ପାଟଣା,୧୩।୧(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ ରାଜନଗର ହାଇସ୍କୁଲର କିରାଣୀ, ଭାଷ୍ୟକାର ତଥା ସାମାଜିକ ଗଣମାଧ୍ୟମରେ ସକ୍ରିୟ ଥିବା ସଚିଦାନନ୍ଦ ମହାକୁଡ଼ ସୋମବାର ନିଜ ଫେସବୁକ ପେଜ୍ରେ କହିଛନ୍ତି, କେନ୍ଦୁଝରର ପୋଲିସ ଭାଇମାନେ ପର୍ବପର୍ବାଣୀରେ ଛୁଟି ପାଉନାହାଁନ୍ତି। ବିଭିନ୍ନ ପର୍ବପର୍ବାଣୀରେ ଜିଲାକୁ ମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଗସ୍ତ ରହୁଥିବାରୁ ପୋଲିସମାନଙ୍କ ସାମାଜିକ ଜୀବନ ଓ ଚଳଣି ବାଧାପ୍ରାପ୍ତ ହେଉଛି । ତାଙ୍କ ରିଲଟି ସାମାଜିକ ଗଣମାଧ୍ୟମରେ ଭାଇରାଲ ହେବା ସହ ସୋମବାର ଚର୍ଚ୍ଚାର ବିଷୟ ପାଲଟିଛି। ପୋଲିସର ବ୍ୟସ୍ତତା କାର୍ଯ୍ୟକୁ ସେ ପ୍ରଶଂସା କରିଥିବାବେଳେ ପୋଲିସ ପରିବାରକୁ ସମବେଦନା ଜଣାଇବାକୁ ଯାଇ ମୁଖ୍ୟମନ୍ତ୍ରୀଙ୍କୁ ତେର୍ଚ୍ଛାବାଣ ମାରିଥିବା ଆଲୋଚନା ହେଉଛି। ସୂଚନା ଯୋଗ୍ୟ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମକର ସଂକ୍ରାନ୍ତି ବୁଧବାରରେ ରାଜନଗର ରଘୁନାଥ ଜିଉ ମଠ ସଂଲଗ୍ନ ବୈତରଣୀ ନଦୀରେ ମକର ବୁଡ ପକାଇବାର କାର୍ଯ୍ୟକ୍ରମ ରହିଛି। ରାଜନଗର ହାଇସ୍କୁଲର କାର୍ଯ୍ୟରତ ଜଣେ ଅମଲା (କିରାଣୀ) ମୁଖ୍ୟମନ୍ତ୍ରୀଙ୍କ ଗସ୍ତକୁ ସମାଲୋଚନା କରିବା ସହ ମୁଖ୍ୟମନ୍ତ୍ରୀଙ୍କ ଗସ୍ତ ଯୋଗୁ ପୋଲିସ କର୍ମଚାରୀଙ୍କ ପର୍ବପର୍ବାଣୀଗୁଡିକ ଫିକା ପଡୁଛି ବୋଲି ଆରୋପ ଲଗାଇଛନ୍ତି। ରିଲରେ ସେ ପୋଲିସଙ୍କୁ ମୁଖ୍ୟମନ୍ତ୍ରୀ ବିଭିନ୍ନ ପର୍ବପର୍ବାଣୀରେ ଛୁଟି ଦେବା ସହ ସେମାନଙ୍କର ଦାବି ଗୁଡ଼ିକ ପୂରଣ କରିବାକୁ ନିବେଦନ କରିଛନ୍ତି। ମୁଖ୍ୟମନ୍ତ୍ରୀଙ୍କୁ ସମାଲୋଚନା କରିବା ଘଟଣାକୁ କେହି କେହି ସଚିଦାନନ୍ଦଙ୍କୁ ସାବାସି ଦେଉଥିବାବେଳେ କେହି କେହି ତାଙ୍କ ପ୍ରତି ଖୁବଶୀଘ୍ର ସରକାରୀ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ହେବ ବୋଲି କହୁଛନ୍ତି।