ନୂଆଦିଲ୍ଲୀ,୧୫।୨: ହ୍ବାଇଟ ହାଉସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ହୋଇଥିବା ବୈଠକରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଏହି ନିଷ୍ପତ୍ତିଗୁଡ଼ିକ ମଧ୍ୟରେ, ଆମେରିକାରୁ ଆମଦାନି ହେଉଥିବା ବର୍ବନ ହ୍ବିସ୍କି ପାଇଁ ମଧ୍ୟ ଏକ ପ୍ରମୁଖ ନିଷ୍ପତ୍ତି ନିଆଯାଇଛି। ଭାରତ ବର୍ବନ ହ୍ବିସ୍କି ଉପରେ ଟାରିଫ୍ ୧୫୦ ପ୍ରତିଶତରୁ ୧୦୦ ପ୍ରତିଶତକୁ ହ୍ରାସ କରିଛି।
ଗୋଟିଏ ପଟେ, ଭାରତର ଏହି ନିଷ୍ପତ୍ତି ଆମେରିକାର ଅନେକ ବଡ଼ ବର୍ବନ ହ୍ବିସ୍କିି ବ୍ରାଣ୍ଡକୁ ଲାଭ ଦେବ। ସେହି ସମୟରେ ଭାରତରେ ମହଙ୍ଗା ମଦ ପ୍ରେମୀମାନଙ୍କ ପାଇଁ ଏହା ଏକ ଭଲ ଖବର ବୋଲି ବିବେଚନା କରାଯାଇପାରେ। ଏବେ ମଦ ପ୍ରେମୀମାନେ ପୂର୍ବ ଅପେକ୍ଷା କମ ମୂଲ୍ୟରେ ବର୍ବନ ହ୍ବିସ୍କି ପାଇପାରିବେ।
ଏକ ରିପୋର୍ଟ ଅନୁଯାୟୀ, ରାଷ୍ଟ୍ରପତି ଟ୍ରମ୍ପ ଆମେରିକୀୟ ଉତ୍ପାଦଗୁଡ଼ିକ ଉପରେ ବିଶେଷକରି ମଦ୍ୟପାନ କ୍ଷେତ୍ରରେ, ଉଚ୍ଚ ଟାରିଫ୍ ଲଗାଯାଉଥିବା ନେଇ ଭାରତକୁ ସମାଲୋଚନା କରିଥିଲେ। ଏହି ନିଷ୍ପତ୍ତି ପରେ ଅନେକ ଆମେରିକୀୟ ହ୍ବିସ୍କି ବ୍ରାଣ୍ଡ ଭାରତରୁ ଲାଭ ପାଇବାର ସମ୍ଭାବନା ବଢ଼ିଯାଇଛି।
କେନ୍ଦ୍ର ସରକାରଙ୍କ ଘୋଷଣା ଅନୁଯାୟୀ, ବର୍ବନ ହ୍ବିସ୍କି ଉପରେ ମୌଳିକ ସୀମା ଶୁଳ୍କ ଏବେ ୫୦ ପ୍ରତିଶତ ହେବ ଏବଂ ଅତିରିକ୍ତ ୫୦ ପ୍ରତିଶତ ଲେଭି ସହିତ, ମୋଟ ୧୦୦ ପ୍ରତିଶତ ରହିବ। ପୂର୍ବରୁ, ବର୍ବନ ହ୍ବିସ୍କି ଆମଦାନୀ ଉପରେ ୧୫୦ ପ୍ରତିଶତ ଭାରୀ ଟିକସ ଥିଲା।