ଥୁଆମୂଳ ରାମପୁର,୧୬।୩ (ଦୁର୍ଗା କୀର୍ତ୍ତି): କଳାହାଣ୍ଡ ଜିଲା ଥୁଆମୂଳ ରାମପୁର ବ୍ଲକ ଅଧୀନସ୍ଥ ଗୁଣୁପୁର ଗ୍ରାମପଞ୍ଚାୟତରୁ ଆସିଛି ଏକ ଲଜ୍ଜାଜନକ ତଥ୍ୟ। ଯେଉଁ ପଞ୍ଚାୟତ ବ୍ଲକ ଅଧ୍ୟକ୍ଷ ଦୟାନିଧି ମାଝୀ ଏବଂ ଜିଲା ପରିଷଦ ସଦସ୍ୟା ଟୁନି ଖୋସ୍ଲା ଅଛନ୍ତି, ସେହିଠାରେ ହିଁ ଜଣେ ଗରିବ ପରିବାର ମୌଳିକ ସୁବିଧାରୁ ବଞ୍ଚିତ ହୋଇ ପଲିଥିନ ତଳେ ଜୀବନ ବିତାଉଛନ୍ତି। ଗ୍ରାମପଞ୍ଚାୟତ କାର୍ଯ୍ୟାଳୟଠାରୁ ମାତ୍ର ୬ କିଲୋମିଟର ଦୂରରେ ରହୁଛନ୍ତି ହାନ୍ଦୁ ମାଝୀ। ପରିବାରରେ ସ୍ତ୍ରୀ ସିଙ୍ଗାରା ମାଝୀ, ପୁଅ ସନ୍ଦୀପ, ସୁଶାନ୍ତ ଏବଂ ଝିଅ କୁମୁଦିନୀଙ୍କୁ ନେଇ ମୋଟ ୫ ଜଣିଆ ସଦସ୍ୟ। ଗତବର୍ଷ ପ୍ରାକୃତିକ ବିପର୍ଯ୍ୟୟରେ ଘର ଭାଙ୍ଗିଯିବା ପରେ ପ୍ରଶାସନ ଦେଇଥିବା ପଲିଥିନ ଖଣ୍ଡିକ ହିଁ ଏବେ ସେମାନଙ୍କର ଏକମାତ୍ର ଭରସା। ପାଇଖାନା ପାଖରେ ଝାଟିମାଟିର କୁଡ଼ିଆ ତିଆରି କରି ଏମାନେ ବର୍ଷା, ଶୀତ ଓ ଖରାରେ ଯେଉଁଭଳି ଅବସ୍ଥାରେ ରହୁଛନ୍ତି, ତାହା ବର୍ଣ୍ଣନା କରିବା ବାହାରେ। ବଡ଼ ବିଡ଼ମ୍ବନାର ବିଷୟ। ଏହି ପରିବାର ଜନ ପ୍ରତିନିଧିମାନଙ୍କ ନିଜ ପଞ୍ଚାୟତରେ ରହୁଥିବା ସତ୍ତ୍ୱେ କେହି ଦୁଃଖ ବୁଝିବାକୁ ପ୍ରସ୍ତୁତ ନୁହନ୍ତି। ୱାର୍ଡମେମ୍ବରଙ୍କ ଠାରୁ ଆରମ୍ଭ କରି ସରପଞ୍ଚ ସୁଜାତା ମାଝୀ ଏବଂ ବ୍ଲକ ପ୍ରଶାସନକୁ ବାରମ୍ବାର ଗୁହାରି ଜଣାଇଥିଲେ ମଧ୍ୟ ସମସ୍ତେ ମୁହଁ ଫେରାଇ ନେଇଛନ୍ତି। ସରପଞ୍ଚଙ୍କ ସଫେଇ “ମୁଁ ଅବଗତ ନଥିଲି” ବୋଲି କହିବା ପରେ, ବ୍ଲକ ଅଧ୍ୟକ୍ଷ ଓ ଜିଲା ପରିଷଦ ସଦସ୍ୟାଙ୍କ ଭୂମିକାକୁ ନେଇ ପ୍ରଶ୍ନ ଉଠିଛି। ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି ଯେ, ଯଦି ଜନପ୍ରତିନିଧିମାନେ ନିଜ ପଞ୍ଚାୟତର ୬ କିଲୋମିଟର ଭିତରେ ଥିବା ଏହି ଅସହାୟ ପରିବାରକୁ ସହାୟତା ଦେବାରେ ବିଫଳ, ତେବେ ବ୍ଲକର ଅନ୍ୟ ୨୩ଟି ପଞ୍ଚାୟତର ଦୁଃଖ ସେମାନେ କିପରି ବୁଝୁଥିବେ? ସରକାରୀ ଯୋଜନା କେବଳ କାଗଜପତ୍ରରେ ରହିବ ନା ପ୍ରକୃତ ଗରିବଙ୍କ ପାଖରେ ପହଞ୍ଚିବ, ତାହା ଏବେ ବଡ଼ ପ୍ରଶ୍ନ। ତୁରନ୍ତ ପ୍ରଶାସନ ଏ ଦିଗରେ ହସ୍ତକ୍ଷେପ କରି ଉକ୍ତ ପରିବାରକୁ ପକ୍କା ଘର ଯୋଗାଇ ଦେବାକୁ ଜନସାଧାରଣରେ ଦାବି ଜୋର ଧରିଛି।