ଗଜପତି,୭ା୧୨(ଗିରିଧାରୀ ପରିଛା): ଜିଲା ପାଇଁ ଏକ ଗର୍ବର ମୁହୂର୍ତ୍ତରେ, ଗଜପତିର ସ୍କେଟର୍ସମାନେ RSFI ରାଜ୍ୟ ସ୍କେଟିଂ ଚାମ୍ପିଅନସିପରେ ଉତ୍କୃଷ୍ଟ ପ୍ରଦର୍ଶନ କରି ଅନେକ ପଦକ ହାସଲ କରିବା ସହ ଜିଲ୍ଲାର ଗୌରବ ବଢ଼ାଇଛନ୍ତି। ସେମାନଙ୍କର ଏହି ସଫଳତା ରୋଲର କ୍ରୀଡ଼ାରେ ଏକ ନୂତନ ଅଧ୍ୟାୟ ସୃଷ୍ଟି କରିଛି।
ରାଜ୍ୟ ସ୍ତରରେ ଅସାଧାରଣ ଦକ୍ଷତା ପ୍ରଦର୍ଶନ କରି ୭ ଜଣ ସ୍କେଟର୍ସ ଆସନ୍ତା ଡିସେମ୍ବର ୫ ରୁ ୧୫ ତାରିଖ ପର୍ଯ୍ୟନ୍ତ ବିଶାଖାପାଟଣାରେ ଅନୁଷ୍ଠିତ ହେବାକୁ ଥିବା RSFI ଜାତୀୟ ଚାମ୍ପିଅନସିପ୍ ପାଇଁ ଯୋଗ୍ୟତା ଅର୍ଜନ କରିଛନ୍ତି।
ସେମାନେ ହେଲେ ସୁଶ୍ରୀ ଶାମ୍ଭବୀ ସାହୁ (୧୨-୧୫ ବାଳିକା: ୧ ସ୍ୱର୍ଣ୍ଣ, ୧ ରୌପ୍ୟ), ବି. ଯକ୍ଷିତ (୧୨-୧୫ ବାଳକ: ୧ ସ୍ୱର୍ଣ୍ଣ, ୧ ରୌପ୍ୟ), ଟି. ରିତିଶା (୧୫-୧୮ ବାଳିକା: ୨ ସ୍ୱର୍ଣ୍ଣ), ପି. କାର୍ତ୍ତିକ (୧୫-୧୮ ବାଳକ: ୨ ସ୍ୱର୍ଣ୍ଣ), ପି. ଧମେଶ (୧୫-୧୮ ବାଳକ: ୨ ରୌପ୍ୟ), ପ୍ରୟାସ ରଇତ (ବରିଷ୍ଠ: ୨ ରୌପ୍ୟ), ଏବଂ ବିଶାଲ ବେହେରା (ବରିଷ୍ଠ: ୨ କାଂସ୍ୟ) I ଜାତୀୟ ସ୍ତରରେ ନିଜର ଛାପ ସୃଷ୍ଟି କରିବା ଲକ୍ଷ୍ୟରେ ଏହି ଦଳ ବର୍ତ୍ତମାନ କଠୋର ତାଲିମ ନେବା ପରେ ବିଶାଖାପାଟଣା ଅଭିମୁଖେ ଯାତ୍ରା କରିଛି।
ଏହି ସଫଳତା ପାଇଁ ପ୍ରଶିକ୍ଷକ ସୁକାନ୍ତ ଦଳବେହେରା, ଅଭିଭାବକ ଏବଂ କ୍ରୀଡାପ୍ରେମୀମାନେ ଅତ୍ୟନ୍ତ ଆନନ୍ଦ ପ୍ରକାଶ କରିଛନ୍ତି। ଗଜପତି ଜିଲା ସ୍କେଟିଂ ସଂଘର ଜିଲା ସଭାପତି ମୋହନ ବେହେରା ପଦକ ବିଜେତାମାନଙ୍କ କଠିନ ପରିଶ୍ରମକୁ ପ୍ରଶଂସା କରିଛନ୍ତି ଏବଂ ଏହାକୁ “ଗଜପତିରେ ରୋଲର ସ୍କେଟିଂ ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ, ଯାହା ଜିଲ୍ଲାରେ କ୍ରୀଡ଼ା ପାଇଁ ଏକ ଉଜ୍ଜ୍ୱଳ ଭବିଷ୍ୟତର ସଙ୍କେତ ଦେଉଛି” ବୋଲି କହିଛନ୍ତି।