ଖଲ୍ଲିକୋଟ,୧୨।୪,(ପ୍ରଶାନ୍ତ କୁମାର ମିଶ୍ର): ବାଲୁଗାଁ ଷ୍ଟେଶନରେ ଶନିବାର ମଧ୍ୟାହ୍ନରେ ଏକ କୋଇଲା ବୋଝେଇ ଟ୍ରେନରେ ନିଆଁ ଲାଗି ଯାଇଥିଲା। ଟ୍ରେନଟି ପଲାସାରୁ ଭୁବନେଶ୍ୱର ଅଭିମୁଖେ ଯାଉଥିବା ବେଳେ ଖଲ୍ଲିକୋଟ ଷ୍ଟେଶନ ନିକଟରେ ଏକ ବଗିରୁ ଧୂଆଁ ବାହାରୁଥିବା ଲୋକେ ଦେଖିଥିଲେ। ଏ ସମ୍ପର୍କରେ ସେମାନେ ଷ୍ଟେଶନ ମାଷ୍ଟରଙ୍କୁ ଜଣାଇବା ପରେ ଚିଲିକା ଷ୍ଟେଶନକୁ ଖବର ଦିଆଯାଇଥିଲା। କିନ୍ତୁ ସେତେବେଳକୁ ଟ୍ରେନ ଚିଲିକା ଷ୍ଟେଶନ ପାର ହୋଇ ଚାଲି ଯାଇଥିବାରୁ ବାଲୁଗାଁ ଷ୍ଟେଶନରେ ଟ୍ରେନକୁ ଅଟକା ଯାଇଥିଲା। ଏହାପରେ ବାଲୁଗାଁ ଦମକଳ ବାହିନୀ ପହଞ୍ଚି ବଗିରେ ଲାଗିଥିବା ନିଆଁ କୁ ଆୟତ୍ତ କରିଥିଲେ। ଅତ୍ୟଧିକ ଗ୍ରୀଷ୍ମ ପ୍ରବାହ କାରଣରୁ ନିଆଁ ଲାଗିଥିବା ସନ୍ଦେହ କରାଯାଇଛି। ନିଆଁ ଲିଭିବା ପରେ ଟ୍ରେନ ଗନ୍ତବ୍ୟ ସ୍ଥଳ ଅଭିମୁଖେ ଯାଇଥିଲା।