ଲଣ୍ଡନ,୬।୭: ପାକିସ୍ତାନ ବିପକ୍ଷ ସୀମିତ ଓଭର କ୍ରିକେଟ ସିରିଜ୍ ପାଇଁ ଦଳ ଘୋଷଣା କରିଛି ଇଂଲଣ୍ଡ କ୍ରିକେଟ ବୋର୍ଡ (ଇସିବି)। ନିୟମିତ ଦଳର ୩ ଖେଳାଳି ଓ ୪ ଷ୍ଟାଫ୍ ସଦସ୍ୟଙ୍କ ରିପୋର୍ଟ ପଜିଟିଭ ଆସିବା ପରେ ସିରିଜ୍ ଆରମ୍ଭ ହେବାର ଦୁଇ ଦିନ ପୂର୍ବରୁ ଇସିବିକୁ ଏଭଳି ପରିବର୍ତ୍ତନ କରିବାକୁ ପଡ଼ିଛି।
କାର୍ଡିଫଠାରୁ ଆରମ୍ଭ ହେବାକୁ ଥିବା ଦିନିକିଆ ସିରିଜ୍ ଲାଗି ବେନ ଷ୍ଟୋକ୍ସଙ୍କ ନେତୃତ୍ୱରେ ୧୮ ଜଣିଆ ଦଳ ଘୋଷଣା କରାଯାଇଛି। ଦଳରେ ୯ ନୂଆ ମୁହଁ ସ୍ଥାନ ପାଇଛନ୍ତି। ଶ୍ରୀଲଙ୍କା ବିପକ୍ଷ ଦିନିକିଆ ସିରିଜ୍ ଶେଷ ହେବା ପରେ ଇଂଲଣ୍ଡ ଖେଳାଳି ଓ ଷ୍ଟାଫ୍ ମେମ୍ବରଙ୍କ କୋଭିଡ୍ ଟେଷ୍ଟ କରାଯାଇଥିଲା।
ପଜିଟିଭ ଚିହ୍ନଟ ହୋଇଥିବା ଖେଳାଳିଙ୍କୁ ୟୁକେ ସରକାରଙ୍କ କ୍ୱାରେଣ୍ଟିନ ପ୍ରୋଟୋକଲ ଅନୁଯାୟୀ ଆଇସୋଲେଶନରେ ରହିବାକୁ ପଡ଼ିବ। ଦଳର ଅନ୍ୟ ସଦସ୍ୟଙ୍କୁ ମଧ୍ୟ ଆଇସୋଲେଟ୍ କରାଯିବ। କାରଣ ସେମାନେ ପଜିଟିଭ ଚିହ୍ନଟ ହୋଇଥିବା ଖେଳାଳିଙ୍କ ସିଧାସଳଖ ସମ୍ପର୍କରେ ଆସିଛନ୍ତି ବୋଲି ଇସିବି ପକ୍ଷରୁ ବିଜ୍ଞପ୍ତିରେ କୁହାଯାଇଛି। ଇଂଲଣ୍ଡ ଦଳ ପାକିସ୍ତାନ ବିପକ୍ଷରେ ୩ଟିକିଆ ଦିନିକିଆ ଓ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଖେଳିବାର ଅଛି। ଆଇପିଏଲରେ ଆହତ ହେବା ପରଠୁ ଅନ୍ତର୍ଜାତୀୟ କ୍ରିକେଟ ଖେଳି ନ ଥିବା ଅଲରାଉଣ୍ଡର ଷ୍ଟୋକ୍ସଙ୍କୁ ଦଳର ଅଧିନାୟକ କରାଯାଇଛି।