ଦିଗପହଣ୍ଡି,୯ା୧(ଅଶେଷ ନାଥ ମିଶ୍ର): ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ବ୍ରହ୍ମପୁର ବନଖଣ୍ଡ ଅଧିକାରୀ ସନ୍ନିି ଖୋଖରଙ୍କ ତତ୍ୱାବଧାନରେ ଦିଗପହଣ୍ଡି ବ୍ଳକ ଖମାରି ଗାଁ ପଞ୍ଚାୟତ ସଂଲଗ୍ନ ଘୋଡ଼ାହାଡ଼ ଡ୍ୟାମରେ ୪ ଦିନ ଧରି ଚାଲିଥିବା କୁମ୍ଭୀର ଗଣନା କାର୍ଯ୍ୟକ୍ରମ ଶେଷ ହୋଇଛି। ଚଳିତ ବର୍ଷ ଘୋଡାହାଡ ଡ୍ୟାମରେ ସମୁଦାୟ ଛୋଟ ବଡ଼ ୯୫ ଟି ଗୋ-ମୁହାଁ ପ୍ରଜାତିର କୁମ୍ଭୀର ଥିବା ନିୟୋଜିତ ବନ କର୍ମଚାରୀ ବୃନ୍ଦ ଗଣନା କରିଛନ୍ତି। କୁମ୍ଭୀର ଗଣନା କାର୍ଯ୍ୟ ପୂର୍ବରୁ ଘୋଡାହାଡ ଇକୋ ପାର୍କ ପରିସରରେ ଘୋଡ଼ାହାଡ଼ ଡ଼୍ୟାମ ଓ ଆଖପାଖ ପୋଖରୀ ଗୁଡିକରେ କୁମ୍ଭୀର ଗଣନା କାର୍ଯ୍ୟ ନିମନ୍ତେ ଦିଗପହଣ୍ଡି ବନାଞ୍ଚଳ କାର୍ଯ୍ୟାଳୟର ସମସ୍ତ ବନପାଳ, ବନରକ୍ଷୀ ଏବଂ ବନ ସୁରକ୍ଷା କର୍ମଚାରୀ ମାନଙ୍କୁ ତାଲିମ ଦିଆଯାଇଥିଲା। କୁମ୍ଭୀର ଗଣନା ପାଇଁ ବନ ବିଭାଗ ପକ୍ଷରୁ ୨୫ ଟି ଟିମ ଗଠନ କରାଯାଇଥିବା ବେଳେ ଦିଗପହଣ୍ଡି ବନ ବିଭାଗ କାର୍ଯ୍ୟାଳୟ ଭାରପ୍ରାପ୍ତ ରେଞ୍ଜର ସନ୍ତୋଷ ବିଷୋୟୀ ରତ୍ନଙ୍କ ନେତୃତ୍ୱରେ ୨୫ ରୁ ଊଦ୍ଧର୍ବ ବନ କର୍ମଚାରୀ କୁମ୍ଭୀର ଗଣନା କାର୍ଯ୍ୟରେ ନିୟୋଜିତ ଥିଲେ। ଡ୍ୟାମର ୧୦ଟି ସେଗମେଣ୍ଟ ସହ ୧୬ଟି ପୋଖରୀରେ କୁମ୍ଭୀର ଗଣନା କରାଯାଇଥିଲା। ଗତ ୨୦୨୫ ଆର୍ଥିକ ବର୍ଷରେ ଡ୍ୟାମ ଓ ଆଖପାଖ ପୋଖରୀ ମାନଙ୍କରେ କୁମ୍ଭୀରଙ୍କ ସଂଖ୍ୟା ୮୭ ରହିଥିବା ବେଳେ ଚଳିତବର୍ଷ ତାହା ବୃଦ୍ଧି ପାଇ ୯୫ ରେ ପହଞ୍ଚିଛି। ଡ୍ୟାମ ରେ ୬୩ ଟି କୁମ୍ଭୀରଙ୍କୁ ଚିହ୍ନଟ କରାଯାଇଥିବା ବେଳେ ୧୬ ଟି ପୋଖରୀରେ ୩୨ ଟି କୁମ୍ଭୀରଙ୍କୁ ଚିହ୍ନଟ କରାଯାଇଥିବା ବ୍ରହ୍ମପୁର ବନଖଣ୍ଡ ଅଧିକାରୀ ସୂଚନା ଦେଇଛନ୍ତି।