ଓପନଏଆଇର ଲୋକପ୍ରିୟ ଏଆଇ ଟୁଲ ଚାଟଜିପିଟି ଏବେ ନକଲି ଆଧାର କାର୍ଡ ଓ ପାନ କାର୍ଡ ତିଆରି କରିପାରୁଛି। ସୋସିଆଲ ମିଡିଆରେ ଏହି ନକଲି ପାନ କାର୍ଡ ଓ ଆଧାର କାର୍ଡର ଫଟୋ ଭାଇରାଲ ହେଉଛି। ଏହା ଏକ ଗମ୍ଭୀର ସୁରକ୍ଷା ବିପଦ ସୃଷ୍ଟି କରିଛି, ଯାହା ପାଇଁ ଏଆଇକୁ ନିୟନ୍ତ୍ରଣ କରିବାର ଆବଶ୍ୟକତା ଦେଖାଦେଇଛି।
ଚାଟଜିପିଟିର ନୂଆ ଜିପିଟି-୪ଓ ମଡେଲରେ ଉନ୍ନତ ଇମେଜ ଜେନେରେସନ କ୍ଷମତା ରହିଛି। ଏହା ଗତ ସପ୍ତାହରେ ଲଞ୍ଚ ହୋଇଥିଲା ଓ ଏହା ଦ୍ୱାରା ୭୦ କୋଟିରୁ ଅଧିକ ଇମେଜ ତିଆରି ହୋଇସାରିଛି। ପୂର୍ବରୁ ଏହା ଘିବିଲି ଷ୍ଟାଇଲରେ ଫଟୋ ତିଆରି କରି ଲୋକଙ୍କ ମନୋରଞ୍ଜନ କରିଥିଲା, କିନ୍ତୁ ଏବେ ଏହା ନକଲି ଆଧାର ଓ ପାନ କାର୍ଡ ତିଆରି କରି ସମସ୍ତଙ୍କୁ ଚିନ୍ତାରେ ପକାଇଛି।
ସୋସିଆଲ ମିଡିଆରେ କେତେକ ଲୋକ ଓପନଏଆଇର ସିଇଓ ସାମ ଆଲ୍ଟମ୍ୟାନ ଓ ଟେସଲାର ସିଇଓ ଏଲନ ମସ୍କଙ୍କ ନାଁରେ ନକଲି ଆଧାର କାର୍ଡ ତିଆରି କରି ଶେୟାର କରିଛନ୍ତି। ଏହି କାର୍ଡ ଦେଖିବାକୁ ଏତେ ସଠିକ ଲାଗୁଛି ଯେ ଏହା ନକଲି ନା ଅସଲି ଦେଖଇଲେ ତାଜୁବ ଲାଗୁଛି। ଏହା ପଛରେ ଚାଟଜିପିଟିର ନୂଆ ଇମେଜ ଜେନେରେସନ ଟୁଲ କାମ କରୁଛି, ଯାହା ସଠିକ ଓ ବିସ୍ତୃତ ଫଟୋ ତିଆରି କରିପାରୁଛି। ଏହି ଘଟଣା ପରେ ଏକ ପ୍ରଶ୍ନ ଉଠିଛି ଯେ ଚାଟଜିପିଟି ଏହି ଆଧାର କାର୍ଡ ତିଆରି ପାଇଁ ଡାଟା କେଉଁଠାରୁ ପାଇଲା? କିଛି ସୋସିଆଲ ମିଡିଆ ବ୍ୟବହାରକାରୀ ଏହାକୁ ନେଇ ଚିନ୍ତା ପ୍ରକାଶ କରିଛନ୍ତି ଓ ଏଆଇର ନିୟନ୍ତ୍ରଣ ପାଇଁ ଦାବି କରିଛନ୍ତି। ଏହା ସତ୍ତ୍ୱେ ଓପନଏଆଇ ଏ ବିଷୟରେ କୌଣସି ସ୍ପଷ୍ଟ ମନ୍ତବ୍ୟ ଦେଇନାହିଁ।
ଆଧାର କାର୍ଡ ଭାରତର ଏକ ଗୁରୁତ୍ୱପୂର୍ଣ୍ଣ ପରିଚୟ ପତ୍ର ଓ ଏହାର ନକଲି ତିଆରି ଗମ୍ଭୀର ସମସ୍ୟା ସୃଷ୍ଟି କରିପାରେ। ଏହି ପରିପ୍ରେକ୍ଷୀରେ ଏଆଇ ଟୁଲଗୁଡିକ ସୁରକ୍ଷିତ ବ୍ୟବହାର ଓ ନିୟନ୍ତ୍ରଣ ଉପରେ ଆଲୋଚନା ଜୋର ଧରିଛି।