ଦାରିଙ୍ଗବାଡି,୧୫।୧(ଅରୁଣ ସାହୁ):ଓଡିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ିକୁ କଫି ଦେଇଛି ସ୍ବତନ୍ତ୍ର ପରିଚୟ। କିନ୍ତୁ ସେହି କଫିର ଭବିଷ୍ୟତ ଦାରିଙ୍ଗବାଡିବାସୀଙ୍କୁ ନିରାଶ କରୁଛି। ଆଜି ପର୍ଯ୍ୟନ୍ତ ରାଜ୍ୟ ସରକାର ଦାରିଙ୍ଗବାଡି କଫିକୁ ବ୍ରାଣ୍ଡିଂ କରିପାରିଲେ ନାହିଁ। ସେଇ ପୁରୁଣା ଚିରାଚରିତ ଢଙ୍ଗରେ ଦାରିଙ୍ଗବାଡି କଫିକୁ ତୋଳା ଯାଇ ପ୍ରାଥମିକ ପ୍ରସ୍ତୁତି ପରେ କୋରାପୁଟ କଫି ହାତକୁ ଟେକି ଦିଆଯାଉଛି, ଯାହାକୁ କୋରାପୁର ତାର ବ୍ରାଣ୍ଡିଂରେ ବିକ୍ରି ବଟା କରି ରାଜ୍ୟ ତଥା ରାଜ୍ୟ ବାହାରେ ସ୍ବତନ୍ତ୍ର ସ୍ଥାନ ଅଧିଗ୍ରହଣ କରୁଛି। ତେବେ ସାଧାରଣରେ ପ୍ରଶ୍ନ ଉଠୁଛି ଜିଲାପ୍ରଶାସନ କାହିଁକି ଏଦିଗରେ ଗୁରୁତ୍ୱ ଦେଉନାହିଁ ।
ପ୍ରକାଶ ଯେ, କଫି ଚାଷକୁ ମୃତ୍ତିକା ସଂରକ୍ଷଣ ବିଭାଗ ପକ୍ଷରୁ ୭୦ ଦଶକରୁ ଆରମ୍ଭ କରାଯାଇଛି। କିନ୍ତୁ ପ୍ରକୃତ କେଉଁ ମସିହାରୁ ଏହା କରାଯାଇଛି, ତାହା ଜଣାପଡୁ ନ ଥିଲେ ମଧ୍ୟ ୪୫ ହେକ୍ଟର ଜମିରେ ଏହି କଫି ଚାଷ କରାଯାଇଥିବାବେଳେ ତାର ରକ୍ଷଣବେକ୍ଷଣ ଅଭାବ ଯୋଗୁ ଏବେ ମାତ୍ର ୨୫ ହେକ୍ଟର ଜମିରେ କଫି ଗଛ ବଞ୍ଚିଛି। କୁହାଯାଏ, କଫିକୁ ସୁରକ୍ଷା ବା ଛାଇ ଦେଉଥିବା ଆକାଶିଆ ଗଛ ଏବଂ ସିଲଭର ଓକ ଗଛ ଗତ ଫାଇଲିନ ଓ ହୁଡ଼ହୁଡ଼ ବାତ୍ୟାବେଳେ ଭାଙ୍ଗି ନଷ୍ଟ ହୋଇଯାଇଥିଲେ ମଧ୍ୟ ତା’ ସ୍ଥାନରେ ଆଜି ପର୍ଯ୍ୟନ୍ତ ସେହି ସୁରକ୍ଷା ଦେଉଥିବା ଗଛ ଲଗାଯାଇ ପାରିନାହିଁ। ସେହିପରି କଫି ଗଛ ଚାଷ ଆରମ୍ଭ ଦିନଠାରୁ ଆଜି ପର୍ଯ୍ୟନ୍ତ ତାର ରକ୍ଷଣବେକ୍ଷଣ କିମ୍ବା ଇତି ମଧ୍ୟରେ ଗଛଗୁଡିକ ଅର୍ଦ୍ଧଶତାୟୁ ହୋଇସାରିଥିଲେ ମଧ୍ୟ ତାକୁ ପୁନଃ ନୂତନ ଚାରା ରୋପଣରେ ଅବହେଳା କରାଯାଉଛି।
