ରାୟଗଡ଼ା,୨ା୨(ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲା ଗସ୍ତରେ ଆସିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସୋମବାର ଦିନିକିଆ ଗସ୍ତରେ ଆସି ସୁଭଦ୍ରା ଶକ୍ତି ମେଳା ଉଦଘାଟନ କରିଥିଲେ।ଏହି ଅବସରରେ ସ୍ଥାନୀୟ ଖଣି କମ୍ପାନୀମାନଙ୍କରେ ସ୍ଥାନୀୟ ବେକାର ଯୁବତୀ ଯୁବକମାନଙ୍କୁ ଯୋଗ୍ୟତା ଭିତ୍ତିରେ ନିଯୁକ୍ତି ମିଳିବ ବୋଲି କହିଛନ୍ତି । ଯେଉଁଠି ଖଣି ଅଛି ସେହି ଅଞ୍ଚଳର ବେକାର ଯୁବତୀ ଯୁବକଙ୍କୁ ନିଯୁକ୍ତି ପ୍ରଥମେ ମିଳିବ, ଯାହା ସଂପୃକ୍ତ କମ୍ପାନୀର ୮୦ ପ୍ରତିଶତ ନିଯୁକ୍ତି ହେବ ବୋଲି କହିଛନ୍ତି । ଏଠି ସହିତ ରାୟଗଡ଼ା ଜିଲାର ଯୁବତୀଯୁବକଙ୍କୁ ମଧ୍ୟ ନିଯୁକ୍ତି ଦିଆଯିବ ଏବଂ ପରେ ବାହାର ଜିଲାକୁ ସୁଯୋଗ ଦିଆଯିବ ବୋଲି କହିଛନ୍ତି ମୋହନ ମାଝୀ ।
ଏହାସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଧ୍ୟ ଟାର୍ଗେଟ କରିଛନ୍ତି । ପୂର୍ବ ସରକାରଙ୍କ ସମୟରେ ଏସବୁ ହେଉନଥିଲା। ହେଲେ ବର୍ତ୍ତମାନ ସରକାର ଏହି ପ୍ରତିଶ୍ରୁତି ପାଳନ କରିବ ଏବଂ ପ୍ରତିଶ୍ରୁତି ପାଣିରେ ଗାର ହେବ ନାହିଁ ବୋଲି ଦୃଢୋକ୍ତି ପ୍ରକାଶ କରିଛନ୍ତି। ପ୍ରକାଶ ଥାଉକି, ଜାନୁଆରୀ ୨୮ ତାରିଖରେ ରାୟଗଡ଼ା ଜିଲା କାଶିପୁର ବ୍ଲକର ଦୋରାଗୁଡ଼ା ସ୍ଥିତ ଉତ୍କଳ ଆଲୁମିନା ଇଣ୍ଟରନେସନାଲ କମ୍ପାନୀ ପ୍ରାୟ ୧୮ ବର୍ଷ ତଳେ ଆରମ୍ଭ ସମୟରେ ନିଯୁକ୍ତି ଓ ଅନ୍ୟାନ୍ୟ ମୌଳିକ ସୁବିଧା ଯୋଗାଇବା ନେଇ ଦେଇଥିବା ପ୍ରତିଶ୍ରୁତି କେବଳ ପାଣିରେ ଗାର ବୋଲି ଧରିତ୍ରୀରେ ଖବର ପ୍ରକାଶିତ ହୋଇଥିଲା ।