ନିକୋସିଆ,୧୬।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାଇପ୍ରସ ଗସ୍ତରେ ଅଛନ୍ତି ଏବଂ ତାଙ୍କ ଗସ୍ତର ଦ୍ୱିତୀୟ ଦିନରେ, ତାଙ୍କୁ ଏହି ୟୁରୋପୀୟ ଦେଶର ସର୍ବୋଚ୍ଚ ସମ୍ମାନ ପ୍ରଦାନ କରାଯାଇଛି। ପ୍ରଧାନମନ୍ତ୍ରୀ ମୋଦି ସାଇପ୍ରସର ସର୍ବୋଚ୍ଚ ସମ୍ମାନ ପାଇବାରେ ବିଶ୍ୱର ୨୩ତମ ନେତା। ଏହି ସମ୍ମାନ ବିଷୟରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ଏହି ସମ୍ମାନ କେବଳ ମୋର ନୁହେଁ ବରଂ ଏହା ଦେଶର ୧୪୦ କୋଟି ଲୋକଙ୍କର ସମ୍ମାନ। ମୁଁ ଏହି ସମ୍ମାନକୁ ଭାରତ ଏବଂ ସାଇପ୍ରସ ମଧ୍ୟରେ ବନ୍ଧୁତ୍ୱପୂର୍ଣ୍ଣ ସମ୍ପର୍କ ଏବଂ ଆମର ପାରସ୍ପରିକ ବୁଝାମଣା ପାଇଁ ଉତ୍ସର୍ଗ କରୁଛି।
ରାଜଧାନୀ ନିକୋସିଆରେ, ସାଇପ୍ରସ ରାଷ୍ଟ୍ରପତି ନିକୋସ କ୍ରିଷ୍ଟୋଡୋଲିଡେସ ପ୍ରଧାନମନ୍ତ୍ରୀ ମୋଦିଙ୍କୁ ସାଇପ୍ରସର ସର୍ବୋଚ୍ଚ ସମ୍ମାନ Grand Cross of the Order of Makarios III’ରେ ସମ୍ମାନିତ କରିଛନ୍ତି।
ସର୍ବୋଚ୍ଚ ସମ୍ମାନ ପାଇବା ପରେ, ପ୍ରଧାନମନ୍ତ୍ରୀ ମୋଦି କହିଛନ୍ତି, ମୁଁ ଆପଣଙ୍କୁ (ସାଇପ୍ରସର ରାଷ୍ଟ୍ରପତି), ସାଇପ୍ରସର ସରକାର ଏବଂ ସାଇପ୍ରସର ଲୋକମାନଙ୍କୁ Grand Cross of the Order of Makarios III ପାଇଁ ହୃଦୟର ସହିତ ଅଭିନନ୍ଦନ ଜଣାଉଛି। ଏହି ସମ୍ମାନ କେବଳ ମୋର ସମ୍ମାନ ନୁହେଁ, ବରଂ ଏହା ୧୪୦ କୋଟି ଭାରତୀୟଙ୍କ ସମ୍ମାନ। ଏହା ସେମାନଙ୍କର ଶକ୍ତି ଏବଂ ଆକାଂକ୍ଷା ପାଇଁ ଏକ ସମ୍ମାନ। ଏହା ଆମ ଦେଶର ବସୁଧୈବ କୁଟୁମ୍ବକମର ସଂସ୍କୃତି, ଭାଇଚାରା ଏବଂ ବିଚାରଧାରାର ସମ୍ମାନ। ମୁଁ ଏହି ସମ୍ମାନକୁ ଭାରତ ଏବଂ ସାଇପ୍ରସ ମଧ୍ୟରେ ବନ୍ଧୁତ୍ୱପୂର୍ଣ୍ଣ ସମ୍ପର୍କ, ଆମର ସମାନ ମୂଲ୍ୟବୋଧ ଏବଂ ଆମର ପାରସ୍ପରିକ ବୁଝାମଣା ପାଇଁ ଉତ୍ସର୍ଗ କରୁଛି।