ପୂର୍ବରୁ ମୃତ୍ତିକା ସଂରକ୍ଷଣ ବିଭାଗ ପକ୍ଷରୁ ଘରୋଇ ଅନୁଷ୍ଠାନକୁ ଲିଜ୍ରେ ଦେଇ ଲକ୍ଷ ଲକ୍ଷ ଟଙ୍କା ଚଞ୍ଚକତା କରିଥିବା ଅଭିଯୋଗ ପରେ ଗୋଟିଏ ବର୍ଷ କୋରାପୁଟ କଫିକୁ ଲିଜରେ ଦିଆଯାଇଥିଲା। ଏବେ ୨ ବର୍ଷ ହେଲା ପୁଣି ବାଲିଗୁଡା ଆଇଟିଡିଏର ଟିଡ଼ିସିସି ଅଧୀନରେ କଫି ସଂଗ୍ରହ ଓ ପ୍ରାଥମିକ ପ୍ରସ୍ତୁତି ପରେ କୋରାପୁଟ କଫିକୁ ପ୍ରଦାନ କରାଯାଉଛି। କିନ୍ତୁ ଦାରିଙ୍ଗବାଡିରେ କଫିକୁ କାହିଁକି ପ୍ରସ୍ତୁତି କାରଣ କରି ଦାରିଙ୍ଗବାଡି ବ୍ରାଣ୍ଡିଂ ନାମରେ ବିକ୍ରି କରାଯାଉନାହିଁ ସେନେଇ ଦାରିଙ୍ଗବାଡି ଅଞ୍ଚଳରେ ତୀବ୍ର ଅସନ୍ତୋଷ ଦେଖାଯାଇଛି।
କଫି ବଗିଚାରେ ଗୋଲମରିଚ ଚାଷ ମଧ୍ୟ କରାଯାଉଛି। ହେଲେ ତାର ମଧ୍ୟ ରାକ୍ଷଣବେକ୍ଷଣ ଅଭାବ ଯୋଗୁ କଫି ବଗିଚା ଚାରିପଟେ ପାଚେରି ନ ଥିବାରୁ ପ୍ରତିବର୍ଷ ଲକ୍ଷାଧିଜ ଟଙ୍କାର କଫି ଓ ଗୋଲମରିଚ ଚୋରି ହୋଇଯାଉଛି। ବଜାରରେ ଅବାଧରେ ଦାରିଙ୍ଗବାଡି ଗୋଲମରିଚ ଓ କଫି ପାଉଡର ବିକ୍ରି ହେଉଥିଲେ ମଧ୍ୟ ପ୍ରଶାସନ ଓ ମୃତ୍ତିକା ସଂରକ୍ଷଣ ବିଭାଗ ଏବଂ କଫି, ଗୋଲମରିଚ ସଂଗ୍ରହ କରୁଥିବା ଆଇଟିଡିଏ ର ଟିଡିସିସି ନୀରବରେ ସବୁ ଦେଖୁଛନ୍ତି। ତେବେ ଚଳିତ ସପ୍ତାହରେ ଓଡିଶା ବିଧାନସଭାର ବାଚସ୍ପତି ସୁରମା ପାଢ଼ୀ ଏବଂ ବୁଧବାର ଓଡିଶାର ମୁଖ୍ୟ ଶାସନ ସଚିବ ଅନୁ ଗର୍ଗ ଦାରିଙ୍ଗବାଡି ଗସ୍ତରେ ଆସି କଫି ବଗିଚା ଓ ପ୍ରାଥମିକ ପ୍ରସ୍ତୁତି ୟୁନିଟକୁ ଯାଇ ପରିଦର୍ଶନ କରିବା ପରେ ଏହି କଫି ବଗିଚା ସମ୍ପର୍କରେ ଜାଣିବା ପରେ ହୁଏତ କଫି ବଗିଚାର ଭାଗ୍ୟ ପରିବର୍ତ୍ତନ ହେବ ବୋଲି ଅଞ୍ଚଳବାସୀ ଆଶାପ୍ରକଟ କରିଛନ୍ତି। ଏନେଇ ଆମେ ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ପ୍ରତିକ୍ରିୟା ନେଇ ପଚାରୁଥିଲୁ ଯେ, ପୁରାତନ କଫି ଗଛକୁ ହଟାଯାଇ ନୂତନ କଫି ଗଛ କେବେ ରୋପଣ କରାଯିବ। ଏଥିରେ ସେ ଉତ୍ତର ଦେଇ କହିଥିଲେ ଯେ, ସେ ଏନେଇ ଏକ୍ସପର୍ଟଙ୍କ ସହ ଆଲୋଚନା କରି ପଦକ୍ଷେପ ନେବେ।