ଲକ୍ଷ୍ନୌ,୧୮।୧୨: ଲକ୍ଷ୍ନୌରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଚତୁର୍ଥ ଟି-୨୦ ମ୍ୟାଚ ବାତିଲ ହୋଇଗଲା। ଜସପ୍ରୀତ ବୁମରାଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏଥିରେ ସେ ପ୍ରବଳ ରାଗିଥିବାର ଦେଖାଯାଉଛି। ବୁମରା ଏତେ ରାଗିଥିଲେ ଯେ, ସେ ଫୋନ ଛଡ଼ାଇ ନେଉଛନ୍ତି। ବୁମରାଙ୍କ ସହିତ ଜଡିତ ଏହି ଭିଡିଓଟି ବିମାନବନ୍ଦରର। ଏଠାରେ ସେ ଧାଡ଼ିରେ ଠିଆ ହୋଇଥିବା ଦେଖାଯାଉଛି। ଜଣେ ପ୍ରଶଂସକଙ୍କ କାର୍ଯ୍ୟ ଦେଖି ସେ ରାଗିଯାନ୍ତି।
ପ୍ରଶଂସକ ମଧ୍ୟ ବିମାନବନ୍ଦରରେ ଧାଡ଼ିରେ ଠିଆ ହୋଇଥିଲେ। ଯେତେବେଳେ ସେ ତାଙ୍କ ପାଖରେ ଧାଡ଼ିରେ ବୁମରାଙ୍କୁ ଦେଖିଲେ, ସେ ଅନୁମତି ବିନା ତାଙ୍କର ଏକ ସେଲ୍ଫି ଭିଡିଓ ଉଠାଇବା ଆରମ୍ଭ କଲେ। ବୁମରା ପ୍ରଥମେ ପ୍ରଶଂସକଙ୍କୁ ଏପରି କରିବାରୁ ବାରଣ କରିଥିଲେ, ତାଙ୍କୁ ଭିଡିଓ ନ ନେବାକୁ ଚେତାବନୀ ଦେଇଥିଲେ। କିନ୍ତୁ ଯେତେବେଳେ ପ୍ରଶଂସକ ତାଙ୍କ ଚେତାବନୀକୁ ଅଣଦେଖା କଲେ, ବୁମରା ତାଙ୍କର ରାଗ ହରାଇ ତାଙ୍କ ଫୋନ ଛଡ଼ାଇ ନେଇ ଫୋପାଡ଼ି ଦେଇଥିଲେ।
ଜସପ୍ରିତ ବୁମରା ବର୍ତ୍ତମାନ ଦକ୍ଷିଣ ଆଫ୍ରିକା ବିପକ୍ଷରେ ଟିମ ଇଣ୍ଡିଆର ଚାଲିଥିବା ଟି-୨୦ ସିରିଜର ଅଂଶ। ସେ କଟକରେ ପ୍ରଥମ ଟି-୨୦ ମ୍ୟାଚରେ ଦୁଇଟି ଉଇକେଟ ନେଇଥିଲେ। ମୁଲାନପୁରରେ ଦ୍ୱିତୀୟ ଟି-୨୦ ମ୍ୟାଚରେ ସେ ଉଇକେଟ୍ ପାଇ ନ ଥିଲେ। ବ୍ୟକ୍ତିଗତ କାରଣରୁ ବୁମରା ଧର୍ମଶାଳାରେ ତୃତୀୟ ଟି-୨୦ ଖେଳିପାରି ନ ଥିଲେ। ଲକ୍ଷ୍ନୌରେ ଖେଳାଯିବାକୁ ଥିବା ଚତୁର୍ଥ ଟି-୨୦ ବାତିଲ କରାଯାଇଥିଲା। ସିରିଜର ପଞ୍ଚମ ଏବଂ ଶେଷ ଟି-୨୦ ଡିସେମ୍ବର ୧୯ରେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯିବାର କାର୍ଯ୍ୟକ୍ରମ ରହିଛି।