ଧର୍ମଶାଳା,୨୯।୧(ଶିବ ପ୍ରସାଦ ମହାନ୍ତି ): ଯାଜପୁର ଜିଲା ରସୁଲପୁର ବ୍ଲକ କଲଣ ପଞ୍ଚାୟତ ନୂଆହାଟ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବରୁ ବିଦ୍ୟାଳୟ ମୁଖ୍ୟ ଫାଟକରେ ତାଲା ପକାଇ ଅବିଭାବକ ଓ ଛାତ୍ରୀଛାତ୍ର ଧାରଣାରେ ବସିଛନ୍ତି। ସୂଚନା ମୁତାବକ ବିଦ୍ୟାଳୟରେ ୫ଟି ଶ୍ରେଣୀରେ ମୋଟ ୧୬୧ ଛାତ୍ରୀଛାତ୍ର ପାଇଁ ଏବେ ମାତ୍ର ୨ ଜଣ ଶିକ୍ଷକ ରହିଛନ୍ତି। ସେମାନଙ୍କ ମଧ୍ୟରୁ ଜଣେ ଶିକ୍ଷକ ଏସଆଇଆର୍ ପାଇଁ କାର୍ଯ୍ୟ କରୁଥିବାବେଳେ ଆଉ ମାତ୍ର ଜଣେ ଶିକ୍ଷକ ୧୬୧ ଛାତ୍ରୀଛାତ୍ରୀଙ୍କୁ କିପରି ପାଠ ପଢ଼ାଇବେ ବୋଲି ଅଭିଯୋଗ କରିଛନ୍ତି ଅବିଭାବକ। ସେପଟେ ବ୍ଲକ ଶିକ୍ଷାଧିକାରୀ ସୁଦର୍ଶନ ମଳିକ କହିଛନ୍ତି , ସ୍କୁଲରେ ତିନି ଜଣ ଶିକ୍ଷକ ଅଛନ୍ତି । ଜଣେ ଏସଆଇଆର୍ ପାଇଁ କାର୍ଯ୍ୟ କରୁଛନ୍ତି ତଥାପି ଆଉ ଜଣେ ଶିକ୍ଷକ ଆଜି ଅପରାହ୍ନ ସୁଦ୍ଧା ସେଠାରେ କାର୍ଯ୍ୟ କରିବା ପାଇଁ ଯୋଗଦାନ କରିବେ ବୋଲି କହିଛନ୍ତି। ତେବେ ଅବିଭାବକମାନଙ୍କୁ ଏହି ପ୍ରତିଶ୍ରୁତି ଦେଇ ଅନୁରୋଧ କରିବା ପରେ ସେମାନେ ଧାରଣାରୁ ଉଠିଥିବା ଜଣାପଡିଛି।