ନୂଆଦିଲ୍ଲୀ,୭।୫: ନିକଟରେ ଦେଖାଦେଇଥିବା ବିରାଟ କୋହଲି ଏବଂ ସୁନୀଲ ଗାଭାସ୍କରଙ୍କ ମଧ୍ୟର ବିବାଦ ମଧ୍ୟକୁ ଡେଇଁ ପଡ଼ିଛନ୍ତି ପାକିସ୍ତାନର ପୂର୍ବତନ ଅଧିନାୟକ ଓ୍ବାସିମ ଅକରମ୍। ବିରାଟଙ୍କୁ ପରାମର୍ଶ ଦେଇ ସେ ଏଭଳି ମନ୍ତବ୍ୟ ଦେବା ଉଚିତ ନୁହେଁ ବୋଲି ସେ କହିଛନ୍ତି। ଅପରପକ୍ଷେ ଗାଭାସ୍କରଙ୍କୁ ସେ ସମର୍ଥନ କରିଛନ୍ତି। ବ୍ୟାଟ୍ସମ୍ୟାନଙ୍କ ଶକ୍ତି ଏବଂ ଦୁର୍ବଳତା ବିଷୟରେ କହିବା କମେଣ୍ଟେଟର୍ସମାନଙ୍କ କାମ ବୋଲି ସେ କହିଛନ୍ତି।
ଅକରମ ଏକ ସାକ୍ଷାତକାରରେ କହିଛନ୍ତି, ଉଭୟ ବିରାଟ ଏବଂ ଗାଭାସ୍କର ମହାନ ଖେଳାଳି। ଗାଭାସ୍କରଙ୍କୁ ଜଣେ କ୍ରିକେଟର, ମଣିଷ ଏବଂ ମଇଦାନ ବାହାରୁ ଜାଣିଛି। ସେ ବର୍ଷ ବର୍ଷ ଧରିକ କମେଣ୍ଟ୍ରି କରୁଛନ୍ତି। ସେହିଭଳି ବିରାଟ ଜଣେ ଶ୍ରେଷ୍ଠ ଖେଲାଳି। ସେ ବହୁତ ରନ୍ ସ୍କୋର କରିଛନ୍ତି। ହେଲେ ସେ ଏହିଭଳି କଥା ହେବା ଉଚିତ ନୁହେଁ।
କହିରଖୁଛୁ ଯେ, ଗାଭାସ୍କର କୋହଲିଙ୍କ ଷ୍ଟ୍ରାଇକ ହାର ଉପରେ ପ୍ରଶ୍ନ ଉଠାଇଥିଲେ। ଏହା ପରେ ବିରାଟ ପରବର୍ତ୍ତୀ ଇନିଂସରେ ଚମତ୍କାର ବ୍ୟାଟିଂ କରି ତାଙ୍କ ଉପରେ ପ୍ରଶ୍ନ ଉଠାଉଥିବା ସମାଲୋଚକମାନଙ୍କୁ ଜବାବ ଦେଇଥିଲେ। ଏହା ପରେ ଗାଭାସ୍କର ରାଗି ଯାଇଥିଲେ ଏବଂ ଲାଇଭ ଶୋ’ରେ ସେ ଆଇପିଏଲ ପ୍ରସାରଣ ଚ୍ୟାନେଲକୁ ଗାଳି ଦେଇଥିଲେ ଯିଏ ବାରମ୍ବାର ବିରାଟଙ୍କ ଏହି ବିବୃତ୍ତି ବଜାଉଥିଲା। ବିରାଟଙ୍କ ବିବୃତ୍ତି ଚଲାଇ ଚ୍ୟାନେଲ ନିଜର ସମୀକ୍ଷକଙ୍କୁ ଅପମାନିତ କରୁଛିବୋଲି ଗାଭାସ୍କର ଭାବିଥିଲେ।
ଚଳିତ ସିଜନରେ କୋହଲି ୧୧ ମ୍ୟାଚ୍ରେ ୫୪୨ ରନ ସଂଗ୍ରହ କରିଛନ୍ତି। ବଡ କଥା ହେଉଛି ତାଙ୍କର ଷ୍ଟ୍ରାଇକ ହାର ପ୍ରାୟ ୧୫୦ ରହିଛି। ୨୦୧୬ ପରଠାରୁ ପ୍ରଥମ ଥର ପାଇଁ ବିରାଟଙ୍କ ଷ୍ଟ୍ରାଇକ ହାର ୧୫୦ ପାଖାପାଖି ଥିବାର ଅର୍ଥ କୋହଲି ଚଳିତ ସିଜନରେ ତାଙ୍କ ରନ୍ର ଗତି ବୃଦ୍ଧି କରିଛନ୍ତି। ବର୍ତ୍ତମାନ, ଏସବୁ କରିବା ପରେ ମଧ୍ୟ ଯଦି ତାଙ୍କ ବ୍ୟାଟିଂ ଉପରେ ପ୍ରଶ୍ନ ଉଠାଯାଏ, ତା’ହେଲେ ତାଙ୍କର ପ୍ରତିକ୍ରିୟା ନିଶ୍ଚିତ ଭାବେ ଆସିବ। ଦେଖିବାକୁ ଗଲେ ବିରାଟ ନିଶ୍ଚିତ ଭାବରେ ଚୁପ ରହିବା ଭଳି ଖେଳାଳି ନୁହନ୍ତି।