କଟକସ୍ଥିତ ଶ୍ରୀରାମଚନ୍ଦ୍ର ଭଞ୍ଜ ଭେଷଜ ମହାବିଦ୍ୟାଳୟ ଓ ହସ୍ପିିଟାଲରେ ୧୫ ମାର୍ଚ୍ଚ ବିଳମ୍ବିତ ରାତ୍ରିରେ ଟ୍ରମା କେୟାର ଇଣ୍ଟେନସିଭ୍ କେୟାର ୟୁନିଟ (ଆଇସିୟୁ)ରେ ଅଗ୍ନିକାଣ୍ଡ ଘଟି ୧୦ ଜଣଙ୍କ ମୃତ୍ୟୁ ଘଟିଥିବା ବେଳେ ୪ ଜଣ ଗୁରୁତର ଆହତ ହୋଇଛନ୍ତି। ଶର୍ଟସର୍କିଟ ଯୋଗୁ ଏଭଳି ଦୁର୍ଘଟଣା ଘଟିଥିବା ପ୍ରାରମ୍ଭିକ ଭାବେ କୁହାଯାଇଥିଲା। ସବୁଠାରୁ ଚିନ୍ତାଜନକ ବିଷୟ ହେଉଛି ଯେ, ଅଗ୍ନିକାଣ୍ଡ ଘଟିଥିବା ୟୁନିଟ୍ଠାରୁ ମାତ୍ର ୧୦୦ ମିଟର ଦୂରରେ ଅଗ୍ନିଶମ କାର୍ଯ୍ୟାଳୟ ରହିଛି। ଅଗ୍ନିଶମ କର୍ମଚାରୀ ସେଠାରେ ଅଧ ଘଣ୍ଟାଏ ପରେ ପହଞ୍ଚତ୍ଥିଲେ। ଶୁଣିବାକୁ ମିଳୁଛି ଯେ, ଅଗ୍ନିକାଣ୍ଡ ଘଟିବା ପରେ ତାହାକୁ ଲିଭାଇବା ପାଇଁ କର୍ମଚାରୀମାନେ ପ୍ରାରମ୍ଭିକ ପ୍ରଚେଷ୍ଟା କରି ବିଫଳ ହେବା ପରେ ଅଗ୍ନିଶମ କାର୍ଯ୍ୟାଳୟକୁ ଜଣାଇଥିଲେ। ଦୁର୍ଘଟଣା ଘଟିବା ପରେ ସାଇରନ ନ ବାଜିବା ଓ ସ୍ପ୍ରିଙ୍କ୍ଲର ବ୍ୟବସ୍ଥା ଅକାମି ଥିବା କୁହାଯାଉଛି। ଏସବୁ ଘଟଣାକୁ ଦେଖିଲେ ଦୁର୍ଘଟଣା ପଛରେ ଷଡ଼ଯନ୍ତ୍ର ଦିଗକୁ ମଧ୍ୟ ଅଣଦେଖା କରାଯାଇ ନ ପାରେ। ଏଥିସହିତ ସ୍ଥାନୀୟ ବିଦ୍ୟୁତ୍ କାର୍ଯ୍ୟାଳୟ ଏବଂ ଓଡ଼ିଶା ମେଡିକାଲ କର୍ପୋରେଶନ ଲିମିଟେଡ୍ (ଓଏମ୍ସିଏଲ୍) କର୍ମଚାରୀ ପରସ୍ପର ଉପରେ ଦୋଷ ଲଦାଲଦି ହେଉଥିବା ବିଷୟ ପଦାକୁ ଆସିଲାଣି। ବିଦ୍ୟୁତ୍ ବିଭାଗ ଯନ୍ତ୍ରୀ ଭେଣ୍ଟିଲେଟରରୁ ନିଆଁ ଲାଗିଥିବା କହୁଥିବା ବେଳେ ଓଏମ୍ସିଏଲ୍ ପକ୍ଷରୁ ଶୀତତାପ ନିୟନ୍ତ୍ରିତ ଯନ୍ତ୍ରରେ ତ୍ରୁଟି