ଦିଲ୍ଲୀର ଦ୍ୱିତୀୟ ବିଜୟ

ଦୁବାଇ, ୨୬।୯-
ଯୁବ ଓପନର ପୃଥ୍ବୀ ଶ’ଙ୍କ ଦ୍ରୁତ ଅର୍ଦ୍ଧଶତକ ଏବଂ ବୋଲରଙ୍କ ଆକର୍ଷଣୀୟ ପ୍ରଦର୍ଶନ ବଳରେ ଦିଲ୍ଲୀ କ୍ୟାପିଟାଲ୍ସ ଶୁକ୍ରବାର ଅନୁଷ୍ଠିତ ଇଣ୍ଡିଆନ ପ୍ରିମିୟର ଲିଗ୍‌ ମ୍ୟାଚରେ ଚେନ୍ନାଇ ସୁପରକିଙ୍ଗ୍ସକୁ ୪୪ ରନରେ ପରାସ୍ତ କରିଛି। ଦିଲ୍ଲୀ ପକ୍ଷରୁ ୧୭୬ ରନର ବିଜୟ ଲକ୍ଷ୍ୟ ଧାର୍ଯ୍ୟ କରାଯାଇଥିବାବେଳେ ଚେନ୍ନାଇ ୨୦ ଓଭରରେ ୭ ଉଇକେଟ ହରାଇ ୧୩୧ ରନ କରି ପାରିଥିଲା। ଚଳିତ ଆଇପିଏଲରେ ୩ ମ୍ୟାଚରୁ ଚେନ୍ନାଇର ଏହା ଦ୍ୱିତୀୟ ପରାଜୟ। ଉଦ୍‌ଘାଟନୀ ମ୍ୟାଚରେ ମୁମ୍ବାଇ ଇଣ୍ଡିଆନ୍ସକୁ ହରାଇବା ପରେ ଦଳ କ୍ରମାଗତ ଦ୍ୱିତୀୟ ପରାଜୟ ବରଣ କରିଛି। ଅନ୍ୟପକ୍ଷରେ ନିଜର ପ୍ରଥମ ମ୍ୟାଚରେ କିଙ୍ଗ୍ସ ଇଲେଭେନ ପଞ୍ଜାବକୁ ସୁପର ଓଭରରେ ହରାଇଥିବା ଦିଲ୍ଲୀ କ୍ରମାଗତ ଦ୍ୱିତୀୟ ବିଜୟ ହାସଲ କରିଛି।
ସୁପରକିଙ୍ଗ୍ସ ସତର୍କତାର ସହ ଇନିଂସ ଆରମ୍ଭ କରିଥିଲେ ହେଁ ନିୟମିତ ବ୍ୟବଧାନରେ ଉଇକେଟ ହରାଇବାରୁ ବିପଦରେ ପଡ଼ିଥିଲା। ଦୁଇ ଓପନର ଶେନ ଓ୍ବାଟସନ ୧୪(୧୬ ବଲ, ୧ ଚୌକା, ୧ ଛକା) ଓ ମୁରଲୀ ବିଜୟ ୧୦(୧୫ ବଲ, ୧ ଚୌକା) ରନ କରିଥିବାବେଳେ ଯୁବ ବ୍ୟାଟ୍ସମ୍ୟାନ ଋତୁରାଜ ଗାଏକ୍ୱାଡ ୫ ରନ କରି ଦୁର୍ଭାଗ୍ୟଜନକଭାବେ ରନଆଉଟ ହୋଇ ଯାଇଥିଲେ। ଫଳରେ ୯.୧ ଓଭରରେ ୪୪ ରନରେ ଦଳ ୩ଟି ଉଇକେଟ ହରାଇଥିଲା। ଫାଫ୍‌ ଡୁପ୍ଲେସି ଓ କେଦାର ଯାଦବ ଇନିଂସକୁ ଆଗେଇ ନେବାକୁ ପ୍ରଚେଷ୍ଟା କରିଥିଲେ। ୪ର୍ଥ ଉଇକେଟରେ ୫୪ ରନର ଭାଗୀଦାରି ପରେ କେଦାରଙ୍କୁ ଆଉଟ କରିଥିଲେ ଏନରିଚ୍‌ ନର୍ଜେ। ୨୧ଟି ବଲ୍‌ ଖେଳିଥିବା କେଦାର ୩ ଚୌକା ସହ ୨୬ ରନ ସ୍କୋର କରିଥିଲେ। ଆବଶ୍ୟକ ରନହାର କ୍ରମେ ବଢ଼ି ଚାଲିଥିବାରୁ ଡୁପ୍ଲେସି ଓ ମହେନ୍ଦ୍ର ସିଂ ଧୋନୀ ବଡ଼ ଶଟ୍‌ ଖେଳିବାକୁ ଉଦ୍ୟମ କରିଥିଲେ। ଡୁପ୍ଲେସି ୩୫ ବଲ୍‌ରୁ ୪୩(୪ ଚୌକା) ରନ କରି ଆଉଟ ହେବାରୁ ଚେନ୍ନାଇର ବିଜୟ ଆଶା ମଉଳି ଯାଇଥିଲା। ଡେଥ୍‌ ଓଭରରେ ନର୍ଜେ ଓ କାଗିଶୋ ରାବାଡ଼ା ଟାଇଟ୍‌ ବୋଲିଂ କରିବାରୁ ଚେନ୍ନାଇ ଇନିଂସ ୧୩୧ରେ ସୀମିତ ରହି ଯାଇଥିଲା। ଧୋନୀ ୧୨ ବଲ୍‌ରୁ ୧୫ ଓ ରବୀନ୍ଦ୍ର ଜାଡେଜା ୯ ବଲ୍‌ରୁ ୧୨ ରନ କରି ଆଉଟ ହୋଇଥିଲେ। ଦିଲ୍ଲୀ ପକ୍ଷରୁ ରାବାଡ଼ା ୩ଟି, ନର୍ଜେ ୨ଟି ଏବଂ ଅକ୍ଷର ପଟେଲ ଗୋଟିଏ ଉଇକେଟ ନେଇଥିଲେ।
ଟସ୍‌ ଜିତି ଚେନ୍ନାଇ ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲେ ହେଁ ଦଳର ବୋଲରମାନେ ପ୍ରାରମ୍ଭିକ ସଫଳତା ଦେବାରେ ସକ୍ଷମ ହୋଇ ନ ଥିଲେ। ଦିଲ୍ଲୀ ଦଳର ପୃଥ୍ବୀ ଶ’ ଓ ଶିଖର ଧାଓ୍ବନ ଓପନିଂ ଯୋଡ଼ିରେ ୬୪ ବଲ୍‌ରୁ ୯୪ ରନ ସଂଗ୍ରହ କରି ବଡ଼ ସ୍କୋର ପାଇଁ ପଥ ପରିଷ୍କାର କରିଥିଲେ। ଆକ୍ରମଣାତ୍ମକ ବ୍ୟାଟିଂ କରିଥିଲେ ଯୁବ ବ୍ୟାଟ୍ସମ୍ୟାନ ପୃଥ୍ବୀ। ଧାଓ୍ବନ ୨୭ ବଲ୍‌ରୁ ୩ ଚୌକା ଓ ୧ ଛକା ସହାୟତାରେ ୩୫ ରନ କରି ପ୍ରଥମ ଖେଳାଳିଭାବେ ଆଉଟ ହୋଇଥିଲେ। ଧାଓ୍ବନଙ୍କୁ ଏଲବିଡବଲ୍ୟୁ କରି ଚେନ୍ନାଇକୁ ଏହି ବ୍ରେକ୍‌ ଥ୍ରୁ ଦେଇଥିଲେ ପୀୟୂଷ ଚାଓ୍ବଲା। ଆଇପିଏଲରେ ନିଜ ୫ମ ଅର୍ଦ୍ଧଶତକ ହାସଲ କରିଥିଲେ ପୃଥ୍ବୀ। ଦିଲ୍ଲୀ ୧୧.