ଗୁଆହାଟୀ,୨୨ା୨: ଆସାମ କଂଗ୍ରେସର ପୂର୍ବତନ ସଭାପତି ଭୁପେନ କୁମାର ବୋରା ରବିବାର ଆନୁଷ୍ଠାନିକ ଭାବେ ଭାଜପାରେ ସାମିଲ ହୋଇଛନ୍ତି। ବିଧାନସଭା ନିର୍ବାଚନ ପୂର୍ବରୁ ରାଜ୍ୟରେ ଏକ ବଡ଼ ରାଜନୈତିକ ପଟ୍ଟ ପରିବର୍ତ୍ତନ ହୋଇଛି। ଗୁଆହାଟୀସ୍ଥିତ ଭଜାପା ରାଜ୍ୟ କାର୍ଯ୍ୟାଳୟ ବାଜପେୟୀ ଭବନରେ ଦଳର ରାଜ୍ୟ ସଭାପତି ଦିଲୀପ ସାଇକିଆଙ୍କ ଉପସ୍ଥିତିରେ ବୋରା ଦଳରେ ଯୋଗଦେଇଛନ୍ତି।
ଏହି ଅବସରରେ ପୂର୍ବତନ କଂଗ୍ରେସ କର୍ମୀ ସଞ୍ଜୁ ବୋରା ମଧ୍ୟ ଭାଜପାରେ ସାମିଲ ହୋଇଛନ୍ତି। ଗତ ୧୬ ତାରିଖରେ ଭୁପେନ କଂଗ୍ରେସରୁ ଇସ୍ତଫା ଦେଇଥିବା ବେଳେ ନିଷ୍ପତ୍ତି ବଦଳାଇବା ପାଇଁ ରାହୁଲ ଗାନ୍ଧୀଙ୍କ ସମେତ ଦଳର ବରିଷ୍ଠ ନେତାମାନେ ଜୋର୍ଦାର ଉଦ୍ୟମ ଚଳାଇଥିଲେ। ଆତ୍ମସମ୍ମାନ ଥିବା ଅସମୀୟା କଂଗ୍ରେସ ଛାଡ଼ି ଭାଜପାରେ ଯୋଗଦେବେ ବୋଲି ବୋରା ଗଣମାଧ୍ୟମକୁ କହିଛନ୍ତି।
କଂଗ୍ରେସରେ ସେମାନଙ୍କ ଅବସ୍ଥା ମୃତ୍ୟୁ ପୂର୍ବରୁ ମହାଭାରତର କର୍ଣ୍ଣଙ୍କ ଅବସ୍ଥା ଭଳି ବୋଲି ବୋରା ତୁଳନା କରିଛନ୍ତି। ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା କହିଛନ୍ତି, କଂଗ୍ରେସରେ ପ୍ରାୟ ୩୩ ବର୍ଷ ଧରି କାମ କରିଥିବା ବୋରାଙ୍କର ଉକ୍ତ ଦଳ ପ୍ରତି ଯଥେଷ୍ଟ ଅବଦାନ ରହିଥିଲା। ଆଜିଠାରୁ ସେ ନୂଆ ଜୀବନ ଆରମ୍ଭ କରିବାକୁ ଯାଉଥିବାରୁ ମୁଖ୍ୟମନ୍ତ୍ରୀ ଅଭିନନ୍ଦନ ଜଣାଇଛନ୍ତି।