ନନ୍ଦପୁର,୮।୩ (ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ ୨୩ ପଞ୍ଚାୟତ, ସେମିଳିଗୁଡା ବ୍ଲକର ୪ ଓ ଲମତାପୁଟ ବ୍ଲକର ୪ ପଞ୍ଚାୟତବାସୀ ପାଇଁ ଥିବା ୫ ଟାଙ୍କି ଓ ୨ ଡିପୋରେ ଶନିବାର ପେଟ୍ରୋଲ,ଡିଜେଲ ଓ ଗ୍ୟାସ ନ ଥିବାରୁ ଖାଉଟିଙ୍କ ମଧ୍ୟରେ ଭାଳେଣୀ ସୃଷ୍ଟି କରିଛି। ଗାଡ଼ି ଚାଳକ, ମାଲିକ ଓ ଖାଉଟି ହଇରାଣ ହେଉଥିବା ଦେଖିବାକୁ ମିଳିଛି। ମଧ୍ୟପ୍ରାଚ୍ୟରେ ଯୁଧ୍ୟ ଚାଲିଥିବାରୁ ପେଟ୍ରୋଲ ଡିଜେଲ ଦର ବଢିବ ବୋଲି ଲୋକେ ଆଶଙ୍କା କରିଛନ୍ତି। ଶନିବାର ଗ୍ୟାସ ଦର ବଢ଼ିଛି। ଏଥିଯୋଗୁ ଟାଙ୍କି ଓ ଡିପୋ ମାଲିକମାନେ ତେଲ ଓ ଗ୍ୟାସ ନ ଥିବା ଦର୍ଶାଇ ବନ୍ଦ ରଖିଥିବା ଲୋକେ କହିଛନ୍ତି। ନନ୍ଦପୁର ବ୍ଲକ ସଦରସ୍ଥିତ ୨ ଏଚ୍ପି ଓ ଇଣ୍ଡିଆନ ଅଏଲ ଟାଙ୍କି, ଗାଲଗାଡ଼ା ଇଣ୍ଡିଆନ ଅଏଲ, ଭେଜା ଇଣ୍ଡିଆନ ଅଏଲ ଓ ପାଡୁଆ ଏଚପି ଟାଙ୍କିରେ ତେଲନଥିବାରୁ ଟାଙ୍କି ଗୁଡ଼ିକ ବନ୍ଦ ପଡିଛି। ନନ୍ଦପୁର ଏଚ୍ପି ଓ ପାଡୁଆ ଇଣ୍ଡିଆନ ଗ୍ୟାସ ଡିପୋ ମଧ୍ୟ ଷ୍ଟକ ନ ଥିବା ଦର୍ଶାଇ ବନ୍ଦ ରହିଥିବାରୁ ଲୋକେ ହଇରାଣ ହେଉଛନ୍ତି। ଟାଙ୍କି ମାଲିକଙ୍କୁ ପଚାରିବାରୁ ଜଟଣୀ ଓ ଝାରସୁଗୁଡ଼ାର ଇଣ୍ଡିଆନ ଅଏଲ ଏବଂ ପାରାଦୀପର ଏଚପି ତେଲ ଡିପୋରେ କୌଣସି ଅସୁବିଧା ଥିବାରୁ ତେଲ ଆସିନାହିଁ। ଯାହା ଥିଲା ବିକ୍ରି ସରିଥିବା କହିଛନ୍ତି। ଶନିବାର ମଧ୍ୟରାତ୍ରୀ ସୁଧା ସମସ୍ତ ଟାଙ୍କିରେ ପେଟ୍ରୋଲ ଡିଜେଲ ପହଞ୍ଚିବ। ଟାଙ୍କିରେ ତେଲ ବିକ୍ରି ସ୍ବାଭାବିକ ହେବ ବୋଲି ସୂଚନା ଦେଇଛନ୍ତି। ୨ ଗ୍ୟାସ ଡିପୋରୁ କୌଣସି ସୂଚନା ମିଳିପାରି ନାହିଁ।