ସେ ଆହୁରି କହିଛନ୍ତି, ସମସ୍ତ ଭାରତୀୟଙ୍କ ପକ୍ଷରୁ, ମୁଁ ଏହି ସମ୍ମାନକୁ ଅତ୍ୟନ୍ତ ନମ୍ରତା ଏବଂ କୃତଜ୍ଞତାର ସହିତ ଗ୍ରହଣ କରୁଛି। ଏହି ସମ୍ମାନ ଆମ ଲୋକଙ୍କ ଶାନ୍ତି, ସୁରକ୍ଷା, ସାର୍ବଭୌମତ୍ୱ, କ୍ଷେତ୍ରୀୟ ଅଖଣ୍ଡତା ଏବଂ ସମୃଦ୍ଧି ପ୍ରତି ଆମର ଅଟଳ ପ୍ରତିବଦ୍ଧତାର ପ୍ରତୀକ। ମୁଁ ଭାରତ ଏବଂ ସାଇପ୍ରସ ମଧ୍ୟରେ ସମ୍ପର୍କ ପ୍ରତି ଏକ ଦାୟିତ୍ୱ ଭାବରେ ଏହି ସମ୍ମାନର ଗୁରୁତ୍ୱକୁ ବୁଝୁଛି ଏବଂ ଏହାକୁ ସେହି ଆତ୍ମାରେ ଗ୍ରହଣ କରୁଛି। ମୁଁ ନିଶ୍ଚିତ ଯେ ଆମର ସକ୍ରିୟ ସହଭାଗୀତା ଆଗାମୀ ସମୟରେ ନୂତନ ଉଚ୍ଚତା ଛୁଇଁବ। ଏକାଠି ଆମେ କେବଳ ଆମ ଦେଶର ବିକାଶକୁ ମଜଭୁତ କରିବୁ ନାହିଁ ବରଂ ଏକ ଶାନ୍ତିପୂର୍ଣ୍ଣ ଏବଂ ସୁରକ୍ଷିତ ବିଶ୍ୱ ପରିବେଶ ସୃଷ୍ଟି କରିବାରେ ମଧ୍ୟ ଯୋଗଦାନ ଦେବୁ।
ଆଜି ନିକୋସିଆର ରାଷ୍ଟ୍ରପତି ଭବନରେ ପ୍ରଧାନମନ୍ତ୍ରୀ ମୋଦିଙ୍କୁ ଆନୁଷ୍ଠାନିକ ଭାବରେ ସୱାଗତ କରାଯାଇଥିଲା। ରାଷ୍ଟ୍ରପତି କ୍ରିଷ୍ଟୋଡୋଲିଡେସ ରାଷ୍ଟ୍ରପତି ଭବନରେ ମୋଦିଙ୍କୁ ସ୍ବାଗତ କରିଥିଲେ।
ପ୍ରଧାନମନ୍ତ୍ରୀ ମୋଦି ଗତକାଲି ୩ ରାଷ୍ଟ୍ର ଗସ୍ତରେ ବାହାରି ପ୍ରଥମେ ସାଇପ୍ରସରେ ପହଞ୍ଚିଥିଲେ। ଏହି ସମୟରେ, ପ୍ରଧାନମନ୍ତ୍ରୀ ମୋଦି ରାଷ୍ଟ୍ରପତି କ୍ରିଷ୍ଟୋଡୋଲିଡେସ ସହିତ ନିକୋସିଆର ବ୍ୟବସାୟୀମାନଙ୍କ ସହିତ ଏକ ଗୋଲଟେବୁଲ ବୈଠକରେ ଅଂଶଗ୍ରହଣ କରିଥିଲେ ଏବଂ ବାଣିଜ୍ୟ, ନିବେଶ ଏବଂ ପ୍ରତିରକ୍ଷା ଭଳି କ୍ଷେତ୍ରରେ ଦ୍ୱିପାକ୍ଷିକ ସହଯୋଗକୁ ମଜବୁତ କରିବାକୁ ଆହ୍ବାନ କରିଥିଲେ, କାରଣ ଏହି କ୍ଷେତ୍ରରେ ବିକାଶର ଅପାର ସମ୍ଭାବନା ରହିଛି।