ଜି.ଉଦୟଗିରି/ରାଇକିଆ,୧୪/୩(ଚିନ୍ମୟ କୁମାର ସେଠୀ/ପ୍ରଦୀପ ବେହେରା): କନ୍ଧମାଳ ଜିଲା ଜି.ଉଦୟଗିରି ଓ ରାଇକିଆ ବ୍ଲକରେ ହାତୀ ଉପଦ୍ରବକୁ ନେଇ ଆତଙ୍କ ଦେଖା ଦେଇଛି । ଗତ କାଲି ସନ୍ଧ୍ୟାରୁ ଆଜି ସକାଳ ଅର୍ଥାତ୍ ୧୨ ଘଣ୍ଟା ମଧ୍ୟରେ ତିନି ଜଣଙ୍କ ଜୀବନ ନେଇଛି ଦନ୍ତା ହାତୀ। ଗତକାଲି ସନ୍ଧ୍ୟାରେ ରାଇକିଆ ବ୍ଲକର ପେଟାପାଙ୍ଗା ଗ୍ରାମ ଡଡା ପାହାଡ଼ର ଗୁମିକିଆ ଜଙ୍ଗଲରେ ହାତୀ ଆକ୍ରମଣରେ ଦୁଇ ଜଣ ଗ୍ରାମବାସୀ ମୃତ୍ୟୁବରଣ କରିଥିଲେ। ଗ୍ରାମବାସୀ କୀର୍ତ୍ତନ ବଗର୍ତ୍ତୀ ଓ ବାମଦେବ ପ୍ରଧାନ ଜଙ୍ଗଲକୁ ଯାଇଥିଲେ। ନିଜ କାମ ସାରି ଫେରୁଥିବା ବେଳେ ହଠାତ ହାତୀ ଆକ୍ରମଣ କରିଥିଲା। ଯାହା ଫଳରେ ହାତୀ ଦଳା ଚକଟାରେ ଉଭୟଙ୍କ ମୃତ୍ୟୁ ହୋଇଥିଲା । ଆଜି ସକାଳୁ ହାତୀ ହାବୁଡରେ ପଡ଼ି ପୁଣି ଜଣଙ୍କର ମୃତ୍ୟୁ ହୋଇଥିବା ଦେଖିବାକୁ ମିଳିଛି।
ପାବୁରିଆ ସରପଞ୍ଚ ସଞ୍ଜୟ ନାୟକଙ୍କ ସୂଚନା ଅନୁସାରେ, ରାତି ୩.୩୦ ମିନିଟରେ ହାତୀକୁ ମାଲେରିମାହାଠାରେ ଦେଖିଥିଲେ ପ୍ରାୟ ଭୋର ୪ ଟା ବେଳେ ସିଂଦିରିଗୁଡା଼ ଗ୍ରାମ ନିକଟ ଦାନୀପାଙ୍ଗା ଜଙ୍ଗଲରେ ହାତୀ ଜଣକୁ ମାରିଥିବା ଥିବା ସୂଚନା ପାଇଥିଲେ। ମୃତକ ହେଲେ ପାବୁରିଆ ପଞ୍ଚାୟତ ନେଡିନାଯୁ ଗ୍ରାମର କଳାନିଧି ପ୍ରଧାନଙ୍କ ପୁଅ ଦୁରି ପ୍ରଧାନ(୨୭)। ଘଟଣାସ୍ଥଳରେ ଶବ ପଡ଼ିଥିଲେ ମଧ୍ୟ ପୋଲିସ କିମ୍ବା ବନ ବିଭାଗ ଅଧିକାରୀ ପହଁଞ୍ଚି ନାହଁନ୍ତି। ଗତକାଲିଠାରୁ ଅଞ୍ଚଳରେ ହାତୀ ମଣିଷ ଆକ୍ରମଣ କରୁଥିଲେ ମଧ୍ୟ ବନ ବିଭାଗ ତରଫରୁ କୌଣସି ପ୍ରକାର ଡାକବାଜି ମାଧ୍ୟମରେ ସଚେତନତା କରାଯାଇନାହିଁ, ଯାହାକୁ ନେଇ ଉଦବେଗ ପ୍ରକାଶ କରିଥିଲେ। ଜଙ୍ଗଲରେ ହାତୀ ଉପସ୍ଥିତି ବିଷୟ ଲୋକେ ଅବଗତ ନ ଥିବା ଫଳରେ ଲୋକେ ଜଙ୍ଗଲକୁ ଯାଉଛନ୍ତି ଓ ମୃତ୍ୟୁବରଣ କରୁଛନ୍ତି। ପ୍ରଶାସନ ଏହି ହାତୀ ଘଉଡ଼ାଇବା ନେଇ ଦୃଢ଼ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି।