ପ୍ୟୋଙ୍ଗୟାଙ୍ଗ,୩୧।୧୨ : ଦକ୍ଷିଣ କୋରିଆର ଆକାଶ ମାର୍ଗରେ ଡ୍ରୋନ ଉତକ୍ଷେପଣକୁ ନେଇ ଉତ୍ତେଜନା ବୃଦ୍ଧି ପାଇବା ପରେ ଉତ୍ତର କୋରିଆ ଶନିବାର ଏହାର ପୂର୍ବ ଜଳ କ୍ଷେତ୍ର ଆଡକୁ ତିନୋଟି ସ୍ବଳ୍ପ ଦୂରଗାମୀ ବାଲିଷ୍ଟିକ କ୍ଷେପଣାସ୍ତ୍ର ନିକ୍ଷେପ କରିଛି। ଦକ୍ଷିଣ କୋରିଆର ଜଏଣ୍ଟ ଚିଫ୍ ଅଫ ଷ୍ଟାଫ ଏକ ବିବୃତ୍ତିରେ କହିଛନ୍ତି ଯେ ଶନିବାର ସକାଳେ ଉତ୍ତର କୋରିଆର ରାଜଧାନୀ ପ୍ୟୋଙ୍ଗୟାଙ୍ଗର ଦକ୍ଷିଣରୁ ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନ୍ଙ୍କ ସୈନ୍ୟବାହିନୀ ତିନୋଟି କ୍ଷେପଣାସ୍ତ୍ର ଉତକ୍ଷେପଣ କରିଛି। ସେ କହିଛନ୍ତି ଯେ କ୍ଷେପଣାସ୍ତ୍ର ଉତକ୍ଷେପଣ ପରେ ଦକ୍ଷିଣ କୋରିଆ ସତର୍କତା ବୃଦ୍ଧି କରିଛି ଏବଂ ଆମେରିକା ସହ ଘନିଷ୍ଠ ସମନ୍ବୟ ରକ୍ଷା କରି ପ୍ରତ୍ୟେକ ପରିସ୍ଥିତିର ମୁକାବିଲା କରିବାକୁ ପ୍ରସ୍ତୁତ ଅଛି।
୨୦୨୨ବର୍ଷ ଶେଷ ହୋଇଛି। ୨୦୨୨ ବର୍ଷରେ ଉତ୍ତର କୋରିଆ ନେତା କିମ ଜୋଙ୍ଗ ଉନ ରେକର୍ଡ ସଂଖ୍ୟକ କ୍ଷେପଣାସ୍ତ୍ର ପରୀକ୍ଷା କରିଛନ୍ତି। ଆସନ୍ତା ୨୦୨୩ବର୍ଷ ମଧ୍ୟ ସେ ଅସ୍ତ୍ରଶସ୍ତ୍ର ଦୌଡ଼ରେ ଅଂଶଗ୍ରହଣ କରିବେ ବୋଲି ସେ କିମ୍ ସୂଚିତ କରିଛନ୍ତି। ୨୦୨୩ ପାଇଁ, କିମ ଆତ୍ମନିର୍ଭରଶୀଳ ପ୍ରତିରକ୍ଷା କ୍ଷମତା ବୃଦ୍ଧି କରିବାକୁ ନୂତନ ଗୁରୁତ୍ୱପୂର୍ଣ୍ଣ ଲକ୍ଷ୍ୟ ସ୍ଥିର କରିଛନ୍ତି। ଏହି ଲକ୍ଷ୍ୟଗୁଡିକ ବିଷୟରେ ଅଧିକ ସୂଚନା ଉପଲବ୍ଧ ନାହିଁ, କିନ୍ତୁ ଏହା ସ୍ପଷ୍ଟ ଯେ ଉତ୍ତର କୋରିଆ ଶୀଘ୍ର ସାମରିକ ଶକ୍ତି ଅଗ୍ରଗତି କରିବ । କିମ୍ କହିଛନ୍ତି ଯେ, ବିଦାୟ ୨୦୨୨, ଦମଦାର ହେବ ୨୦୨୩।
ଅନ୍ୟପକ୍ଷରେ ଜାପାନର ପ୍ରତିରକ୍ଷା ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ ଉତ୍ତର କୋରିଆ ସନ୍ଦେହଜନକ ଭାବେ ବାଲିଷ୍ଟିକ କ୍ଷେପଣାସ୍ତ୍ର ନିକ୍ଷେପ କରିଛି। ଗତ ଆଠ ଦିନ ମଧ୍ୟରେ ଉତ୍ତର କୋରିଆ ଦ୍ୱାରା ଏହା ପ୍ରଥମ କ୍ଷେପଣାସ୍ତ୍ର ଉତକ୍ଷେପଣ। ପାଞ୍ଚ ଦିନ ପୂର୍ବେ ଦକ୍ଷିଣ କୋରିଆ ପ୍ୟୋଙ୍ଗୟାଙ୍ଗକୁ ଏହାର ଆକାଶରେ ପାଞ୍ଚଟି ଡ୍ରୋନ ପଠାଇଥିବା ଅଭିଯୋଗ କରିଥିଲା।