ଯୋଗୁ ଏଭଳି ଦୁର୍ଘଟଣା ଘଟିଥିବା କୁହାଯାଉଛି। ଏଠି କିଏ ସତ କହୁଛନ୍ତି ତାହା ଜାଣିବା କଷ୍ଟକର। କାରଣ ତଦନ୍ତ ରିପୋର୍ଟ ଅନେକ ସମୟରେ ପ୍ରକୃତ କାରଣଠାରୁ ଦୂରେଇ ଯାଇ ଅସତ୍ୟ ତଥ୍ୟ ଦେଉଥିବା ଅତୀତର ଅନେକ ଘଟଣାରୁ ଜଣାପଡ଼ିଛି।
ଏସ୍ସିବି ମେଡିକାଲ କଲେଜ ଆଣ୍ଡ୍ ହସ୍ପିଟାଲକୁ ବିଶ୍ୱସ୍ତରୀୟ କରିବା ନେଇ ପ୍ରାଥମିକ ପର୍ଯ୍ୟାୟରେ ଏଥିଲାଗି ୪,୪୭୪ କୋଟି ଟଙ୍କା ବ୍ୟୟବରାଦ କରାଯାଇ ଏହାର ସମ୍ପ୍ରସାରଣ କାର୍ଯ୍ୟ ଜାରି ରହିଛି। ହେଲେ ଅଗ୍ନି ନିର୍ବାପକ ଭଳି ଅତି ଜରୁରୀ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରାଯାଇପାରୁ ନ ଥିବାରୁ ଏପରି ଅସ୍ବାଭାବିକ ସ୍ଥିତିି ଉପୁଜୁଛି। ଯଦି ଟ୍ରମା କେୟାର ଆଇସିୟୁ କଥା ଦେଖାଯାଏ ସେଠାରେ ସାଧାରଣତଃ ଗୁରୁତର ରୋଗୀମାନେ ଚିକିତ୍ସିତ ହୋଇଥାଆନ୍ତି। ଆରୋଗ୍ୟ ପାଇଁ ରୋଗୀଙ୍କ ଶରୀରରେ ବିଭିନ୍ନ ଯନ୍ତ୍ରପାତି ଲାଗିଥାଏ। ସେହି ୟୁନିଟ୍ରେ ନିଆଁ ଲାଗିିଯିବା ମାତ୍ରେ ମୋଟା ଧୂଆଁ ତତ୍କ୍ଷଣାତ୍ କୋଠରିକୁ ବ୍ୟାପିଯାଇଥିଲା ।
ରୋଗୀଙ୍କୁ ଯେଉଁ ପରିସ୍ଥିତିରେ ରଖାଯାଇଥାଏ, ସେମାନେ ନିଜେ ବାହାରିବା ଅସମ୍ଭବ ବୋଲି କୁହାଯାଇପାରେ। ଟିକିଏ ଅତୀତକୁ ଦେଖିଲେ ଦେଶର ବିଭିନ୍ନ ହସ୍ପିଟାଲରେ ଅଗ୍ନିକାଣ୍ଡ ଯୋଗୁ ବହୁ ରୋଗୀଙ୍କ ମୃତ୍ୟୁ ଘଟିଥିବା ଖବର ରହିଛି। ରାଜସ୍ଥାନ ଜୟପୁରର ସଓ୍ବାଇ ମାନସିଂ ହସ୍ପିଟାଲର ଟ୍ରମା କେୟାର ୟୁନିଟ୍ରେ ୬ ଅକ୍ଟୋବର ୨୦୨୫ରେ ଅଗ୍ନିକାଣ୍ଡ ଘଟିବାରୁ ଆଇସିୟୁରେ ଥିବା ୧୦ ଜଣ ରୋଗୀଙ୍କ ମୃତ୍ୟୁ ଘଟିଥିଲା। ଏହା ପୂର୍ବରୁ ୨୦୨୪ ନଭେମ୍ବର ୧୫ରେ ଉତ୍ତରପ୍ରଦେଶର ଝାନ୍ସୀସ୍ଥିତ ମହାରାଣୀ ଲକ୍ଷ୍ମୀବାଈ ମେଡିକାଲ କଲେଜରେ ନିୟୋନାଟାଲ ଇଣ୍ଟେନ୍ସିଭ୍ କେୟାର ୟୁନିଟ୍ (ଏନ୍ଆଇସିୟୁ)ରେ ଅଗ୍ନିକାଣ୍ଡ ଯୋଗୁ ୧୦ ନବଜାତକଙ୍କ ପ୍ରାଣ ଚାଲିଯାଇଥିଲା। ଗୁଜରାଟ ଭାରୁଚ୍ର ପଟେଲ ଓ୍ବେଲଫେୟାର ହସ୍ପିଟାଲରେ ୧ ମେ ୨୦୨୧ରେ ଘଟିଥିବା ଅଗ୍ନିକାଣ୍ଡରେ ୧୮ ଜଣଙ୍କ ପ୍ରାଣ ଯାଇଥିଲା।
କଟକସ୍ଥିତ ଏସ୍ସିବି ମେଡିକାଲ କଲେଜ ଆଣ୍ଡ୍ ହସ୍ପିଟାଲ ସମେତ ଉପରଲିଖିତ ଡାକ୍ତରଖାନାଗୁଡ଼ିକ ଗୋଟିଏ ଶିକ୍ଷା ଦେଉଛି। ଘରୋଇ ହେଉ କିମ୍ବା ସରକାରୀ, ସମସ୍ତେ ନିଜର ପ୍ରସାର ଓ ପ୍ରଚାର ଦିଗରେ ଅଧିକ ଗୁରୁତ୍ୱ ଦେଉଛନ୍ତି। ଏହାଫଳରେ ସର୍ବନିମ୍ନ ରକ୍ଷଣାବେକ୍ଷଣ ଓ ସୁରକ୍ଷାଠାରୁ ଧ୍ୟାନ ଦୂରେଇ ଯାଉଛି। ଏହାର ମୁଖ୍ୟ କାରଣ ହେଲା, ସାମ୍ପ୍ରତିକ ଭାରତରେ ପ୍ରଚାରସର୍ବସ୍ବ କାର୍ଯ୍ୟ କଲେ ସମସ୍ତଙ୍କ ଦୃଷ୍ଟି ପଡ଼ିବ। ଉଦାହରଣ ସ୍ବରୂପ ବନ୍ଦେ ଭାରତ ଟ୍ରେନ୍ ଆରମ୍ଭ କରାଯାଉଥିବା ବେଳେ ସାଧାରଣ ଯାତ୍ରୀବାହୀ ଓ ଏକ୍ସପ୍ରେସ୍ ଟ୍ରେନ୍ ବିଳମ୍ବିତ ହେବା ସହିତ ଅସୁରକ୍ଷିତ ଏବଂ ଅପରିଷ୍କାର ହୋଇପଡୁଛି। କେବଳ ବଡ଼ ବଡ଼ କଥା ହୋଇପଡ଼ିଲାଣି ଭାରତୀୟମାନଙ୍କ ଚରିତ୍ର। ସମସ୍ତେ ନିଜର ଦାୟିତ୍ୱକୁ ପାସୋରି ଯାଇ କେବଳ ଅନ୍ୟ ଉପରେ ଦୋଷ ଲଦିବାରେ ବ୍ୟସ୍ତ। ଆଜି ଏହି ଦେଶରେ ସାଧାରଣ ନାଗରିକ ପ୍ରତିଟି ମୁହୂର୍ତ୍ତ ବଞ୍ଚିରହିଛି କେବଳ ତା’ର ଭାଗ୍ୟ ବଳରେ।