେଲେଣି। ଏହାଦ୍ବାରା ଜଙ୍ଗଲ କ୍ଷୟ ହେବାର ସମ୍ଭାବନା ରହିଛି।
ଅନ୍ୟପକ୍ଷରେ ଭଞ୍ଜନଗର ଉପଖଣ୍ଡ ପ୍ରଶାସନ ମଧ୍ୟ ଗ୍ୟାସ କଳାବଜାରୀ ଯେଭଳି ନହେବ, ଗ୍ରାହକଙ୍କୁ ଠିକ ଭାବେ ନିର୍ଦ୍ଧାରିତ ସମୟରେ ଗ୍ୟାସ ସିଲିଣ୍ଡର ମିଳିବ ସେଥିପାଇଁ ପଦକ୍ଷେପ ନିଆଯାଇଛି।
ଏନେଇ ଉପ ଜିଲାପାଳ ଉମାଶଙ୍କର ବେହେରା ନିୟମିତ ସମୀକ୍ଷା କରୁଛନ୍ତି। ତେଣୁ ଉପଜିଲାପାଳଙ୍କ ଅଧ୍ୟକ୍ଷତାରେ ସାଧାରଣ ବଣ୍ଟନ ବ୍ୟବସ୍ଥା ଯଥା ପେଟ୍ରୋଲ, ଡିଜେଲ ଓ ରନ୍ଧନ ଗ୍ୟାସ ବିଷୟରେ ଇତିମଧ୍ୟରେ ଏକ ଉପଖଣ୍ଡ ସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ଗ୍ରାମ୍ୟ ଅଞ୍ଚଳ ଓ ସହରାଞ୍ଚଳ ରନ୍ଧନ ଗ୍ୟାସ ସିଲିଣ୍ଡର ସରବରାହର ଅବସ୍ଥା ଓ ବୁକିଂ ପ୍ରକ୍ରିୟା ତଥା ଅନ୍ୟ ସମସ୍ତ ସମସ୍ୟା ଉପରେ ଚର୍ଚ୍ଚା ହୋଇଛି।
ବୈଠକରେ ନିର୍ଦ୍ଧାରଣ ହୋଇଛି ଯେ, ଗ୍ରାମାଞ୍ଚଳରେ ରନ୍ଧନ ଗ୍ୟାସ ବିତରଣ ଚକ୍ରକୁ ୪୫ଦିନ ବୃଦ୍ଧି ଓ ସହରାଞ୍ଚଳରେ ୨୫ ଦିନ ବୁକିଂର ବ୍ୟବଧାନ ରହିବ, ଯାହା ଘରୋଇ ପରିବାରମାନଙ୍କୁ ଅନିୟମିତ ସରବରାହରୁ ମୁକ୍ତ ରଖାଯିବ। ଆପାତକାଳୀନ ପରିସ୍ଥିତିରେ ଅଗ୍ରାଧିକାର ଭିତ୍ତିରେ ଗ୍ୟାସ ସିଲିଣ୍ଡର ପ୍ରଦାନ କରାଯିବ ବୋଲି ଉପଜିଲାପାଳ ଶ୍ରୀଯୁକ୍ତ ବେହେରା କହିଛନ୍ତି। ଏହି ପରିବେଶରେ ଓଟିପି ମାଧ୍ୟମରେ ବୁକିଂ, ସ୍ବଚ୍ଛତା ଓ ବଜାର ନିୟନ୍ତ୍ରଣ ଉପରେ ବିଶେଷ ଗୁରୁତ୍ୱ ଦିଆଯାଇଛି। ଅଯଥା ଗ୍ୟାସ ସିଲିଣ୍ଡର୍ ଷ୍ଟକ ନ କରିବା ପାଇଁ ଜନସାଧାରଣ ଙ୍କୁ ଅବଗତ କରାଯାଇଛି। ଉପଭୋକ୍ତାମାନଙ୍କୁ ସୁବିଧା ପ୍ରଦାନ ପାଇଁ ସମସ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି।
ସୂଚନା ମୁତାବକ, ଭଞ୍ଜନଗର ଉପଖଣ୍ଡରେ ୨ ଲକ୍ଷ ୫୨ ହଜାର ୮୯୨ ଜଣ ଘରୋଇ ଓ ୧୦୫୩ ଜଣ ବାଣିଜ୍ୟିକ ଗ୍ୟାସ ଉପଭୋକ୍ତା ଥିବାବେଳେ ଶନିବାର ସୁଦ୍ଧା ଉପଖଣ୍ଡର ଆସିକା ରେ ୧୨୩୮ ଟି ଘରୋଇ ଓ ୧୮୮ଟି ବାଣିଜ୍ୟିକ ଗ୍ୟାସ ସିଲିଣ୍ଡର ମହଜୁଦ ରହିଛି। ସେହିପରି ବେଲଗୁଣ୍ଠା ରେ ୪୪୧ଟି ଘରୋଇ ଓ ୪୫ଟି ବାଣିଜ୍ୟିକ, ଭଞ୍ଜନଗରରେ ୮୩୭ଟି ଘରୋଇ ଓ ୧ଟି ବାଣିଜି୍ୟକ, ବୁଗୁଡାରେ ୪୪୨ଟି ଘରୋଇ ଓ ୭୯ଟି ବାଣିଜ୍ୟିକ, ଧରାକୋଟରେ ୫୦୪ଟି ଘରୋଇ ଓ ୬ଟି ବାଣିଜ୍ୟିକ, ଜଗନ୍ନାଥପ୍ରସାଦରେ ୭୪୨ଟି ଘରୋଇ ଓ ୧୬୬ଟି ବାଣିଜ୍ୟିକ, ଶେରଗଡରେ ୫୧୮ଟି ଘରୋଇ ଓ ଗୋଟିଏ ବାଣିଜ୍ୟିକ ଏବଂ ସୋରଡ଼ାରେ ୩୬୪ଟି ଘରୋଇ ଓ ୧୫ଟି ବାଣିଜି୍ୟକ ଗ୍ୟାସ ସିଲିଣ୍ଡର ମହଜୁଦ ରହିଛି। ବର୍ତମାନ ଉପଖଣ୍ଡ ରେ ପ୍ରଚୁର ଗ୍ୟାସ, ପେଟ୍ରୋଲ ଓ ଡିଜେଲ ମହଜୁଦ ରହିଛି। କୌଣସି ଭ୍ରାନ୍ତ କଥାରେ ବିଶ୍ୱାସ କରନ୍ତୁ ନାହିଁ।ଗ୍ୟାସ କଳାବଜାରୀ କଲେ କଡା କାର୍ଯାନୁଷ୍ଠାନ ନିଆଯିବ ବୋଲି ଉପଜିଲ୍ଲାପାଳ ଶ୍ରୀ ବେହେରା କହିଛନ୍ତି। ବୈଠକରେ ଅତିରିକ୍ତ ଯୋଗାଣ ଅଧିକାରୀ ସୁଭରଜ ସାମନ୍ତରା ଓ ଉପଖଣ୍ଡର ସମସ୍ତ ଯୋଗାଣ ନିରୀକ୍ଷକ ଉପସ୍ଥିତ ରହିଥିଲେ।