ମୁମ୍ବାଇ: ଅଭିନେତା ରଣବୀର ସିଂଙ୍କୁ ଧମକ। ଘର ବାହାରେ ବଢ଼ାଗଲା ସୁରକ୍ଷା। କିଛି ଏଭଳି ଖବରକୁ ନେଇ ବଲିଉଡରେ ହଇଚଇ ସୃଷ୍ଟି ହୋଇଛି। ସୂଚନା ପ୍ରକାରେ ଅଭିନେତାଙ୍କୁ କୋଟି କୋଟି ଟଙ୍କା ଦାବି କରି ଏକ ମେସେଜ୍ ମିଳିଛି। ହ୍ବାଟ୍ସଆପ୍ ଭଏସ୍ ନୋଟ୍ରେ ଏଭଳି କିଛି ଧମକ ପାଇବା ପରେ ସେ ମୁମ୍ବାଇ ପୋଲିସକୁ ଜଣାଇଥିଲେ। ଘଟଣାର ଗମ୍ଭୀରତାକୁ ଦେଖି ପୋଲିସ ତୁରନ୍ତ ରଣବୀର ସିଂ ଏବଂ ଦୀପିକା ପାଦ୍ୟୁକୋନ୍ଙ୍କ ଘରର ସୁରକ୍ଷା ବଢ଼ାଇ ଦେଇଛି। ଏଥିସହ ଅଭିଯୁକ୍ତଙ୍କୁ ଖୋଜିବା ଆରମ୍ଭ କରିଛି।
କହିବାକୁ ଗଲେ ବଲିଉଡ କଳାକାରମାନଙ୍କୁ ଏଭଳି ଧମକପୂର୍ଣ୍ଣ ମେସେଜ ମିଳିବା ନୂଆ କଥା ନୁହେଁ। ସଲମାନ ଖାନଙ୍କୁ ଅନେକ ଥର ଏଭଳି ଧମକ ମିଳିଛି। କାନାଡ଼ାରେ କପିଲ ଶର୍ମାଙ୍କ କାଫେରେ ମଧ୍ୟ ଗୁଳିକାଣ୍ଡ ହୋଇଛି। କିଛିଦିନ ପୂର୍ବରୁ, ଫିଲ୍ମ ନିର୍ଦ୍ଦେଶକ ରୋହିତ ସେଟ୍ଟୀଙ୍କ ଘର ବାହାରେ ଗୁଳିକାଣ୍ଡ ହୋଇଥିଲା। ପୋଲିସ ଏହି ଘଟଣାରେ ଅନେକ ଲୋକଙ୍କୁ ଅଟକ ରଖିଥିଲା। ଲରେନ୍ସ ବିଷ୍ନୋଇ ଗ୍ୟାଙ୍ଗ ଗୁଳିକାଣ୍ଡ ପାଇଁ ଦାୟୀ ବୋଲି କହିଥିଲା। ଏହି ଘଟଣା ମନରୁ ନ ଲିଭୁଣୁ ରଣବୀରଙ୍କୁ ଏଭଳି ଧମ ମିଳିବ ଛନକା ବଢ଼ାଇଛି।
ରଣବୀର ସିଂହ ମୁମ୍ବାଇର ପ୍ରଭାଦେବୀର ବିଉ ମୋଣ୍ଡେ ବି ଟାୱାର ହାଉସିଂ ସୋସାଇଟିରେ ରୁହନ୍ତି। ଧମକପୂର୍ଣ୍ଣ ବାର୍ତ୍ତା ପାଇବା ପରେ ରଣବୀରଙ୍କ ଘର ବାହାରେ ସୁରକ୍ଷା ବୃଦ୍ଧି କରାଯିବା ପରେ, ସୋସାଇଟି ପରିଚାଳନା ପକ୍ଷରୁ ପୋଲିସ ଷ୍ଟେସନକୁ ଚିଠି ଲେଖାଯାଇଛି, ଯେଉଁଥିରେ ସୋସାଇଟି ପରିସରରେ ମୁତୟନ କରାଯାଇଥିବା ଘରୋଇ ସଶସ୍ତ୍ର ସୁରକ୍ଷା କର୍ମୀଙ୍କ ବିଷୟରେ ଚିନ୍ତା ପ୍ରକାଶ କରାଯାଇଛି।
Dharitri – Odisha’s No.1 Odia Daily