ଝାରସୁଗୁଡ଼ାସ୍ଥିତ ଇନଫିନିଟି ଭେଞ୍ଚରର ପରିଚାଳନା ନିର୍ଦ୍ଦେଶକ ହେଉଛନ୍ତି ପଓ୍ବନ କୁମାର ସୁଲତାନିଆ। ଜଣେ ସଫଳ ବ୍ୟବସାୟୀ ଭାବେ ତାଙ୍କର ବେଶ୍ ଖ୍ୟାତି ରହିଛି। ପଓ୍ବନଙ୍କ ବ୍ୟବସାୟିକ ଯାତ୍ରା ଯୁବୋଦ୍ୟୋଗୀଙ୍କ ପ୍ରେରଣାର ଉତ୍ସ ପାଲଟିଥିବାବେଳେ ତାଙ୍କର ସାମଗ୍ରିକ ଯାତ୍ରା ସମ୍ପର୍କରେ ଧରିତ୍ରୀ ପକ୍ଷରୁ ତାଙ୍କ ସହ ସ୍ବତନ୍ତ୍ର ଆଲୋଚନା…
ପ୍ର- ପ୍ରାରମ୍ଭିକ ଯାତ୍ରା ସମ୍ପର୍କରେ ସଂକ୍ଷେପରେ କହିବେ କି?
ଉ-୧୯୪୭ରେ ଆମେ ପଶ୍ଚିମ ଓଡ଼ିଶା ପାଇଁ ପ୍ରଥମ ଚ୍ୟାନେଲ ପାର୍ଟନର ଭାବେ ଆମର ଯାତ୍ରା ଆରମ୍ଭ କରିଥିଲୁ। ପ୍ରାରମ୍ଭରେ ଆମେ ଆଇଟିସି ଲିମିଟେଡ ଏବଂ ନେସ୍ଲେ ଲିମିଟେଡ୍ ପରି ଅଗ୍ରଣୀ କମ୍ପାନୀ ସହ ସହଭାଗୀ ହୋଇ ଏଫ୍ଏମ୍ସିଜି ସେକ୍ଟରରେ କାର୍ଯ୍ୟ କରିଥିଲୁ। ୨୦୧୧ରେ ମୋ ପୁଅ ସ୍ନାତକୋତ୍ତର ସମାପ୍ତ କରିବା ପରେ ବ୍ୟବସାୟରେ ଯୋଗଦେଇଥିଲେ। ଅଟୋ ମୋବାଇଲ୍ ଶିଳ୍ପରେ ଭବିଷ୍ୟତ ଗଢ଼ିବା ସବୁବେଳେ ତାଙ୍କ ମନରେ ଥିଲା। ଆମେ ହୁଣ୍ଡାଇ ମୋଟର ଇଣ୍ଡିଆ ଲିମିଟେଡ୍ରେ ଡିଲରଶିପ୍ ପାଇଁ ଆବେଦନ କରିବା ପରେ ମନୋନୀତ ହେଲୁ। ଆମେ ଆନୁଷ୍ଠାନିକ ଭାବରେ ୨୦୧୫ରେ ଅଟୋମୋବାଇଲ ଶିଳ୍ପରେ ଆମର କାର୍ଯ୍ୟ ଆରମ୍ଭ କଲୁ।
ପ୍ର- ରାଜ୍ୟରେ ୪ ଚକିଆ ଯାନର ବଜାର ସ୍ଥିତି କ’ଣ ରହିଛି?
ଉ- ଓଡ଼ିଶାର କାର ଶିଳ୍ପ ମଧ୍ୟମ ଅଭିବୃଦ୍ଧିରେ ଅଛି, ମାତ୍ର ଗ୍ରାହକଙ୍କ ଚାହିଦା ହ୍ୟାଚ୍ବ୍ୟାକ୍ରୁ ଏସ୍ୟୁଭିକୁ ପରିବର୍ତ୍ତନ ହୋଇଛି। ଏସ୍ୟୁଭି ଚୟନ କରୁଥିବା ଲୋକଙ୍କ ସଂଖ୍ୟା ବଢ଼ୁଛି। ଲୋକଙ୍କ ପସନ୍ଦ ବିଶେଷ ଭାବେ କୋଭିଡ୍ ପରେ ପରିବର୍ତ୍ତନ ହୋଇଛି। ଲୋକମାନେ ବର୍ତ୍ତମାନ ବୈଦ୍ୟୁତିକ ଯାନ, ଆଡାସ୍ (ଉନ୍ନତ ଗ୍ରାହକ ସହାୟକ ପଦ୍ଧତି) ସୁରକ୍ଷା ବୈଶିଷ୍ଟ୍ୟଯୁକ୍ତ ଯାନ ଏବଂ ଭାଇବ୍ରେଟ୍ କଲର ବାଛୁଛନ୍ତି।
ପ୍ର- ରାଜ୍ୟର ଜଣେ ପ୍ରମୁଖ ଡିଲର ହୋଇଥିବା ସତ୍ତ୍ୱେ କେଉଁ ସବୁ ଆହ୍ବାନ ଦେଇ ଗତି କରିଥା’ନ୍ତି?
