ଲୋଇସିଂହା,୧୫ା୧(ସୁଶାନ୍ତ ବାରିକ):ଜାନୁଆରୀ ଦ୍ୱିତୀୟ ସପ୍ତାହ ଆରମ୍ଭ ହୋଇଯାଇଛି। କିନ୍ତୁ ବିଳମ୍ବରେ ଧାନକ୍ରୟ ଯୋଗୁ ବଲାଙ୍ଗୀର ଜିଲା ଲୋଇସିଂହା ବ୍ଲକ୍ ଅଞ୍ଚଳର ବିଭିନ୍ନ ମଣ୍ଡିରେ ମାସକର ପଛୁଆ ଧାନକିଣା ଚାଲିଥିବା ଜଣାପଡିଛି। ମନ୍ଥର ଗତିରେ ଧାନକିଣାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ୨୦୨୫ ଡିସେମ୍ବର ୫ରେ ଆନୁଷ୍ଠାନିକ ଭାବେ ଲୋଇସିଂହା ମଣ୍ଡିରୁ ବଲାଙ୍ଗୀର ଜିଲା ଖରିଫ ଧାନକ୍ରୟ ଶୁଭାରମ୍ଭ କରିଥିଲେ ଜିଲାପାଳ। ପ୍ରଶାସନ ସହ ମିଲର ଏଗ୍ରିମେଣ୍ଟ, ଟୋକନ୍ ସମସ୍ୟା ଯୋଗୁ ଡିସେମ୍ବର ଶେଷ ସପ୍ତାହରେ ମଣ୍ଡିରେ ଧାନକିଣା ଆରମ୍ଭ ହୋଇଥିଲା। ମାତ୍ର ୨୦ ଦିନ ହେବ ଧାନକିଣା ହେଉଛି। ଏହାରି ଭିତରେ କିଛିଦିନ ମିଲରମାନେ ଆନ୍ଦୋଳନ କରିବାରୁ ଧାନକ୍ରୟ ବନ୍ଦ ରହିଥିଲା। ଜାନୁଆରୀ ୧୫ ତାରିଖ ଚାଲିଥିବାବେଳେ ଲୋଇସିଂହା ବ୍ଲକ୍ ଅଧୀନ ବୁର୍ଡା ମଣ୍ଡିରେ ଗତ ୨ ତାରିଖର ଟୋକନ ପାଇଥିବା ଚାଷୀଙ୍କ ତାଲିକା ଛପାଯାଇଛି। ହେଲେ ପ୍ରକୃତରେ ଡିସେମ୍ବର ୨୨ରେ ଟୋକନ ଥିବା ଚାଷୀଙ୍କ ଧାନକିଣା ଯାଉଥିବା ଜଣାପଡିଛି। ସେହିପରି ଯୋଗୀସର୍ଡା ମଣ୍ଡିରେ ଡିସେମ୍ବର ୨୬ ତାରିଖ ଧାନକ୍ରୟ ପାଇଁ ତାଲିକା ଛପାଯାଇଛି। ବାଦିବାହାଲ ମଣ୍ଡିରେ ଡିସେମ୍ବର ୧୫ ତାରିଖ ଟୋକନ୍ ଛପା ଯାଇ ଧାନକ୍ରୟ କରାଯାଉଛି। ବିଳମ୍ବରେ ଧାନ କିଣା ହେଉଛି। ଅନ୍ୟପକ୍ଷରେ ମିଲର ପର୍ଯ୍ୟାପ୍ତ ପରିମାଣର ଗାଡ଼ି ପଠାଉ ନ ଥିବାରୁ ଧାନ ଉଠିବାରେ ସମସ୍ୟା ହେଉଥିବା ପାକ୍ସ କର୍ମଚାରୀ କହୁଛନ୍ତି। ଉକ୍ତ ବ୍ଲକ୍ ଅଧୀନ ସରଗାଡ଼, ବାଦିମୁଣ୍ଡା, ରେଙ୍ଗାଲି, କୁଶମେଲ, କୁଶଙ୍ଗ ମଣ୍ଡିରେ ମଧ୍ୟ ସମାନ ଅବସ୍ଥା ଲାଗି ରହିଛି। ଶତାଧିକ ଚାଷୀ ଟୋକନ୍ ଅପେକ୍ଷାରେ ରହିଛନ୍ତି। ମାସାଧିକ ସମୟ ହେଲା ଧାନ ଅମଳ କରି ଘରେ ଗଚ୍ଛିତ ରଖିଥିବାରୁ ତାହାକୁ ମୂଷା ଖାଇ ନଷ୍ଟ କରୁଥିବା ଚାଷୀମାନେ ଅଭିଯୋଗ କରିଛନ୍ତି। ଅପରପକ୍ଷେ ଚାଷୀ ଟୋକନ୍ ପାଇ ମଣ୍ଡିକୁ ବିକ୍ରି ପାଇଁ ଧାନ ଆଣିଛନ୍ତି। ହେଲେ ମଣ୍ଡି ଉତ୍ତମ ବ୍ୟବସ୍ଥା ନ ଥିବାରୁ ଧାନ ଖୋଲା ଆକାଶରେ ପଡି କାକରରେ ଭିଜୁଛି। ସରକାର ତୁରନ୍ତ ଏଥିପ୍ରତି ଦୃଷ୍ଟି ଦେବା ପାଇଁ ଚାଷୀମାନେ ଦାବି କରିଛନ୍ତି।