ନୂଆଦିଲ୍ଲୀ/ହାଇଦ୍ରାବାଦ,୨୧ା୫: ୨୦୧୯ ଡିସେମ୍ବର ୬ ସକାଳେ ଲୋକଙ୍କ ନିଦ ଭାଙ୍ଗି ନ ଥିବାବେଳେ ହାଇଦ୍ରାବାଦ ପୋଲିସ ଗୁଳିରେ ମରିସାରିଥିଲେ ୪ ଅଭିଯୁକ୍ତ। ଜଣେ ମହିଳା ପ୍ରାଣୀ ଚିକିତ୍ସକଙ୍କୁ କିପରି ଅପହରଣ, ଗଣବଳାତ୍କାର ପରେ ହତ୍ୟା କରି ଜାଳି ଦେଇଥିଲେ ତାହାର ରହର୍ସାଲ ପାଇଁ ପୋଲିସ ଅଭିଯୁକ୍ତମାନଙ୍କୁ ଅପରାଧସ୍ଥଳକୁ ନେଇ ଏନ୍କାଉଣ୍ଟର କରିଥିଲା। ପୋଲିସ ଅଧିକାରୀଙ୍କ ଗୁଳିମାଡ଼ରେ ୪ ଅଭିଯୁକ୍ତଙ୍କ ମୃତ୍ୟୁ ଘଟିଥିଲା। ଏହି ବହୁଚର୍ଚ୍ଚିତ ତଥା ବିବାଦୀୟ ଏନ୍କାଉଣ୍ଟର ଫେକ୍ ଥିଲା। ପୋଲିସ ନିଜେ ମନଗଢ଼ା ତଥା ଅବିଶ୍ୱସନୀୟ କାହାଣୀ ଲେଖି ଆମତ୍ରକ୍ଷା ପାଇଁ କାର୍ଯ୍ୟାନୁଷ୍ଠାନ ନେଇଥିବା ଦର୍ଶାଇଥିଲା ବୋଲି ସୁପ୍ରିମକୋର୍ଟଙ୍କ ଦ୍ୱାରା ଗଠିତ ତଦନ୍ତ କମିଶନ ରିପୋର୍ଟ ଦାଖଲ କରିଛନ୍ତି। ଏଥିସହ ଫେକ୍ ଏନ୍କାଉଣ୍ଟରରେ ସାମିଲ ଥିବା ସମସ୍ତ ୧୦ ପୋଲିସ ଅଧିକାରୀଙ୍କ ବିରୋଧରେ ହତ୍ୟା ମାମଲା ରୁଜୁ ପାଇଁ ସୁପାରିସ କରିଛନ୍ତି। ଉକ୍ତ ରିପୋର୍ଟକୁ ଶୁକ୍ରବାର ସାର୍ବଜନୀନ କରାଯାଇଛି।
ହାଇଦ୍ରାବାଦ ଫେକ୍ ଏନ୍କାଉଣ୍ଟରକୁ ନେଇ ପୋଲିସ ଅଧିକାରୀମାନଙ୍କ ବିରୋଧରେ ନିରପେକ୍ଷ ତଦନ୍ତ ପାଇଁ ସୁପ୍ରିମକୋର୍ଟରେ ଦୁଇଟି ପିଟିଶନ ଦାଖଲ କରାଯାଇଥିଲା। ଗୋଟିଏ ପିଟିଶନ ଆଇନଜୀବୀ ଜି.ଏସ୍. ମଣି ଓ ପ୍ରଦୀପ କୁମାର ଯାଦବ ଏବଂ ଅନ୍ୟଟି ଓକିଲ ଏମ୍.ଏଲ୍. ଶର୍ମା ଦାଖଲ କରିଥିଲେ। ମଣି ଓ ଯାଦବ ଏହାକୁ ଫେକ୍ ଏନ୍କାଉଣ୍ଟର ଦର୍ଶାଇ ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ ଏଫ୍ଆଇଆର୍ କରିବାକୁ ଅନୁରୋଧ କରିଥିଲେ। ହାଇଦ୍ରାବାଦ ପୋଲିସ କେଉଁ ପରିସ୍ଥିତିରେ ଏନ୍କାଉଣ୍ଟର କରିଥିଲା ତାହାର ତଦନ୍ତ ପାଇଁ ୨୦୧୯ ଡିସେମ୍ବର ୧୨ରେ ସିରପୁରକର କମିଶନ ଗଠନ କରାଯାଇଥିଲା। ୬ ମାସ ମଧ୍ୟରେ ତଦନ୍ତ ରିପୋର୍ଟ ଦାଖଲ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ଏଥିରେ ସୁପ୍ରିମକୋର୍ଟର ପୂର୍ବତନ ବିଚାରପତି ଜଷ୍ଟିସ୍ ଭି.