କାଲିଫର୍ନିଆ,୪।୧୨: ଏକ୍ସ ସିଇଓ ଏଲନ ମସ୍କ ଏକ୍ସରେ ଏକ ପୋଷ୍ଟ ଶେୟାର କରିଛନ୍ତି। ଏହି ପୋଷ୍ଟ ମାଧ୍ୟମରେ ଏଲନ ମସ୍କ ମେଟାର ଫେସବୁକ ଏବଂ ଇନଷ୍ଟାଗ୍ରାମ ତୁଳନାରେ ଏକ୍ସର ଅର୍ଗାନିକ୍ ଟ୍ରାଫିକ ଅଧିକ ବୋଲି କହିଛନ୍ତି। ଏହି ଦୁଇଟି ପ୍ଲାଟଫର୍ମରେ ଟ୍ରାଫିକ ପାଇଁ ମେଟା କେତେ ଟଙ୍କା ଖର୍ଚ୍ଚ କରୁଛି ସେ ମଧ୍ୟ କହିଛନ୍ତି। ଏଲନ ମସ୍କଙ୍କ ଦ୍ୱାରା ଶେୟାର କରାଯାଇଥିବା ଫଟୋ ଅନୁଯାୟୀ, ନଭେମ୍ବରରେ ଆମେରିକାରେ ଡେସ୍କଟପରେ ଏକ୍ସର ଟ୍ରାଫିକ ୬୫୦.୯ ମିଲିୟନ ଥିବାବେଳେ ମେଟାର ଫେସବୁକ ଏବଂ ଇନଷ୍ଟାଗ୍ରାମର ଟ୍ରାଫିକ ୪୯୬.୫ ଏବଂ ୫୨୦.୭ ମିଲିୟନ ଅଟେ। ଏହାର ଅର୍ଥ ହେଉଛି ଏକ୍ସରେ ଅଧିକ ଅର୍ଗାନିକ୍ ଟ୍ରାଫିକ ଅଛି।
ଏକ୍ସର ପେଡ ଟ୍ରାଫିକ ମାତ୍ର ୧୧୦୦ ଥିବାବେଳେ ଫେସବୁକ ଏବଂ ଇନଷ୍ଟାଗ୍ରାମର ଟ୍ରାଫିକ ୭୦୮.୪ ଏବଂ ୯୯.୯ ହଜାର ଅଟେ। ଏହାର ଅର୍ଥ ହେଉଛି ଏକ୍ସ ତୁଳନାରେ, ଏହି ପ୍ଲାଟଫର୍ମଗୁଡିକ ପେଡ ଟ୍ରାଫିକ ପାଇଁ ଅଧିକ ଅର୍ଥ ଖର୍ଚ୍ଚ କରନ୍ତି ଏବଂ ଏହି କାରଣରୁ କମ୍ପାନୀର ଟ୍ରାଫିକ ବଢିଥାଏ। ଏକ୍ସ ଟ୍ରାଫିକରେ କେବଳ ୧୪,୩୦୦ ଡଲାର (ପ୍ରାୟ ୧୧,୯୧,୯୪୯ ଟଙ୍କା) ଖର୍ଚ୍ଚ କରୁଥିବାବେଳେ ଫେସବୁକ ଏବଂ ଇନଷ୍ଟାଗ୍ରାମ ଯଥାକ୍ରମେ ୧.୧ ମିଲିୟନ ଡ଼ଲାର ଏବଂ ୧୦୫.୪ ହଜାର ଡଲାର ଖର୍ଚ୍ଚ କରିଛନ୍ତି। ସୋସିଆଲ ମିଡିଆ କମ୍ପାନୀଗୁଡିକ ଟଙ୍କା ମାଧ୍ୟମରେ ଗୁଗୁଲରୁ କିୱାର୍ଡ କିଣନ୍ତି, ଯାହା ଗୁଗଲ ବିଜ୍ଞାପନ ପେଜ୍ରେ ଦେଖାଯାଏ। ଏଠାରୁ ୟୁଜର ଓ୍ବେସାଇଟ୍ରେ ପହଞ୍ଚନ୍ତି।
ଅନେକ କମ୍ପାନୀ ଆଉ ଏକ୍ସରେ ବିଜ୍ଞାପନ ଦେବାକୁ ପସନ୍ଦ କରୁ ନାହାନ୍ତି। ଡିଜ୍ନୀ, ଆଇବିଏମ, ୱାର୍ଣ୍ଣର ବ୍ରଦର୍ସ ଏବଂ ଡିସକଭରୀ ପରି କମ୍ପାନୀଗୁଡିକ ଏକ୍ସ ପ୍ଲାଟଫର୍ମରେ ସେମାନଙ୍କର ଦେୟଯୁକ୍ତ ବିଜ୍ଞାପନ ଅଭିଯାନ ପ୍ରତ୍ୟାହାର କରି ନେଇଛନ୍ତି। ଏନେଇ ମସ୍କ କହିଛନ୍ତି , ମୁଁ ଚାହେଁ ନାହିଁ ଯେ ସେମାନେ ବିଜ୍ଞାପନ ଦିଅନ୍ତୁ, ଯଦି କେହି ମୋତେ ବିଜ୍ଞାପନ ଟଙ୍କା ଦେଇ ବ୍ଲାକମେଲ କରିବାକୁ ଯାଉଛନ୍ତି, ତେବେ ନିଜେ ପଳାନ୍ତୁ।