ବନ୍ତ,୨୨।୩(କିଶୋର କୁମାର ସେଠି):ଭଦ୍ରକ ଜିଲା ବନ୍ତ ତହସିଲ ଅନ୍ତର୍ଗତ ଓଡ଼ଙ୍ଗ ପଞ୍ଚାୟତର ଏରଝାଟିଆ ଗ୍ରାମରେ ଶନିବାର ବିଳମ୍ବିତ ରାତିରେ ଏକ ଭୟାବହ ଅଗ୍ନିକାଣ୍ଡ ଘଟିଯାଇଛି। ବିଦ୍ୟୁତ୍ ସର୍ଟଶର୍କିଟ ଯୋଗୁ ଗ୍ରାମର ରଘୁନାଥ ମହାନ୍ତି ଓ ନିରାକାର ମହାନ୍ତିଙ୍କ ଗୁହାଳ ଘରେ ନିଆଁ ଲାଗିଯିବାରୁ ଦୁଇ ବଖରା ଗୁହାଳ ଘର ସମ୍ପୂର୍ଣ୍ଣ ପୋଡି ଯାଇଛି ।
ରାତିରେ ପରିବାର ଲୋକେ ଗୋରୁଙ୍କ ବିକଳ ଚିତ୍କାର ଶୁଣି ଉଠିଥିଲେ । ଗୁହାଳ ଘରେ ବନ୍ଧା ଯାଇଥିବା ଗୋରୁଙ୍କୁ ଫିଟାଇ ବାହାରକୁ ଆଣିଥିଲେ । କିନ୍ତୁ ଅଗ୍ନିକାଣ୍ଡରେ ଗୋଟିଏ ଗାଈ ଜୀବନ୍ତ ଦଗ୍ଧ ହୋଇଯାଇଥିଲା ଅନ୍ୟ ଏକ ଗାଈର ଶରୀର ଅର୍ଦ୍ଧାଧିକ ଅଂଶ ପୋଡି ଯାଇ ଗୁରୁତର ହୋଇଛି। ଓଡ଼ଙ୍ଗ ପ୍ରାଣୀଧନ ନିରୀକ୍ଷକ ପ୍ରିୟବ୍ରତ ରାଉତ ଘଟଣାସ୍ଥଳରେ ପହଞ୍ଚି ଗୁରୁତର ଗାଈଟିର ଚିକିତ୍ସା କରିଛନ୍ତି ।ଗ୍ରାମବାସୀ ଏବଂ ଆଗରପଡ଼ାରୁ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରଥିଲେ । କ୍ଷତିଗ୍ରସ୍ତଙ୍କୁ ପ୍ରଶାସନ ପକ୍ଷରୁ କ୍ଷତିପୂରଣ ଯୋଗାଇ ଦେବାକୁ ଗଣନାଥ ବିଶ୍ୱାଳ, ଯଜ୍ଞଦତ୍ତ କରଶର୍ମା, ବନମାଳୀ ବାରିକ, ଗୌରାଙ୍ଗ ବାରିକ, ସୂର୍ଯ୍ୟକାନ୍ତ ବାରିକ, ଭୋଳାନାଥ ଆଚାର୍ଯ୍ୟ,ରବୀନ୍ଦ୍ର ଯେନାଙ୍କ ସମେତ ଗ୍ରାମବାସୀମାନେ ଦାବି କରିଛନ୍ତି।
Dharitri – Odisha’s No.1 Odia Daily