ବରଗଡ଼,୧୦।୩(ପ୍ରେମାନନ୍ଦ ଖମାରୀ):ଧାନବିକ୍ରି ପଞ୍ଜୀକରଣରୁ ବାଦ୍ ପଡ଼ିଥିବା ବରଗଡ଼ ଜିଲା ଭେଡ଼େନ ବ୍ଲକ ଅନ୍ତର୍ଗତ ସହରାଟିକ୍ରା ମଣ୍ଡି ଉପରେ ନିର୍ଭରଶୀଳ ବିଭିନ୍ନ ଗ୍ରାମର ଚାଷୀମାନେ ଜିଲାପାଳଙ୍କ କାର୍ଯ୍ୟାଳୟରେ ଧାନ ଗଦା କରି ଧାରଣାରେ ବସିଛନ୍ତି। ତେବେ ସୋମବାର ସନ୍ଧ୍ୟା ପ୍ରାୟ ସାଢ଼େ ୬ଟାରୁ ୭ଟା ମଧ୍ୟରେ ବରଗଡ଼ ଏସ୍ଡିପିଓ ପଦାରବିନ୍ଦ ତ୍ରିପାଠୀଙ୍କ ନେତୃତ୍ୱରେ ବ୍ୟାପକ ପୋଲିସ ଧାରଣାସ୍ଥଳକୁ ପହଞ୍ଚିଥିଲେ। ସେଠାରେ ଗଦା ହୋଇଥିବା ଧାନକୁ ଖୋଦ୍ ପୋଲିସ କର୍ମଚାରୀମାନେ ଜିଲାପାଳଙ୍କ କାର୍ଯ୍ୟାଳୟ ବାହାରକୁ ଉଠାଇ ଆଣିଥିଲେ। ଏହା ସହିତ କିଛି ଶ୍ରମିକ ମଧ୍ୟ ନିୟୋଜିତ ଥିଲେ। ସେହିପରି ଧାରଣାରେ ବସିଥିବା ତାଲମେଣ୍ଡା ଗ୍ରାମର ଚାଷୀ ବିଜୁ ସାହୁ, ଯାଦବ ସାହୁ, ବିକାଶ ଭୋଇ, ଅକ୍ଷୟ ସାହୁ, ପ୍ରକାଶ ସାହୁଙ୍କ ସମେତ କେତେକ ଚାଷୀଙ୍କୁ ପୋଲିସ ଉଠାଇ ନେଇ ସେମାନଙ୍କୁ ଚକରକେନ୍ଦସ୍ଥିତ ରିଜର୍ଭ ପୋଲିସରେ ଅଟକ ରଖିଥିବା ସୂଚନା ମିଳିଛି। ଅନ୍ୟପଟେ ବାକି ଚାଷୀମାନେ ଧାରଣା ଜାରି ରଖିଛନ୍ତି।