ବ୍ୟାଙ୍କକ୍,୨ା୭:ଥାଇଲାଣ୍ଡର ସାମ୍ବିଧାନିକ ଅଦାଲତ ମଙ୍ଗଳବାର ଦେଶର ପ୍ରଧାନମନ୍ତ୍ରୀ ପାଏଟୋଙ୍ଗଟାର୍ନ ଶିନାଓ୍ବାତ୍ରାଙ୍କୁ କର୍ତ୍ତବ୍ୟରୁ ନିଲମ୍ବନ କରିଛନ୍ତି। ଫଳରେ ଥାଇଲାଣ୍ଡ ସରକାରଙ୍କୁ ବଡ଼ ଝଟକା ଲାଗିଛି। କାମ୍ବୋଡିଆର ପ୍ରଭାବଶାଳୀ ପୂର୍ବତନ ନେତା ହୁନ୍ ସେନ୍ଙ୍କ ସହ ଏକ ସମ୍ବେଦନଶୀଳ ଟେଲିଫୋନ୍ ବାର୍ତ୍ତାଳାପକୁ ଲିକ୍ କରାଯାଇଥିବାରୁ ଶିନାଓ୍ବାତ୍ରା ଅସାଧୁ ଉପାୟ ଅବଲମ୍ବନ କରିବା ସହ ନୈତିକ ମାନଦଣ୍ଡର ଉଲ୍ଲଂଘନ କରିଥିବା ନେଇ ୩୬ ଜଣ ସିନେଟର ତାଙ୍କ ବିରୋଧରେ ଗମ୍ଭୀର ଅଭିଯୋଗ ଆଣିଥିଲେ। ଆଞ୍ଚଳିକ ବିବାଦକୁ ପ୍ରଶମିତ କରିବା ଏବଂ ସୀମାରେ ସେନା ମୁତୟନଜନିତ ଉତ୍ତେଜନା ହ୍ରାସ କରିବା ଉକ୍ତ ବାର୍ତ୍ତାଳାପର ଉଦ୍ଦେଶ୍ୟ ଥିଲା। ଜୁନ୍ ୧୫ ତାରିଖର ଏହି ଟେଲିଫୋନ୍ କଲ୍ ଲିକ୍ ଯୋଗୁ ଘରୋଇ ଉତ୍ତେଜନା ବଢ଼ିବା ସହ ଶିନାଓ୍ବାତ୍ରାଙ୍କ ନେତୃତ୍ୱାଧୀନ ମେଣ୍ଟରୁ ଏକ ବଡ଼ ଦଳ ସମର୍ଥନ ପ୍ରତ୍ୟାହାର କରିବାରୁ ଏହାର ସଂଖ୍ୟାଗରିଷ୍ଠତା ହ୍ରାସ ପାଇଥିଲା। ଶିନାଓ୍ବାତ୍ରା ଦେଶର ସାର୍ବଭୌମତ୍ୱକୁ ଦୁର୍ବଳ କରିଥିବା ଉକ୍ତ ଦଳ ଅଭିଯୋଗ କରିଥିବାବେଳେ ନୂଆ ସରକାର ଦାବିରେ ବିକ୍ଷୋଭକାରୀ ସଂଗଠନଗୁଡ଼ିକ ଆନ୍ଦୋଳନ ବଢ଼ାଇବାକୁ ଧମକ ଦେଇଥିଲେ।
ଶିନାଓ୍ବାତ୍ରା କ୍ଷମତାରେ ରହିବାର ମାତ୍ର ୧୦ ମାସ ପରେ କ୍ଷମତା ସଂଘର୍ଷର ସମ୍ମୁଖୀନ ହୋଇଛନ୍ତି। ସେନା ସମର୍ଥତ୍ତ ପ୍ରତିଷ୍ଠାନ ଏବଂ ବିଲିୟନେୟାର ଶିନାଓ୍ବାତ୍ରାଙ୍କ ବଂଶ ମଧ୍ୟରେ ୨ ଦଶନ୍ଧି ହେଲା କ୍ଷମତା ଲଢ଼େଇ ଜାରି ରହିଛି। ୨ ଥର ସେନା ବିଦ୍ରୋହ ଏବଂ ଅଦାଲତଙ୍କ ନିର୍ଦ୍ଦେଶକ୍ରମେ ଅନେକ ଦଳ ଓ ପ୍ରଧାନମନ୍ତ୍ରୀ କ୍ଷମତାଚ୍ୟୁତ ହୋଇଛନ୍ତି। ଶିନାଓ୍ବାତ୍ରା କୋର୍ଟଙ୍କ ମଙ୍ଗଳବାରର ନିଷ୍ପତ୍ତିକୁ ଗ୍ରହଣ କରିବା ସହ ଟେଲିଫୋନ୍ ବାର୍ତ୍ତାଳାପ ପ୍ରଘଟ ପାଇଁ ହୁନ୍ ସେନ୍ଙ୍କୁ କ୍ଷମା ମାଗିଛନ୍ତି। ଏଥିସହ ସେ ଥାଇଲାଣ୍ଡ ସୈନ୍ୟବାହିନୀକୁ ସମାଲୋଚନା କରିଛନ୍ତି। ଦେଶ ପାଇଁ କାମ କରିବା ଏବଂ ସାର୍ବଭୌମତ୍ୱ ବଜାୟ ରଖିବା ସହମତ ଆମର ସମସ୍ତ ସୈନ୍ୟଙ୍କ ଜୀବନ ରକ୍ଷା କରିବା ବାର୍ତ୍ତାଳାପ ପ୍ରଘଟ ପଛରେ ତାଙ୍କର ପ୍ରକୃତ ଉଦ୍ଦେଶ୍ୟ ଥିଲା ବୋଲି ଶିନାଓ୍ବାତ୍ରା ଗଣମାଧ୍ୟମକୁ କହିଛନ୍ତି।