ନୂଆଦିଲ୍ଲୀ,୨୪।୨: ୱେଷ୍ଟଇଣ୍ଡିଜ ବ୍ୟାଟ୍ସମ୍ୟାନ ଶିମରନ ହେଟମେୟର ଟି-୨୦ ବିଶ୍ୱକପ୍ରେ ଏକ ଭିନ୍ନ ଶୈଳୀ ନଜର ଆସିଛନ୍ତି। ଏହି ବାମହାତୀ ବ୍ୟାଟ୍ସମ୍ୟାନ ସୁପର ୮ ମ୍ୟାଚ୍ରେ ଜିମ୍ବାୱେ ବିପକ୍ଷରେ ମାତ୍ର ୧୯ ବଲ୍ରେ ଅର୍ଦ୍ଧଶତକ ହାସଲ କରିଥିଲେ। ହେଟମେୟରଙ୍କ ଏହି ଅର୍ଦ୍ଧଶତକ ଏକ ରେକର୍ଡ ଭାଙ୍ଗିବା ଇନିଂସ। ସେ ଟି-୨୦ ବିଶ୍ୱକପ୍ରେ ୱେଷ୍ଟଇଣ୍ଡିଜ ପାଇଁ ଅର୍ଦ୍ଧଶତକ ହାସଲ କରିଥିବା ଦ୍ରୁତତମ ଖେଳାଳି ହୋଇଛନ୍ତି। ଆଶ୍ଚର୍ଯ୍ୟଜନକ କଥା ହେଉଛି ହେଟମେୟର ନିଜର ରେକର୍ଡ ଭାଙ୍ଗିଛନ୍ତି।
ହେଟମେୟର ଏହି ଟି-୨୦ ବିଶ୍ୱକପ୍ର ପ୍ରଥମ ମ୍ୟାଚ୍ରେ ସ୍କଟଲାଣ୍ଡ ବିପକ୍ଷରେ ୨୨ ବଲ୍ରେ ଅର୍ଦ୍ଧଶତକ ହାସଲ କରିଥିଲେ। ଏହା ଟି-୨୦ ବିଶ୍ୱକପ୍ରେ ୱେଷ୍ଟଇଣ୍ଡିଜ ପାଇଁ ସବୁଠାରୁ ଦ୍ରୁତତମ ଅର୍ଦ୍ଧଶତକ ଥିଲା। କିନ୍ତୁ ମାତ୍ର ୧୬ ଦିନ ପରେ, ହେଟମେୟର ନିଜ ରେକର୍ଡ ଭାଙ୍ଗିଥିଲେ। ସେ ୩୪ ବଲ୍ରେ ୭ ଛକା ଏବଂ ୭ ଚୌକା ମାରି ୮୫ ରନ୍ର ଏକ ଅବିଶ୍ୱସନୀୟ ଇନିଂସ ଖେଳିଥିଲେ।
ତୃତୀୟ ଓଭରରେ ଶିମରନ ହେଟମେୟର କ୍ରିଜ୍ରେ ପାଦ ଦେଇଥିଲେ। ବ୍ରାଣ୍ଡନ କିଙ୍ଗ ମାତ୍ର ୯ ରନ କରି ଆଉଟ ହୋଇଥିଲେ ଏବଂ ହେଟମେୟର ତାଙ୍କ ପ୍ରଥମ ବଲରୁ ଚୌକା ମାରି ତାଙ୍କ ଉଦ୍ଦେଶ୍ୟ ସ୍ପଷ୍ଟ କରିଥିଲେ। ସେ ୫ମ ଓଭରରେ ଲଗାତାର ତିନୋଟି ଚୌକା ମାରିଥିଲେ ଏବଂ ୭ମ ଏବଂ ୮ମ ଓଭରରେ ମିଶି ତିନୋଟି ବଲରୁ ତିନୋଟି ଛକା ମାରିଥିଲେ। ହେଟମେୟର ଏକ ଛକା ସହିତ ତାଙ୍କର ଅର୍ଦ୍ଧଶତକ ପୂରଣ କରିଥିଲେ। ସେ ତାଙ୍କ ଅର୍ଦ୍ଧଶତକ ସମୟରେ ପାଞ୍ଚଟି ଛକା ମାରିଥିଲେ। ତଥାପି ସେ କ୍ରିସ ଗେଲଙ୍କ ଦ୍ରୁତତମ ଶତକର ରେକର୍ଡ ଭାଙ୍ଗିପାରି ନ ଥିଲେ।