ତେହେରାନ/ୱାଶିଂଟନ,୯।୭: ଇରାନର ସର୍ବୋଚ୍ଚ ନେତା ଆୟାତୁଲ୍ଲା ଖାମେନେଇଙ୍କ ଘନିଷ୍ଠ ପରାମର୍ଶଦାତା ଜାଭାଦ ଲାରିଜାନୀ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଜୀବନ ନେଇ ଖୋଲାଖୋଲି ଧମକ ଦେଇଛନ୍ତି। ଲାରିଜାନୀ କହିଛନ୍ତି, ଟ୍ରମ୍ପ ଯେତେବେଳେ ତାଙ୍କ ଫ୍ଲୋରିଡାସ୍ଥିତ ବିଳାସପୂର୍ଣ୍ଣ ବାସଭବନ ମାର-ଏ-ଲାଗୋରେ ସୂର୍ଯ୍ୟକିରଣରେ ଶୋଇଥାଆନ୍ତି, ସେତେବେଳେ ଏକ ଛୋଟ ଡ୍ରୋନ ତାଙ୍କ ଉପରେ ଆକ୍ରମଣ କରିପାରେ। ଇରାନ ଇଣ୍ଟରନ୍ୟାସନାଲ ସୂତ୍ର ଅନୁସାରେ, ଲାରିଜାନୀ ଏକ ଟେଲିଭିଜନ ସାକ୍ଷାତକାରରେ କହିଛନ୍ତି, “ଟ୍ରମ୍ପଙ୍କ କାର୍ଯ୍ୟ ତାଙ୍କୁ ଏକ ଲକ୍ଷ୍ୟସ୍ଥଳରେ ପରିଣତ କରିଛି। ତାଙ୍କୁ ଗୁଳି କରିବା ବା ଡ୍ରୋନ ଆକ୍ରମଣ କରିବା ବହୁତ ସହଜ।”
ଏହି ଧମକ ଏକ ସମୟରେ ଆସିଛି ଯେତେବେଳେ ‘ବ୍ଲଡ ପ୍ୟାକ୍ଟ’ ବା ‘ଆହଦେ ଖୁନ’ ନାମକ ଏକ ଅନଲାଇନ ପ୍ଲାଟଫର୍ମ ଖାମେନେଇଙ୍କ ଅପମାନ ଓ ତାଙ୍କ ଜୀବନକୁ ବିପଦରେ ପକାଉଥିବା ଲୋକଙ୍କ ବିରୁଦ୍ଧରେ ‘ପ୍ରତିଶୋଧ’ ପାଇଁ ଅର୍ଥ ସଂଗ୍ରହ କରୁଛି। ଏହି ପ୍ଲାଟଫର୍ମ ଦାବି କରିଛି ଯେ ଏହା ଏପର୍ଯ୍ୟନ୍ତ ୨୭ ମିଲିୟନ ଡଲାରରୁ ଅଧିକ ଅର୍ଥ ସଂଗ୍ରହ କରିସାରିଛି ଏବଂ ଏହାର ଲକ୍ଷ୍ୟ ୧୦୦ ମିଲିୟନ ଡଲାର ଜମା କରିବା। ପ୍ଲାଟଫର୍ମରେ ପ୍ରକାଶିତ ଏକ ବିବୃତିରେ କୁହାଯାଇଛି, “ଆମେ ସେମାନଙ୍କୁ ଇନାମ ଦେବୁ ଯେଉଁମାନେ ଆଲ୍ଲାଙ୍କ ଶତ୍ରୁ ଓ ଖାମେନେଇଙ୍କ ଜୀବନକୁ ବିପଦରେ ପକାଉଥିବା ଲୋକଙ୍କୁ ନ୍ୟାୟ ଆଣିବେ।”
ଇରାନର ରିଭୋଲ୍ୟୁସନାରୀ ଗାର୍ଡସ ସହ ଜଡ଼ିତ ଫାର୍ସ ନ୍ୟୁଜ ଏଜେନ୍ସି ଏହି ଅଭିଯାନର ଆରମ୍ଭକୁ ସମର୍ଥନ କରିଛି ଏବଂ ଧାର୍ମିକ ସମୂହମାନଙ୍କୁ ପଶ୍ଚିମୀ ଦେଶମାନଙ୍କ ଦୂତାବାସ ଓ ସହରର ମୁଖ୍ୟ ସ୍ଥାନମାନଙ୍କରେ ବିକ୍ଷୋଭ ପ୍ରଦର୍ଶନ କରିବାକୁ ଆହ୍ୱାନ ଦେଇଛି। ଏହା ସହିତ, ଟ୍ରମ୍ପ ଓ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ବିରୋଧରେ ‘ମୋହାରେବେହ’ (ଆଲ୍ଲାଙ୍କ ବିରୁଦ୍ଧରେ ଯୁଦ୍ଧ) ଭଳି ଇସଲାମିକ ଆଇନ ଲାଗୁ କରିବା ଉଚିତ ବୋଲି କୁହାଯାଇଛି। ଇରାନୀ ଆଇନରେ ‘ମୋହାରେବେହ’ ଏକ ଗୁରୁତର ଅପରାଧ ଯାହାର ଶାସ୍ତି ମୃତ୍ୟୁଦଣ୍ଡ।
ରାନର ନୂତନ ରାଷ୍ଟ୍ରପତି ମସୁଦ ପେଜେଶକିୟାନ ଆମେରିକୀୟ ସାମ୍ବାଦିକ ଟକର କାର୍ଲସନଙ୍କ ସହ କଥାବାର୍ତ୍ତାରେ କହିଛନ୍ତି ଯେ ଏହି ‘ଫତୱା’ ସରକାର ବା ଖାମେନେଇଙ୍କ ନୁହେଁ। କିନ୍ତୁ ଖାମେନେଇଙ୍କ ଅଧୀନରେ ପରିଚାଳିତ ‘କାୟହାନ’ ଖବରକାଗଜ ଏହି ବୟାନକୁ ଖାରଜ କରି ଲେଖିଛି, “ଏହା କୌଣସି ଶୈକ୍ଷିକ ମତ ନୁହେଁ, ବରଂ ଧର୍ମର ରକ୍ଷା ପାଇଁ ଏକ ଧାର୍ମିକ ଆଦେଶ।” ଖବରକାଗଜ ଚେତାବନୀ ଦେଇଛି ଯେ ଭବିଷ୍ୟତରେ ଯଦି କେହି ଏପରି ‘ଅଗ୍ନିକାଣ୍ଡ’ ସୃଷ୍ଟି କରେ, ତାହାର ପରିଣାମ ଭୟଙ୍କର ହେବ। ଲେଖାର ଶେଷରେ କୁହାଯାଇଛି, “ଇସଲାମିକ ରିପବ୍ଲିକ ଇସ୍ରାଏଲକୁ ରକ୍ତରେ ବୁଡ଼ାଇ ଦେବ।”
ଇରାନର ପୂର୍ବତନ ସାଂସଦ ଗୋଲାମଅଲୀ ଜାଫରଜାଦେ ଇମେନାବାଦୀ କାୟହାନର ମନୋଭାବକୁ ସମାଲୋଚନା କରି କହିଛନ୍ତି, “ମୋତେ ବିଶ୍ୱାସ ହେଉନାହିଁ ଯେ କାୟହାନର ସମ୍ପାଦକ ଶାରିୟତମଦାରୀ ଇରାନୀ। ଟ୍ରମ୍ପଙ୍କ ହତ୍ୟା କଥା କହିବା ଇରାନୀ ଜନତାଙ୍କ ଉପରେ ଚାପ ବଢ଼ାଇବ।” ଏହାର ଜବାବରେ କାୟହାନ ଲେଖିଛି, “ଆଜି ଟ୍ରମ୍ପଙ୍କଠାରୁ ପ୍ରତିଶୋଧ ନେବା ଏକ ଜାତୀୟ ଦାବି ହେଉଛି। ଇମେନାବାଦୀଙ୍କ ବୟାନ ଇରାନୀ ମୂଲ୍ୟବୋଧ ସହ ମେଳ ଖାଉନାହିଁ।”
୨୦୨୦ରେ ଇରାକରେ ଇରାନୀ ଜେନେରାଲ କାସିମ ସୁଲେମାନୀଙ୍କ ହତ୍ୟା ନେଇ ଟ୍ରମ୍ପଙ୍କ ଆଦେଶ ପରେ ସେ ନିରନ୍ତର ଇରାନୀ ଆକ୍ରମଣର ନିଶାନାରେ ରହିଛନ୍ତି। ଗତ ବର୍ଷ ଆମେରିକୀୟ ଏଜେନ୍ସିମାନେ ଖୁଲାସା କରିଥିଲେ ଯେ ଇରାନର ରିଭୋଲ୍ୟୁସନାରୀ ଗାର୍ଡସ ଟ୍ରମ୍ପଙ୍କ ହତ୍ୟା ପାଇଁ ଷଡ଼ଯନ୍ତ୍ର କରିଥିଲା।