ୱାଶିଂଟନ,୩୧।୩: ଇରାନ ଯୁଦ୍ଧ ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜର ସହଯୋଗୀ ଦେଶମାନଙ୍କ ଉପରେ ବର୍ଷିଛନ୍ତି। ଯୁଦ୍ଧରେ ବ୍ୟାକଫୁଟକୁ ଯିବା ପରେ ରାଗିଯାଇ ଟ୍ରମ୍ପ ନିଜର ବନ୍ଧୁ ଦେଶମାନଙ୍କୁ ଏକ ଶକ୍ତ ସନ୍ଦେଶ ଦେଇଛନ୍ତି। ସେ ସ୍ପଷ୍ଟ ଭାବେ କହିଛନ୍ତି ଯେ, ନିଜର ସୁରକ୍ଷା ଏବଂ ଆବଶ୍ୟକତା ପାଇଁ ଏବେ ସହଯୋଗୀ ଦେଶମାନଙ୍କୁ ନିଜେ ଦାୟିତ୍ୱ ନେବାକୁ ପଡ଼ିବ।
ଟ୍ରମ୍ପ ସହଯୋଗୀ ଦେଶମାନଙ୍କୁ ଦୁଇଟି ବିକଳ୍ପ ଦେଇଛନ୍ତି। ସେ କହିଛନ୍ତି ଯେ, ଯେଉଁ ଦେଶଗୁଡ଼ିକ ‘ଷ୍ଟ୍ରେଟ ଅଫ ହର୍ମୁଜ’ (Strait of Hormuz) ବିବାଦ ଯୋଗୁ ଜେଟ୍ ଫୁଏଲ ସମସ୍ୟାର ସମ୍ମୁଖୀନ ହେଉଛନ୍ତି, ସେମାନେ ଆମେରିକାଠାରୁ ତେଲ କିଣିପାରିବେ। ଆମେରିକା ପାଖରେ ପର୍ଯ୍ୟାପ୍ତ ତେଲ ଗଚ୍ଛିତ ଅଛି। ଏହାଛଡ଼ା ସେ ସହଯୋଗୀ ଦେଶମାନଙ୍କୁ ଆହ୍ବାନ ଦେଇ କହିଛନ୍ତି, ନିଜ ସାହସ ଦେଖାନ୍ତୁ ଏବଂ ଦରକାର ପଡ଼ିଲେ ‘ଷ୍ଟ୍ରେଟ ଅଫ ହର୍ମୁଜ୍’ ଉପରେ ନିଜେ ନିୟନ୍ତ୍ରଣ ହାସଲ କରନ୍ତୁ। ଆମେରିକା ସବୁବେଳେ ସାହାଯ୍ୟ ପାଇଁ ଆଗେଇ ଆସିବ ନାହିଁ।
ଟ୍ରମ୍ପ ବ୍ରିଟେନର ନାମ ନେଇ କହିଛନ୍ତି ଯେ, ଇରାନ ବିରୋଧରେ କାର୍ଯ୍ୟାନୁଷ୍ଠାନ ବେଳେ ବ୍ରିଟେନ ସାଥ ଦେଇ ନ ଥିଲା, କିନ୍ତୁ ଏବେ ସେହି ଦେଶକୁ ଇନ୍ଧନ ଅଭାବର ସାମ୍ନା କରିବାକୁ ପଡ଼ୁଛି। ଫ୍ରାନ୍ସ ଉପରେ ଅସନ୍ତୋଷ ପ୍ରକାଶ କରି ଟ୍ରମ୍ପ କହିଛନ୍ତି ଯେ, ଫ୍ରାନ୍ସ ନିଜର ଆକାଶମାର୍ଗ ଦେଇ ଆମେରିକୀୟ ସାମରିକ ବିମାନକୁ ଯିବାକୁ ଅନୁମତି ଦେଇନାହିଁ। ଆମେରିକା ଏହି ଖରାପ ବ୍ୟବହାରକୁ ମନେ ରଖିବ ବୋଲି ସେ ଚେତାବନୀ ଦେଇଛନ୍ତି।
ଇରାନ ଯୁଦ୍ଧ ଯୋଗୁ ମଧ୍ୟପ୍ରାଚ୍ୟରେ ସ୍ଥିତି ଅତ୍ୟନ୍ତ ଗମ୍ଭୀର ହୋଇଛି। ଏପର୍ଯ୍ୟନ୍ତ ହୋଇଥିବା ମୃତ୍ୟୁ ସଂଖ୍ୟା ଦେଖିଲେ,ଇସ୍ରାଏଲ ଏବଂ ଆମେରିକା ଆକ୍ରମଣରେ ପ୍ରାୟ ୧,୯୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। ଏଠାରେ କମରୁ କମ ୧,୨୦୦ ଲୋକ ପ୍ରାଣ ହରାଇଛନ୍ତି। ଯୁଦ୍ଧରେ ଏପର୍ଯ୍ୟନ୍ତ ୧୩ ଜଣ ଆମେରିକୀୟ ସୈନିକ ଶହୀଦ ହୋଇଛନ୍ତି। ଏଥିରେ ପ୍ରାୟ ୧୯ ଜଣଙ୍କର ମୃତ୍ୟୁ ହୋଇଛି।
ତେବେ ଟ୍ରମ୍ପଙ୍କ ଏହି ବୟାନରୁ ସ୍ପଷ୍ଟ ଜଣାପଡ଼ୁଛି ଯେ, ଆଗାମୀ ଦିନରେ ଆମେରିକା ନିଜର ବିଦେଶ ନୀତିରେ ବଡ଼ ପରିବର୍ତ୍ତନ କରିପାରେ ଏବଂ ସହଯୋଗୀ ଦେଶମାନଙ୍କୁ ନିଜ ଗୋଡ଼ରେ ନିଜେ ଠିଆ ହେବାକୁ ବାଧ୍ୟ କରିପାରେ।
Dharitri – Odisha’s No.1 Odia Daily