ବେଜିଂ,୩୧।୧୦: ଗାଜା ଷ୍ଟ୍ରିପରେ ଇସ୍ରାଏଲର ଆକ୍ରମଣ ତୀବ୍ର ହେବାରେ ଲାଗିଛି ଏବଂ ଏହି ସମୟରେ ଖବର ଆସିଛି ଯେ, ଚାଇନା ଏହାର ଅନଲାଇନ ନକ୍ସାରୁ ଇସ୍ରାଏଲର ନାମ ହଟାଇ ଦେଇଛି। ମିଡିଆ ରିପୋର୍ଟରେ ଏହି ଦାବି କରାଯାଇଛି। ଖବର ଅନୁଯାୟୀ, ଚାଇନାର କମ୍ପାନୀ ବାଇଡୁ ଏବଂ ଆଲିବାବର ଅନଲାଇନ ନକ୍ସାରୁ ଇସ୍ରାଏଲର ନାମ ଗାଏବ ହୋଇଯାଇଛି। ବାଇଡୁର ନକ୍ସାରେ ଇସ୍ରାଏଲ ଏବଂ ପାଲେଷ୍ଟାଇନର ସୀମାକୁ ଦର୍ଶାଯାଇଛି କିନ୍ତୁ ନକ୍ସାରୁ ଉଭୟଙ୍କ ନାମ ହଟାଯାଇଛି।
ଖବର ଅନୁଯାୟୀ, ଏହି ଚାଇନିଜ ଭାଷାରେ ଲେଖାଥିବା ନକ୍ସାରେ ଲକ୍ଜମବର୍ଗ ପରି ଏକ ଛୋଟ ଦେଶର ନାମ ଅଛି କିନ୍ତୁ ଇସ୍ରାଏଲ ପରି ଏକ ଗୁରୁତ୍ୱପୂର୍ଣ୍ଣ ଦେଶର ନାମର ଅନୁପସ୍ଥିତି ଅନେକ ପ୍ରଶ୍ନ ସୃଷ୍ଟି କରିଛି। ଆଲିବାବ କିମ୍ବା ବାଇଡୁ ଏ ପର୍ଯ୍ୟନ୍ତ ଏହି ପ୍ରସଙ୍ଗରେ କୌଣସି ସ୍ପଷ୍ଟୀକରଣ ଦେଇନାହାଁନ୍ତି। ସୂଚନାଯୋଗ୍ୟ ଯେ ଇସ୍ରାଏଲ-ହମାସ ଯୁଦ୍ଧ ସମ୍ପର୍କରେ ଚାଇନା ସରକାର ଦେଇଥିବା ବିବୃତ୍ତିରେ ହମାସଙ୍କ ଆକ୍ରମଣକୁ ନିନ୍ଦା କରାଯାଇ ନାହିଁ ଏବଂ ପାଲେଷ୍ଟାଇନକୁ ସମର୍ଥନ କରାଯାଇଥିଲା। ଚାଇନାକୁ ମଧ୍ୟ ଏ ସମ୍ପର୍କରେ ସମାଲୋଚନାର ସମ୍ମୁଖୀନ ହେବାକୁ ପଡିଥିଲା।