ବରଗଡ଼,୨୨।୮(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ସାର କଳାବଜାର ବର୍ତ୍ତମାନ ଚାଷୀଙ୍କ ପାଇଁ ଚିନ୍ତାର କାରଣ ପାଲଟିଛି। ଜିଲାରେ ପର୍ଯ୍ୟାପ୍ତ ସାର ମହଜୁଦ ଥିବା କୃଷି ବିଭାଗ ସୂଚନା ଦେଉଛି। ଅନ୍ୟପକ୍ଷରେ ଚାଷୀମାନେ ବିଭିନ୍ନ ଲାଇସେନ୍ସପ୍ରାପ୍ତ ସାର ବିକ୍ରେତାଙ୍କ ପାଖକୁ ଗଲେ ସେମାନେ ସାର ମହଜୁଦ ନଥିବା କହୁଥିବା ଅଭିଯୋଗ ହୋଇଛି। କିନ୍ତୁ ସମ୍ପୃକ୍ତ ସାର ବିକ୍ରେତାମାନେ ଚଢା ଦରରେ ସାର ବିକୁଥିବା ଅର୍ଥାତ୍ ସରକାରଙ୍କ ନିର୍ଦ୍ଧାରୀତ ଦରଠାରୁ ଅଧିକ ଦରରେ ସାର ବିକ୍ରି କରୁଥିବା ଅଭିଯୋଗ ହୋଇଛି। ଏ ନେଇ ଗୁରୁବାର ଚାଷୀ ସଙ୍ଗଠନ ଜୟ କିଷାନ ଆନ୍ଦୋଳନର ଏକ ପ୍ରତିନିଧି ଦଳ ଜିଲାପାଳ ଆଦିତ୍ୟ ଗୋୟଲଙ୍କୁ ଭେଟି ଆଲୋଚନା କରିଥିଲେ। ଚାଷୀ ସଙ୍ଗଠନ ପକ୍ଷରୁ ଅଭିଯୋଗ ହୋଇଛି, ବର୍ତ୍ତମାନ ବରଗଡ଼ ଜିଲାରେ ରାସାୟନିକ ସାରର କୃତ୍ରିମ ଅଭାବ ସୃଷ୍ଟି କରି ଲାଭଖୋର ବେପାରୀମାନେ ଚାଷୀମାନଙ୍କୁ ଲୁଟ କରି ଚାଲିଛନ୍ତି। ସରକାରଙ୍କ ସବସିଡି ପରେ ୟୁରିଆ ସାର ପକେଟ ପ୍ରତି ୨୬୬ ଟଙ୍କା ୫୦ ପଇସା ଏବଂ ଡିଏପି ସାର ପକେଟ ପ୍ରତି ୧୩୫୦ ଟଙ୍କା ଥିବା ବେଳେ ୟୁରିଆ ୫୦୦ରୁ ୬୦୦ ଟଙ୍କା ଏବଂ ଡିଏପି ୧୮୦୦ ଟଙ୍କାରେ ବିକ୍ରି କରାଯାଉଛି। ଚାଷୀମାନେ ଯେଉଁଠି ଆନ୍ଦୋଳନ କରୁଛନ୍ତି, ସେଇଠି କିଛି କିଛି ମାତ୍ରାରେ ସାର ଦିଆଯାଉଛି। ସେହିପରି ଯେଉଁଠି ଚାଷୀମାନେ ଆନ୍ଦୋଳନ କରିଛନ୍ତି, ସେଇଠି ଚାଷୀମାନଙ୍କୁ ଉଚିତ ମୂଲ୍ୟରେ ସାର ଦିଆଯାଉଛି। ଅନ୍ୟତ୍ର ସାରବିକ୍ରିରେ ଚାଷୀମାନଙ୍କୁ ଖୋଲାଖୋଲି ଲୁଟ କରାଯାଉଥିବା