ନୂଆଦିଲ୍ଲୀ, ୨୨।୫: ଚାଇନା ଭାରତର ଉତ୍ତର-ପୂର୍ବ ସୀମା, ବିଶେଷତଃ ଅରୁଣାଚଳ ପ୍ରଦେଶ, ମଣିପୁର ଓ ନାଗାଲାଣ୍ଡ ଅଞ୍ଚଳରେ ଏକ ଅଣପାରମ୍ପାରିକ ଯୁଦ୍ଧ ଚଳାଇଛି ବୋଲି ସାମ୍ପ୍ରତିକ ଜାତୀୟ ରିପୋର୍ଟରୁ ଜଣାପଡିଛି। ଏହି ରଣନୀତି ଅଧୀନରେ ଚାଇନା ସାମରିକ ରଣନୀତି ସହିତ ମାଦକ ଦ୍ରବ୍ୟ ଚୋରାଚାଲାଣ, ବିଦ୍ରୋହୀ ଗୋଷ୍ଠୀଙ୍କୁ ଅସ୍ତ୍ରଶସ୍ତ୍ର ଯୋଗାଣ ଏବଂ ଅର୍ଥନୈତିକ ଚାପ ସୃଷ୍ଟି କରି ଭାରତକୁ ଅସ୍ଥିର କରିବାକୁ ଚେଷ୍ଟା କରୁଛି।
ଅରୁଣାଚଳ ପ୍ରଦେଶ ଉପରେ ଚାଇନାର ଦାବି: ଚାଇନା ଅରୁଣାଚଳ ପ୍ରଦେଶର କିଛି ଅଞ୍ଚଳକୁ ଜାଙ୍ଗନାନ ବୋଲି ଦାବି କରି ନୂଆ ନାମକରଣ କରୁଛି, ଯାହାକୁ ଭାରତ ଦୃଢ ଭାବେ ପ୍ରତ୍ୟାଖ୍ୟାନ କରିଛି। ଭାରତୀୟ ବୈଦେଶିକ ମନ୍ତ୍ରାଳୟ ଘୋଷଣା କରିଛି ଯେ, ଅରୁଣାଚଳ ପ୍ରଦେଶ ଭାରତର ଅବିଚ୍ଛେଦ୍ୟ ଅଙ୍ଗ ଏବଂ ଚୀନର ଏହି ଦାବି ଅଯୌକ୍ତିକ ଓ ଅଗ୍ରହଣୀୟ। ଚୀନର ଏହି ନୀତି ସୀମା ଅଞ୍ଚଳରେ ଉତ୍ତେଜନା ବାଇବାରେ ଭୂମିକା ରଖୁଛି।
ମାଦକ ଦ୍ରବ୍ୟ ଓ ବିଦ୍ରୋହୀ ସମର୍ଥନ: ସୀମାବର୍ତୀ ଅଞ୍ଚଳରେ ଚୀନ ମାଦକ ଦ୍ରବ୍ୟ ଚୋରାଚାଲାଣକୁ ପ୍ରୋତ୍ସାହନ ଦେଉଥିବା ଅଭିଯୋଗ ହୋଇଛି। ମଣିପୁର ଓ ନାଗାଲାଣ୍ଡରେ ବିଦ୍ରୋହୀ ଗୋଷ୍ଠୀଙ୍କୁ ଅସ୍ତ୍ରଶସ୍ତ୍ର ଓ ଅର୍ଥ ଯୋଗାଣ କରି ଚୀନ ଅଞ୍ଚଳରେ ଅସ୍ଥିରତା ସୃଷ୍ଟି କରୁଛି। ସୁରକ୍ଷା ବିଶେଷଜ୍ଞଙ୍କ ମତରେ, ଏହା ଚୀନର ତିନି ଯୁଦ୍ଧ ରଣନୀତିର ଏକ ଅଂଶ, ଯେଉଁଥିରେ ମନୋବୈଜ୍ଞାନିକ, ଗଣମାଧ୍ୟମ ଓ ଆଇନଗତ ଯୁଦ୍ଧ ଜରିଆରେ ଶତ୍ରୁ ଦେଶକୁ ଦୁର୍ବଳ କରାଯାଏ।
ସାମରିକ ଓ ଅଣ-ସାମରିକ ଚାପ: ଚୀନ ସୀମାରେ ସାମରିକ ଉପସ୍ଥିତି ବଢାଇବା ସହ ଅଣ-ସାମରିକ ପଦ୍ଧତି ଯଥା ସାଇବର ଆକ୍ରମଣ ଓ ଅପପ୍ରଚାର ମାଧ୍ୟମରେ ଭାରତକୁ ଚାପରେ ରଖିବାକୁ ଚେଷ୍ଟା କରୁଛି। ମଣିପୁର ନିକଟସ୍ଥ ମିଆଁମାର ସୀମାରେ ଚୀନ ସମର୍ଥିତ ଗୋଷ୍ଠୀଙ୍କ କାର୍ଯ୍ୟକଳାପ ବୃଦ୍ଧି ପାଇଛି, ଯାହାକୁ ଭାରତୀୟ ସୁରକ୍ଷା ବାହିନୀ କଡ଼ା ମୁକାବିଲା କରୁଛି।
ଭାରତୀୟ ସେନା ଓ ସୁରକ୍ଷା ବାହିନୀ ଏହି ଅଣପାରମ୍ପାରିକ ଯୁଦ୍ଧକୁ ମୁକାବିଲା କରିବା ପାଇଁ କଡ଼ା ପଦକ୍ଷେପ ଗ୍ରହଣ କରୁଛି। ସୀମାରେ ଅତ୍ୟାଧୁନିକ ସର୍ଭେଲାନ୍ସ ସିଷ୍ଟମ ଓ ଡ୍ରୋନ ବ୍ୟବହାର ବୃଦ୍ଧି କରାଯାଇଛି। ଏହା ସହିତ, ସ୍ଥାନୀୟ ଜନତାଙ୍କ ମଧ୍ୟରେ ସଚେତନତା ସୃଷ୍ଟି କରିବା ଓ ଅର୍ଥନୈତିକ ବିକାଶ ପାଇଁ ଉତ୍ତର-ପୂର୍ବରେ ନୂଆ ପ୍ରକଳ୍ପ ଆରମ୍ଭ କରାଯାଇଛି।
ବିଶେଷଜ୍ଞଙ୍କ ମତରେ, ଚୀନର ଏହି ରଣନୀତି ଦୀର୍ଘକାଳୀନ ଅଟେ, ଯାହା ମୁକାବିଲା କରିବା ପାଇଁ ଭାରତକୁ ସାମରିକ, ଅର୍ଥନୈତିକ ଓ କୂଟନୈତିକ ସ୍ତରରେ ପ୍ରସ୍ତୁତ ରହିବାକୁ ପଡିବ ଏହି ଅଞ୍ଚଳରେ ଶାନ୍ତି ଓ ସ୍ଥିରତା ବଜାୟ ରଖିବା ପାଇଁ ଭାରତ ଆନ୍ତର୍ଜାତୀୟ ସମୁଦାୟଙ୍କ ସହଯୋଗ ମଧ୍ୟ ଆଶା କରୁଛି।