୪ ଓଭରରେ ୧ ଉଇକେଟ ହରାଇ ୧୦୦ ରନ ପୂରଣ କରିଥିଲା। ଚାଓ୍ବଲା ନିଜ ପରବର୍ତ୍ତୀ ଓଭରରେ ପୃଥ୍ବୀଙ୍କୁ ଶଟ୍‌ ମାରିବାର ଲାଳସା ଦେଖାଇ ଉଇକେଟ କିପର ମହେନ୍ଦ୍ର ସିଂ ଧୋନୀଙ୍କଦ୍ୱାରା ଷ୍ଟମ୍ପିଂ କରି ଦେଇଥିଲେ। ୩୫ ବଲ୍‌ରୁ ୫୦ ରନ ପୂରଣ କରିଥିବା ପୃଥ୍ବୀ ମୋଟ ୪୩ଟି ବଲ୍‌ ଖେଳି ୯ ଚୌକା ଓ ୧ ଛକା ସହାୟତାରେ ୬୪ ରନ ସଂଗ୍ରହ କରିଥିଲେ। ଏହି ଦୁଇ ବ୍ୟାଟ୍ସମ୍ୟାନଙ୍କ ପରେ ରିଷଭ ପନ୍ତ ଓ ଅଧିନାୟକ ଶ୍ରେୟାସ ଆୟାର କ୍ରିଜରେ କିଛି ସମୟ ରହିଥିଲେ ହେଁ ରନହାର ଅପେକ୍ଷାକୃତ ଧିମେଇ ଯାଇଥିଲା। ଡେଥ୍‌ ଓଭରରେ ଚମତ୍କାର ବୋଲିଂ କରି ସାମ୍‌ କୁରାନ ୧୯ତମ ଓଭରରେ ଆୟାରଙ୍କ ଉଇକେଟ ନେବା ସହିତ ମାତ୍ର ୪ ରନ ବ୍ୟୟ କରିଥିଲେ। ୨୨ଟି ବଲ୍‌ର ସମ୍ମୁଖୀନ ହୋଇଥିବା ଆୟାର ୧ ଚୌକା ସହାୟତାରେ ୨୬ ରନ କରିବାକୁ ସକ୍ଷମ ହୋଇଥିଲେ। ଶେଷ ଓଭର ବୋଲିଂ କରିଥିବା ଜୋଶ୍‌ ହାଜେଲଉଡ୍‌ ୧୪ ରନ ବ୍ୟୟ କରିବାରୁ ମୁମ୍ବାଇ ୨୦ ଓଭରରେ ୩ ଉଇକେଟ ହରାଇ ୧୭୫ ରନ କରି ପାରିଥିଲା। ୨୫ ବଲ୍‌ ଖେଳିଥିବା ପନ୍ତ ୫ ଚୌକା ସହାୟତାରେ ୩୭ ଓ ମାର୍କୁସ ଷ୍ଟୋଇନିସ ୩ ବଲ୍‌ରୁ ୧ ଚୌକା ସହ ୫ରନ କରି ଅପରାଜିତ ରହିଥିଲେ। ଚେନ୍ନାଇ ବୋଲରଙ୍କ ମଧ୍ୟରେ ଚାଓ୍ବଲା ୨ଟି ଓ ସାମ୍‌ କୁରାନ ଗୋଟିଏ ଉଇକେଟ ପାଇଥିଲେ।
ସଂକ୍ଷିପ୍ତ ସ୍କୋର
ଦିଲ୍ଲୀ କ୍ୟାପିଟାଲ୍ସ ୨୦ ଓଭରରେ ୧୭୫/୩(ପୃଥ୍ବୀ-୬୪, ରିଷଭ-୩୭*, ଧାଓ୍ବନ-୩୫, ଆୟାର-୨୬, ଚାଓ୍ବଲା-୨/୩୩, କୁରାନ-୧/୨୭)। ଚେନ୍ନାଇ ସୁପରକିଙ୍ଗ୍ସ ୨୦ ଓଭରରେ ୧୩୧/୭ (ଡୁପ୍ଲେସି- ୪୩ , କେଦାର- ୨୬, ଓ୍ବାଟସନ- ୧୪, ଧୋନୀ- ୧୫, ଜାଡେଜା- ୧୨, ଅକ୍ଷର-୧/ ୧୮, ନର୍ଜେ- ୨/୨୧, ରାବାଡ଼ା- ୩/୨୬ )।