ଅଭିଯୋଗ ହୋଇଛି। ତେବେ ଜୟ କିସାନ ଆନ୍ଦୋଳନର ପ୍ରତିନିଧିବୃନ୍ଦ ଜିଲାପାପାଳଙ୍କ ସହିତ ସେ ନେଇ ଆଲୋଚନା କରିଥିବା ବେଳେ ସାର କଳାବଜାର ନେଇ ସୂଚନା ମିଳିଲେ କାର୍ଯ୍ୟାନୁଷ୍ଠାନ ନିଆଯାଉଥିବା କହିଥିଲେ। ସେହିପରି କୃଷି ଅଧିକାରୀଙ୍କ ସୂଚନା ଅନୁସାରେ ବରଗଡ଼ ଜିଲାରେ ଡିଏପି ପ୍ରାୟ ୧୭ହଜାର ଟନ ଆବଶ୍ୟକ ଥିବା ବେଳେ ବର୍ତ୍ତମାନ ସୁଦ୍ଧା ୧୭ ହଜାର ୧୩୪ ଟନ ଏବଂ ୟୁରିଆ ୩୩ ହଜାର ୮୦୦ ଟନ ଆବଶ୍ୟକ ଥିବା ବେଳେ ବର୍ତ୍ତମାନ ସୁଦ୍ଧା ୨୮ ହଜାର ୨୨୮ ଟନ ଆସି ସାରିଛି। ତେବେ ଏତେ ପରିମାଣର ସାର ଜିଲାକୁ ଆସିଥିଲେ ସୁଦ୍ଧା ଚାଷୀ କାହିଁକି ଲୁଟର ଶୀକାର ହେଉଛନ୍ତି ବୋଲି ଜିଲାପାଳ ଗୋୟଲଙ୍କୁ ସଙ୍ଗଠନର ଚାଷୀ ପ୍ରତିନିଧିମାନେ ପଚାରିଥିଲେ। ଜିଲାର ସାର ବିକ୍ରେତାଙ୍କ ଗୋଦାମ ଯାଞ୍ଚ କରାଯାଉ ବୋଲି ସଙ୍ଗଠନ ପକ୍ଷରୁ ଜିଲାପାଳଙ୍କଠାରେ ଦାବି କରାଯାଇଥିଲା। ସେହିପରି ନିକଟ ଭବିଷ୍ୟତରେ ଜିଲାକୁ ଯାହା ସାର ଆସିବ, ତାହା କେବଳ ପ୍ରାଥମିକ କୃଷି ସମବାୟ ସମିତିକୁ ଦିଆଯାଉ ବୋଲି ସଂଗଠନ ଦାବି କରିଥିଲା। ଏହାହେଲେ ସେଠାରେ ଚାଷୀମାନେ ଉଚିତ ମୂଲ୍ୟରେ ସାର ପାଇପାରିବେ ବୋଲି ସଂଗଠନର ପ୍ରତିନିଧିମାନେ କହିଥିଲେ। ଏହି ଆଲୋଚନାରେ ପଶ୍ଚିମ ଓଡ଼ିଶା କୃଷକ ସଂଗଠନ ସମନ୍ବୟ ସମିତିର ଅନ୍ୟତମ ଆବାହକ ଲିଙ୍ଗରାଜ, ବରିଷ୍ଠ ଚାଷୀନେତା ଶିବ ପ୍ରସାଦ ପ୍ରଧାନ, ଜୟ କିସାନ ଆନ୍ଦୋଳନର ଜିଲା ସଭାପତି ସୁଶୀଲ କୁମାର ସାହୁ, ସାଧାରଣ ସମ୍ପାଦକ ହର ବଣିଆଁ, ଚଞ୍ଚଳ ପ୍ରଧାନ, ଭଞ୍ଜନ ବାରିକ, କିଶୋର ସାହୁ, ସରୋଜ ପଧାନ ପ୍ରମୁଖ ଉପସ୍ଥିତ ଥିଲେ।