ନୂଆଦିଲ୍ଲୀ,୬।୨: ଦିଲ୍ଲୀ ବିଧାନସଭା ନିର୍ବାଚନ ଲାଗି ମତଦାନ ବୁଧବାର ଶେଷ ହୋଇଛି। ଫେବୃଆରୀ ୮ରେ ଫଳାଫଳ ପ୍ରକାଶ ପାଇବ। ଏହା ପୂର୍ବରୁ ଅଲ୍ ଇଣ୍ଡିଆ ଇମାମ୍ ଆସୋସିଏଶନ୍ର ଅଧ୍ୟକ୍ଷ ସାଜିଦ ରଶିଦି ଚମକାଇବା ଭଳି ବୟାନ ଦେଇଛନ୍ତି। ଦିଲ୍ଲୀ ବିଧାନସଭା ନିର୍ବାଚନରେ ସେ ପ୍ରଥମ ଥର ଲାଗି ଭାଜପାକୁ ଭୋଟ ଦେଇଥିବା କହିଛନ୍ତି।
ଭାଜପା ଆଇଟି ସେଲ ମୁଖ୍ୟ ଅମିତ ମାଲବୀୟ ତାଙ୍କର ଏକ୍ସ ଆକାଉଣ୍ଟରେ ଏକ ଭିଡିଓ ଶେୟାର କରିଛନ୍ତି। ଏଥିରେ ସେ କହିଛନ୍ତି ଯେ, ‘ବନ୍ଧୁମାନେ ମୁଁ ଭୋଟ ଦେଇ ଦେଇଛି। ଦିଲ୍ଲୀରେ କିଏ ସରକାର ଗଢ଼ିବ ତା ଲାଗି। ତେବେ କାହାକୁ ଦେଇଛି ଶୁଣିଲେ ଚକିତ ହୋଇଯିବେ। ମୁଁ ମୋର ଭୋଟ ଭାଜପାକୁ ଦେଇଛି। ଜୀବନରେ ପ୍ରଥମ ଥର ଲାଗି ଭାଜପାକୁ ଭୋଟ ଦେଇଛି। କାହିଁକି ଏଭଳି କରିଛି ତା ପଛରେ ବହୁତ କାରଣ ରହିଛି। ଏଯାବତ ମୁସଲମାନଙ୍କ ଉପରେ ଅଭିଯୋଗ ହୋଇ ଆସିଛି ଯେ ଭାଜପାକୁ ହରାଇବା ଲାଗି ସେମାନେ ଭୋଟ କରିଥାନ୍ତି। ହେଲେ ଏବେ ଦିଲ୍ଲୀରେ ଭାଜପା ଜିତୁ ବୋଲି ମୁଁ ଭୋଟ କରିଛି। ଏହାର ଆଉ କାରଣ ମଧ୍ୟ ରହିଛି।’
ତେବେ ସାଜିଦ ରଶିଦିଙ୍କର ଏଭଳି ଦାବି ପରେ ଅମିତ ମାଲବୀୟ ପୋଷ୍ଟ କରି କହିଛନ୍ତି, ଏବେ ଅଲ୍ ଇଣ୍ଡିଆ ଇମାମ୍ ଆସୋସିଏଶନ୍ର ଅଧ୍ୟକ୍ଷ ରଶିଦି କହିଛନ୍ତି ଯେ ଭାଜପାକୁ ସେ ନିର୍ବାଚନରେ ଭୋଟ ଦେଇଛନ୍ତି। ଏହା ଗୋଟିଏ ଘଟଣା ନୁହେଁ। ତଥାକଥିତ ଯଦି ମୁସଲମାନମାନେ ବହୁଳଭାବେ ଭାଜପାକୁ ସମର୍ଥନ କରୁଛନ୍ତି ସେନେଇ ଧର୍ମନିରପେକ୍ଷ ଦଳଗୁଡ଼ିକ’ ଚିନ୍ତା କରିବା ଆବଶ୍ୟକ।’
କହିରଖୁଛୁ, ବୁଧବାର ଅଧିକାଂଶ ଏକ୍ଜିଟ୍ ପୋଲ୍ର ଭବିଷ୍ୟବାଣୀରେ ଦିଲ୍ଲୀରେ ଭାଜପା ଆଗାମୀ ସରକାର ଗଠନ କରିବ ବୋଲି ଦର୍ଶାଯାଇଛି। ଏହାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଉଛି।