ଧର୍ମଶାଳା,୨୪।୯(ଶିବପ୍ରାସାଦ ମହାନ୍ତି ଧର୍ମଶାଳା): ଯାଜପୁର ଜିଲା ଧର୍ମଶାଳା ବ୍ଲକ କାର୍ଯ୍ୟଳୟ ମୂଖ୍ୟ ଗେଟ ସମ୍ମୁଖରେ ପାଣି ଜମି ରହୁଥିବା ଫଳରେ ଯାତାୟତରେ ସମସ୍ୟା ହେଉଥିବା ନେଇ ଧରିତ୍ରୀ ପୋର୍ଟାଲ ଏବଂ ଧରିତ୍ରୀ ଖବରକାଗଜରେ ଗତ ୨୧ତାରିଖରେ ଖବରପ୍ରକାଶ ପାଇଥିଲା। ଯାହା ଫଳରେ ବୁଧବାର ବ୍ଲକ ସମ୍ମୁଖରେ ଥିବା ଡ୍ରେନ ଗୁଡ଼ିକୁ ସଫା କରାଯିବା ସହ ଅଳିହା ଆବର୍ଜନାକୁ ଟ୍ରାକ୍ଟରରେ ଲୋଡ କରି ଅନ୍ୟତ୍ର ସ୍ଥାନକୁ ନିଆଯାଉଥିବା ଦେଖିବାକୁ ମିଳିଛି।
ବ୍ଲକ ଅଧୀନରେ ୪୫ଟି ପଞ୍ଚାଯତ ରହିଛି। ପ୍ରତ୍ୟେକ ଦିନ ବୃଦ୍ଧ ବୃଦ୍ଧାଠାରୁ ଆରମ୍ଭ କରି ମହିଳା ପର୍ଯ୍ୟନ୍ତ ଶହଶହ ଲୋକ ସେମାନଙ୍କ ସମସ୍ୟା ନେଇ ଏଠାକୁ ଆସିଥାନ୍ତି। ମାତ୍ର ବ୍ଲକ ନିଜେ ସମସ୍ୟା ଘେରରେ ଥିବାରୁ ଏହାର ସମାଧାନ କରିବା ସ୍ଥାନୀୟ ଲୋକେ ପ୍ରଶାସନ ପାଖେ ନିବେଦନ କରିଥିଲେ। ଜାରକା ଅଞ୍ଚଳରେ ଲକ୍ଷଲକ୍ଷ ଟଙ୍କା ଖର୍ଚ୍ଚ କରାଯାଇ ଡ୍ରେନେଜ ବ୍ୟବସ୍ଥା କରାଯାଇଥିଲେ ସୁଦ୍ଧା ସଠିକ ଭାବେ ସଫେଇ ଅଭାବରୁ ଏହା ପୋତି ହେବାସହ ରାସ୍ତା ଘାଟ ଉପରେ ପାଣି ଜମୁ ଥିବା ଦେଖିବାକୁ ମିଳୁଛି। ତେଣୁ ପ୍ରଶାସନ ପକ୍ଷରୁ ଏହା ଉପରେ ଦୃଷ୍ଟି ଦେବା ସହ ଏହାର ସ୍ଥାୟୀ ସମାଧାନ କରିବା ପାଇଁ ଦାବି ହୋଇଛି।