ଭୁବନେଶ୍ୱର,୨୪।୯ (ସୂର୍ଯ୍ୟକାନ୍ତ ବେହେରା): ଇଷ୍ଟର୍ଣ୍ଣ ମିଡିଆ ଲିମିଟେଡ୍ର ଦୈନିକ ଖବରକାଗଜ ସମ୍ବାଦରେ କର୍ମଚାରୀଙ୍କ ନାମରେ ଜାଲିଆତି କରି ବ୍ୟାଙ୍କରୁ ଋଣ ଉଠାଣ ମାମଲାରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଶନିବାର ୩ ଅଭିଯୋଗକାରୀଙ୍କ ବୟାନ ରେକର୍ଡ କରିଛି। ସିଆର୍ପିସିର ୧୬୪ ଦଫା ଅନୁଯାୟୀ ଏହି ବୟାନ ରେକର୍ଡ ହୋଇଛି। ମାମଲାରେ ବର୍ତ୍ତମାନ ସୁଦ୍ଧା ୨୪ ଜଣ ଅଭିଯୋଗ କରିଛନ୍ତି। ତଦନ୍ତ ସମୟରେ ଜାଲିଆତିର ପ୍ରମାଣ ମିଳିଥିବା ଇଓଡବ୍ଲ୍ୟୁ ପକ୍ଷରୁ କୁହାଯାଇଛି। ଋଣ ପାଇବା ପାଇଁ ସମ୍ବାଦ କର୍ମଚାରୀଙ୍କ ଦରମା ପରିମାଣକୁ ଏପଟସେପଟ କରାଯିବା ସହ ଇଏସ୍ଆଇ ଏବଂ ଇପିଏଫ୍ ବାବଦ ଟଙ୍କା ଠିକ୍ରେ ଜମା ହେଉ ନ ଥିବା ଅଭିଯୋଗ ହୋଇଥିଲା। ଏନେଇ ଇଓଡବ୍ଲ୍ୟୁ ଅଧିକାରୀମାନେ ଶନିବାର ଇଏସ୍ଆଇ ଓ ଇପିଏଫ୍ କାର୍ଯ୍ୟାଳୟକୁ ଯାଇ ଖୋଳତାଡ଼ କରିଛନ୍ତି। ଅନ୍ୟପକ୍ଷରେ ଉତ୍କଳ ଗ୍ରାମ୍ୟ ବ୍ୟାଙ୍କ ମଧ୍ୟ ବିଭାଗୀୟ ତଦନ୍ତ ଆରମ୍ଭ କରିଥିବା ଜଣାପଡ଼ିଛି।