ଏସ୍. ସିରପୁରକର ଅଧ୍ୟକ୍ଷତା କରିଥିବାବେଳେ ବମ୍ବେ ହାଇକୋର୍ଟ ବିଚାରପତି ଜଷ୍ଟିସ୍ ରେଖା ସୋନ୍ଦୁର ବାଲ୍ଡୋଟା ଏବଂ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)ର ପୂର୍ବତନ ନିର୍ଦ୍ଦେଶକ ଡି.ଆର୍. କାର୍ତ୍ତିକେୟନ୍ ସଦସ୍ୟ ରହିଥିଲେ। ୨୦୨୦ ଜୁଲାଇରୁ ୨୦୨୧ ଅଗଷ୍ଟ ମଧ୍ୟରେ ଚୂଡ଼ାନ୍ତ ରିପୋର୍ଟ ଦାଖଲ ପାଇଁ କମିଶନଙ୍କ ଅବଧି ୬ ମାସ ଲେଖାଏ ୩ ଥର ବଢ଼ାଯାଇଥିଲା। ସିରପୁରକର କମିଶନ ଶୁକ୍ରବାର ବନ୍ଦ ଲଫାପାରେ ବିସ୍ତୃତ ରିପୋର୍ଟ ସୁପ୍ରିମକୋର୍ଟରେ ଦାଖଲ କରିଛନ୍ତି। ରିପୋର୍ଟକୁ ଜଉମୁଦ ଲଫାପା ଭିତରେ ବନ୍ଦ ରଖିବାକୁ ବରିଷ୍ଠ ଆଇନଜୀବୀ ଶ୍ୟାମ ଦିଓ୍ବାନ ପରାମର୍ଶ ଦେଇଥିଲେ, ଯାହାକୁ ଅଦାଲତ ଗ୍ରହଣ କରିନାହାନ୍ତି। ଭାରତର ପ୍ରଧାନ ବିଚାରପତି (ସିଜେଆଇ) ଏନ୍.ଭି. ରମନାଙ୍କ ଅଧ୍ୟକ୍ଷତାରେ ତଥା ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ହିମା କୋହିଲଙ୍କୁ ନେଇ ଗଠିତ ଖଣ୍ଡପୀଠ ରିପୋର୍ଟକୁ ତେଲଙ୍ଗାନା ହାଇକୋର୍ଟକୁ ପରବର୍ତ୍ତୀ କାର୍ଯ୍ୟାନୁଷ୍ଠାନ ପାଇଁ ପଠାଇଦେଇଛନ୍ତି। ଖଣ୍ଡପୀଠ କହିଛନ୍ତି, ଏହା ଏକ ଏନ୍କାଉଣ୍ଟର ମାମଲା, ଯାହାକୁ ଏଠାରେ ରଖାଯିବା ଦରକାର ନାହିଁ। କମିଶନ ଏଥିରେ ପୋଲିସକୁ ଦୋଷୀ ଦର୍ଶାଇଛନ୍ତି। ଏଥିସହ କେତେକ ସୁପାରିସ ମଧ୍ୟ କରିଛନ୍ତି। ତେଣୁ ଉଭୟ ପକ୍ଷଙ୍କୁ ରିପୋର୍ଟର କପି ଦେବା ପାଇଁ ରେଜେଷ୍ଟ୍ରି ବ୍ୟବସ୍ଥା କରନ୍ତୁ। ଏନ୍କାଉଣ୍ଟରରେ ସାମିଲ ଥିବା ୧୦ ପୋଲିସ ଅଧିକାରୀ ହେଲେ ଭି. ସୁରେନ୍ଦର, କେ. ନରସିଂହ ରେଡ୍ଡୀ, ଶାଇକ୍ ଲାଲ ମଧାର, ମହମ୍ମଦ ସିରାଜୁଦ୍ଦିନ, କୋଚେରଲା ରବି, କେ. ଭେଙ୍କଟେଶ୍ୱରଲୁ, ଏସ୍. ଅରବିନ୍ଦ ଗୌଡ଼, ଡି. ଜାନକୀରାମ, ଆର. ବାଲୁ ରାଠୋଡ୍ ଏବଂ ଡି. ଶ୍ରୀକାନ୍ତ। ଏହି ଅଧିକାରୀମାନେ ଉଦ୍ଦେଶ୍ୟମୂଳକ ଭାବେ ହତ୍ୟା କରିଥିବାରୁ ଏମାନଙ୍କ ବିରୋଧରେ ଭାରତୀୟ ଦଣ୍ଡବିଧି ଆଇନ (ଆଇପିସି) ଦଫା ୩୦୨, ୩୪ ଓ ୨୦୧ ବଳରେ ମାମଲା ରୁଜୁ କରିବାକୁ ତଦନ୍ତ କମିଶନ ସୁପାରିସ କରିଛନ୍ତି।