କୋଲକାତା,୨୧।୨: ଆଗାମୀ ପଶ୍ଚିମବଙ୍ଗ ବିଧାନସଭା ନିର୍ବାଚନ ପାଇଁ ଭାରତୀୟ ଜନତା ପାର୍ଟି (ଭାଜପା) ଏକ ବଡ଼ ରଣନୀତି ପ୍ରସ୍ତୁତ କରିଛି। ମମତା ବାନାର୍ଜୀଙ୍କ ସରକାରକୁ କ୍ଷମତାରୁ ହଟାଇବା ପାଇଁ ଦଳ ସାରା ରାଜ୍ୟରେ ୯ଟି ପରିବର୍ତ୍ତନ ଯାତ୍ରା ବାହାର କରିବାକୁ ଘୋଷଣା କରିଛି। ଏହି ଯାତ୍ରା ମାଧ୍ୟମରେ ରାଜ୍ୟର ସମସ୍ତ ବିଧାନସଭା କ୍ଷେତ୍ରକୁ କଭର୍ କରିବା ପାଇଁ ଲକ୍ଷ୍ୟ ରଖାଯାଇଛି।
ଏହି ସମୟରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଗୃହ ମନ୍ତ୍ରୀ ଅମିତ ଶାହ,ସ୍ବାସ୍ଥ୍ୟ ମନ୍ତ୍ରୀ ଜେ.ପି. ନଡ୍ଡା, ନିତିନ ଗଡ଼କରୀ ଏବଂ ଓଡ଼ିଶାରୁ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭଳି ହେଭିୱେଟ ନେତାମାନେ ଅଲଗା ଅଲଗା ସ୍ଥାନରେ ଉପସ୍ଥିତ ରହିବେ। ଏହି ଅବସରରେ ୬୦ରୁ ଅଧିକ ବଡ଼ ଜନସଭା ଏବଂ ୩୦୦ରୁ ଅଧିକ ଛୋଟ ସଭା ଆୟୋଜନ କରାଯିବ। କୋଲକାତାର ୨୯ଟି ବିଧାନସଭା କ୍ଷେତ୍ରରେ ସ୍ବତନ୍ତ୍ର ପ୍ରଚାର ଗାଡ଼ି ଓ କ୍ୟାମ୍ପେନ କରାଯିବ।
ଏହି ପରିବର୍ତ୍ତନ ଯାତ୍ରା ଦୁଇଟି ପର୍ଯ୍ୟାୟରେ ଆରମ୍ଭ ହେବ। ପ୍ରଥମ ପର୍ଯ୍ୟାୟ (ମାର୍ଚ୍ଚ ୧)ରେ କୁଚବିହାର, କ୍ରିଷ୍ଣାନଗର, କୁଲଟି, ଗରବେଟା ଏବଂ ରାୟଦିଘିରୁ ଯାତ୍ରା ଆରମ୍ଭ ହେବ। ସେହିଭଳି ଦ୍ୱିତୀୟ ପର୍ଯ୍ୟାୟ (ମାର୍ଚ୍ଚ ୨)ରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ହାୱଡ଼ାରୁ ଯାତ୍ରାର ଶୁଭାରମ୍ଭ କରିବେ। ଏହା ବ୍ୟତୀତ ଇସଲାମପୁର, ସନ୍ଦେଶଖାଲି, ହାସନ ଏବଂ ଅମତା କ୍ଷେତ୍ରରୁ ମଧ୍ୟ ଯାତ୍ରା ବାହାରିବ।
ହୋଲି ପାଇଁ ମାର୍ଚ୍ଚ ୩ ଏବଂ ୪ ତାରିଖରେ ଯାତ୍ରା ସ୍ଥଗିତ ରହିବ ଏବଂ ମାର୍ଚ୍ଚ ୫ରୁ ପୁଣି ଥରେ ଆରମ୍ଭ ହେବ। ଏହି ୯ଟି ଯାତ୍ରା ମୋଟ ୫,୦୦୦ କିଲୋମିଟର ପଥ ଅତିକ୍ରମ କରିବ। ମାର୍ଚ୍ଚ ଶେଷ ସପ୍ତାହରେ କୋଲକାତାରେ ଏହି ସମସ୍ତ ଯାତ୍ରାର ସମାପନ ହେବ। ଏହି ଅବସରରେ ଏକ ବିଶାଳ ସମାବେଶ ଆୟୋଜିତ ହେବ, ଯାହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମ୍ବୋଧିତ କରିବେ। କହିରଖୁଛୁ, ୨୦୨୧ ର୍ନିବାଚନରେ ଭାଜପା ୭୭ଟି ସିଟ ଜିତି ମୁଖ୍ୟ ବିରୋଧୀ ଦଳର ମାନ୍ୟତା ପାଇଥିଲା। ଏଥର ଦଳ ସମ୍ପୂର୍ଣ୍ଣ ଶକ୍ତି ଲଗାଇ ଟିଏମସି (TMC) କୁ କଡ଼ା ଟକ୍କର ଦେବାକୁ ପ୍ରସ୍ତୁତି କରିଛି।
Dharitri – Odisha’s No.1 Odia Daily