ଉ- କୁଶଳୀ ମାନବସମ୍ବଳର ଅଭାବ ରହୁଛି। ଗତ ୩ ବର୍ଷ ମଧ୍ୟରେ ଡିଲରଶିପ୍ ସଂଖ୍ୟା ଖୁବ୍ ବୃଦ୍ଧି ପାଇଛି। ତେଣୁ ଅଟୋମୋବାଇଲ ଶିଳ୍ପରେ ଅଧିକରୁ ଅଧିକ ଦକ୍ଷ ମାନବସମ୍ବଳର ଆବଶ୍ୟକତା ରହିଛି। ସେମାନଙ୍କୁ ତାଲିମ୍ ପ୍ରଦାନର ଯଥେଷ୍ଟ ଆବଶ୍ୟକତା ରହିଛି।
ପ୍ର- ବୈଦ୍ୟୁତିକ ଯାନର ସ୍ଥାୟିତ୍ୱ ସମ୍ପର୍କରେ ଆପଣ କ’ଣ ବିଚାର କରୁଛନ୍ତି?
ଉ- ବୈଦ୍ୟୁତିକ ଯାନକୁ ଲୋକମାନେ ପସନ୍ଦ କରୁଛନ୍ତି। ମାତ୍ର ଏ କ୍ଷେତ୍ରରେ ଚାର୍ଜିଂ ଭିତ୍ତିଭୂମି ଭଳି ଆହ୍ବାନ ରହିଛି। ତେବେ ଏହା ଜୀବାଶ୍ମ ଇନ୍ଧନ ପାଇଁ ଏକ ବହୁତ ଭଲ ବିକଳ୍ପ। ବର୍ତ୍ତମାନ ବିଭିନ୍ନ ରେଞ୍ଜ୍ର ଉତ୍ପାଦ ବଜାରରେ ଉପଲବ୍ଧ। ଗ୍ରାହକ ଥରେମାତ୍ର ଚାର୍ଜ କରି ୪୭୩ କିଲୋମିଟର ପର୍ଯ୍ୟନ୍ତ ଯାଇପାରିବେ। ବର୍ତ୍ତମାନ ୮ ବର୍ଷ କିମ୍ବା ୧.୬ ଲକ୍ଷ କିଲୋମିଟରର ଭଲ ୱାରେଣ୍ଟି ପ୍ରଦାନ କରାଯାଉଛି। ଫଳରେ ଏହା ଗ୍ରାହକଙ୍କ ବିଶ୍ୱାସଭାଜନ ମଧ୍ୟ ହୋଇପାରୁଛି।
ପ୍ର- ଗ୍ରାହକଙ୍କୁ ସନ୍ତୋଷଜନକ ସେବା ପ୍ରଦାନ କେତେ ଗୁରୁତ୍ୱ ବହନ କରେ? ଯୁବ ଉଦ୍ୟୋଗୀଙ୍କୁ କ’ଣ ପରାମର୍ଶ ଦେବେ?
ଉ- ଏହି ଶିଳ୍ପରେ ଗ୍ରାହକଙ୍କୁ ଉତ୍ତମ ସେବା ପ୍ରଦାନ ଆମର ପ୍ରାଥମିକତା। ସେବା ଗ୍ରାହକଙ୍କୁ ବାନ୍ଧି ରଖିବାରେ ଯଥେଷ୍ଟ ସାହାଯ୍ୟ କରେ। ଏହି କ୍ଷେତ୍ରରେ ଭବିଷ୍ୟତ ଗଢ଼ିବାକୁ ଚାହୁଁଥିବା ଲୋକମାନେ ପ୍ରଥମେ ନିଜ ଗ୍ରାହକଙ୍କୁ ସର୍ବାଧିକ ଗୁରୁତ୍ୱ ଦେବା ଉଚିତ। ସେହିପରି ଦକ୍ଷ କର୍ମଚାରୀ ନିୟୋଜିତ କରିବା ଏବଂ ସେମାନଙ୍କୁ ସବୁବେଳେ ଖୁସି ରଖିବା ଦରକାର। ସେହିପରି ବାହ୍ୟ ଦୁନିଆ ଅନୁସାରେ ନିଜ ସଂସ୍ଥାକୁ ଅପଗ୍ରେଡ୍ କରିବା ଆବଶ୍ୟକ।
-ସାକ୍ଷାତ୍କାର: ଅନୁରାଧା ମହାରଣା, ଭୁବନେଶ୍ୱର