ନୂଆଦିଲ୍ଲୀ,୬।୯: ସରକାର କର୍ମଚାରୀମାନଙ୍କୁ ବଡ଼ ରିଲିଫ ଦେଇ ଇମ୍ପ୍ଲୋୟୀଜ୍ ପ୍ରୋଭିଡେଣ୍ଟ ଫଣ୍ଡ ଅର୍ଗାନାଇଜେସନ (ଇପିଏଫ୍ଓ) ପେନସନ ନିୟମରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛନ୍ତି। ଏବେ ଯଦି ଜଣେ କର୍ମଚାରୀ ମାତ୍ର ୧ ମାସ ବି ଚାକିରି କରନ୍ତି, ତେବେ ସେ ଇମ୍ପ୍ଲୋୟୀସ ପେନସନ ସ୍କିମ (ଇପିଏସ୍) ଅଧୀନରେ ଲାଭ ପାଇବେ। ଏହି ସଂଶୋଧନ ବିଶେଷକରି ସେହି ଯୁବକ ଏବଂ ଅସ୍ଥାୟୀ କର୍ମଚାରୀମାନଙ୍କ ପାଇଁ ଉପଯୋଗୀ, ଯେଉଁମାନେ ବିପିଓ, ଲଜିଷ୍ଟିକ୍ସ, ଇ-କମର୍ସ ଏବଂ ଚୁକ୍ତି ଆଧାରିତ ଚାକିରିରେ କାମ କରନ୍ତି।
ପୂର୍ବରୁ ନିୟମ ଥିଲା ଯେ, ଯଦି ଜଣେ ବ୍ୟକ୍ତି ୬ ମାସରୁ କମ ସମୟ ଚାକିରି କରୁଥିଲେ, ତାଙ୍କର ପେନସନ ଅବଦାନକୁ ଗଣନା କରାଯାଉ ନ ଥିଲା। ଅର୍ଥାତ ତାଙ୍କର ପେନସନ ଅଂଶ ନଷ୍ଟ ହୋଇଯାଉଥିଲା। କିନ୍ତୁ ଏବେ ନୂଆ ନିୟମରେ ପରିବର୍ତ୍ତନ କରାଯାଇଛି। ଏବେ ମାତ୍ର ୧ ମାସ ଚାକିରି କରିବା ପରେ ମଧ୍ୟ କର୍ମଚାରୀ ଇପିଏସ ଅଧୀନରେ ଆସିବେ ଏବଂ ଭବିଷ୍ୟତରେ ପେନସନ ପାଇବା ପାଇଁ ହକଦାର ହେବେ।
ଏହି ନିୟମ ସେହି ସେକ୍ଟରର କର୍ମଚାରୀମାନଙ୍କ ପାଇଁ ସବୁଠାରୁ ଅଧିକ ଉପଯୋଗୀ ହେବ, ଯେଉଁଠାରେ ଚାକିରିର ଅବଧି ବେଶି ଦିନ ନ ଥାଏ। ବିପିଓ, ଲଜିଷ୍ଟିକ୍ସ, ଇ-କମର୍ସ ଏବଂ ଚୁକ୍ତି ଆଧାରିତ କାର୍ଯ୍ୟରେ ଅଧିକାଂଶ କର୍ମଚାରୀ ଶୀଘ୍ର ଚାକିରି ଛାଡ଼ି ଦିଅନ୍ତି। ପୂର୍ବରୁ ତାଙ୍କର ପେନସନ ଅବଦାନ ନଷ୍ଟ ହୋଇଯାଉଥିଲା, କିନ୍ତୁ ଏବେ ଏହା ତାଙ୍କ ଖାତାରେ ସୁରକ୍ଷିତ ରହିବ ଏବଂ ଭବିଷ୍ୟତରେ ପେନସନ ଲାଭ ମିଳିବ।
କର୍ମଚାରୀମାନେ ନିଜର ଇପିଏଫ୍ ପାସବୁକ ମାଧ୍ୟମରେ ଯାଞ୍ଚ କରିପାରିବେ ଯେ ତାଙ୍କ ଦରମାରୁ ଇପିଏସ୍ ଅବଦାନ ହେଉଛି କି ନାହିଁ। ଏହା ପାଇଁ ଇପିଏଫ୍ଓ ପାସବୁକ ପୋର୍ଟାଲରେ ଯାଇ ନିଜର ୟୁଏଏନ୍ (UAN) ଏବଂ ପାସୱାର୍ଡ ଦ୍ୱାରା ଲଗ୍ଇନ୍ କରିବାକୁ ହେବ। ପାସବୁକ୍ରେ ଇପିଏସ୍ ଅବଦାନର ସୂଚନା ମିଳିଯିବ।
ଯଦି ପାସବୁକ୍ରେ ଇପିଏସ୍ କାଟ୍ ଦେଖା ନ ଦେଉଛି କିମ୍ବା ପେନସନ୍ ଅବଦାନ ରେକର୍ଡ ହୋଇନାହିଁ, ତେବେ କର୍ମଚାରୀ ଅନଲାଇନ୍ ଅଭିଯୋଗ ଦାଖଲ କରିପାରିବେ। ଅଭିଯୋଗ ଦାଖଲ କରିବା ସମୟରେ ୨୦୨୪ ବର୍ଷର ଉଲ୍ଲେଖ କରିବାକୁ ହେବ। ଏହା ସୁନିଶ୍ଚିତ କରିବ ଯେ କର୍ମଚାରୀଙ୍କୁ ତାଙ୍କ ଅଧିକାର ଅନୁଯାୟୀ ପେନସନ ଲାଭ ମିଳିପାରିବ।