ଭଞ୍ଜନଗର,୭।୬(ବାବୁଲା ପ୍ରଧାନ): ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ଼ ମୁକେଶ ମହାଲିଙ୍ଗ ଶନିବାର ସନ୍ଧ୍ୟାରେ ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡ ମେଡ଼ିକାଲ ପରିଦର୍ଶନ କରିଛନ୍ତି। ଏହି ସମୟରେ ସେ ମେଡ଼ିକାଲର ବିଭିନ୍ନ ୱାର୍ଡ ବୁଲି ଦେଖିବା ସହ ରୋଗୀମାନଙ୍କୁ ସ୍ବାସ୍ଥ୍ୟସେବା କିଭଳି ମିଳୁଛି ପଚାରି ବୁଝିଥିଲେ। ଏହାପରେ ମେଡ଼ିକାଲ ସମ୍ମିଳନୀ କକ୍ଷରେ ସମୀକ୍ଷା କରିଥିଲେ।
ସମୀକ୍ଷା ସମୟରେ ମନ୍ତ୍ରୀ ମେଡ଼ିକାଲର ସମସ୍ତ ସମସ୍ୟାକୁ ଖୁବ୍ଶୀଘ୍ର ପୂରଣ କରାଯିବ ବୋଲି କହିଥିଲେ। ସିଟି ସ୍କାନ ସୁବିଧା ଆଗାମୀ ଦିନରେ ଏଠାରେ ମିଳିବ। ନୂତନ ଡାକ୍ତର ନିଯୁକ୍ତି ପ୍ରକ୍ରିୟା ଚାଲିଛି। ନୂତନ ନିଯୁକ୍ତିରେ ଏହି ମେଡ଼ିକାଲକୁ ପ୍ରାଧାନ୍ୟ ଦିଆଯିବ। ସ୍ବାସ୍ଥ୍ୟବୀମା କାର୍ଡ଼ ପ୍ରଦାନରେ ଗଞ୍ଜାମ ଜିଲା ରାଜ୍ୟରେ ବର୍ତ୍ତମାନ ସୁଦ୍ଧା ପ୍ରଥମ ଅଛି ା ଅନ୍ୟାନ୍ୟ ବିକାଶ କ୍ଷେତ୍ରରେ ଗଞ୍ଜାମ ଜିଲା ଆଗୁଆ ଅଛି। ସବୁଠାରୁ ଅଧିକ ଅନୁଦାନ ଗଞ୍ଜାମ ଜିଲାକୁ ପ୍ରଦାନ କରାଯାଉଛି ବୋଲି ମନ୍ତ୍ରୀ କହିଥିଲେ।
ଏଥିସହ ମନ୍ତ୍ରୀ କହିଥିଲେ ଯେ ଫୁଲବାଣୀରେ ଆଜିଠାରୁ ମେଡ଼ିକାଲ କଲେଜ ଖୋଲିବା ପରେ ଏଠାକାର ରୋଗୀ ଫୁଲବାଣୀ ଯାଇ ଉନ୍ନତ ସ୍ବାସ୍ଥ୍ୟସେବା ପାଇପାରିବେ। ଭଞ୍ଜନଗର ମେଡ଼ିକାଲ ସବୁ କ୍ଷେତ୍ରରେ ଭଲ ଅଛି। ଆଗାମୀ ଦିନରେ ଫୁଲବାଣୀ ମେଡ଼ିକାଲ କଲେଜରୁ ସପ୍ତାହକୁ ୩ ଦିନ କିଛି ଡ଼ାକ୍ତର ଭଞ୍ଜନଗର ଆସି ଏଠାରେ ଲୋକଙ୍କୁ ସ୍ବାସ୍ଥ୍ୟ ସେବା ଯୋଗାଇବେ। ଭଞ୍ଜନଗର ମେଡ଼ିକାଲକୁ ଜିଲା ମେଡ଼ିକାଲ ମାନ୍ୟତା ଦେବା ପାଇଁ ପଦକ୍ଷେପ ନିଆଯାଇଛି ବୋଲି ମନ୍ତ୍ରୀ ଆଲୋଚନା ସମୟରେ କହିଥିଲେ। ସୁସ୍ଥ ଓଡ଼ିଶା ପାଇଁ ଡବଲ ଇଞ୍ଜିନ ସରକାର ପଦକ୍ଷେପ ନେଇଛନ୍ତି। ତେଣୁ ପ୍ରତ୍ୟେକ ପଞ୍ଚାୟତରେ ଗୋଟିଏ ଲେଖାଏ ସ୍ବାସ୍ଥ୍ୟକେନ୍ଦ୍ର ନିର୍ମାଣ ହେଉଛି। ଏହାଦ୍ୱାରା ଲୋକେ ଘର ପାଖରେ ସ୍ବାସ୍ଥ୍ୟ ସେବା ପାଇପାରୁଛନ୍ତି ବୋଲି ମନ୍ତ୍ରୀ କହିଥିଲେ।
ଆଲୋଚନାରେ ଭାଗ ନେଇ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ କହିଥିଲେଯେ ମୁଁ ସ୍ବାସ୍ଥ୍ୟମନ୍ତ୍ରୀଙ୍କୁ ଭେଟି ଆମ ମେଡ଼ିକାଲର ସମସ୍ୟାଗୁଡ଼ିକୁ ସମାଧାନ କରିବା ପାଇଁ ଅନେକଥର ଅନୁରୋଧ କରିଛି। ମୋ ଅନୁରୋଧକୁ ମନ୍ତ୍ରୀ ରକ୍ଷାକରି ମେଡ଼ିକାଲର ସମସ୍ୟାକୁ ସମାଧାନ କରୁଛନ୍ତି। ଆଗାମୀ ଦିନରେ ମେଡ଼ିକାଲର ଆହୁରି କିଛି ଉନ୍ନତି କରିବାର ଅଛି। ଏଥିପାଇଁ ରାଜ୍ୟ ସରକାର ପଦକ୍ଷେପ ନେଉଛନ୍ତି ବୋଲି ବିଧାୟକ ନାୟକ କହିଥିଲେ।
କନ୍ଧମାଳ ଏମ୍ପି ସୁକାନ୍ତ କୁମାର ପାଣିଗ୍ରାହୀ ବୈଠକରେ ଯୋଗଦେଇ ରାଜ୍ୟ ସରକାର ସ୍ବାସ୍ଥ୍ୟସେବା କ୍ଷେତ୍ରରେ ବ୍ୟାପକ ପରିବର୍ତ୍ତନ ଆଣୁଛନ୍ତି ବୋଲି କହିଥିଲେ। ଭଞ୍ଜନଗର ଉପ ଜିଲାପାଳ ଉମା ଶଙ୍କର ବେହେରା ସ୍ବାଗତ ଭାଷଣ ଦେଇଥିଲେ। ମେଡ଼ିକାଲ ଅଧିକ୍ଷକ ଡ଼.ସିତାଶୁଂ ଶେଖର ଶତପଥୀ ମେଡ଼ିକାଲର ବିଭିନ୍ନ ସୁବିଧା ଅସୁବିଧା ସମ୍ପର୍କରେ କହିଥିଲେ। ଜିଲା ସ୍ବାସ୍ଥ୍ୟ ଅଧିକାରୀ ଡ଼.ଭବାନି ଶଙ୍କର ମିଶ୍ର ଜିଲାର ସ୍ବାସ୍ଥ୍ୟସେବା ସମେତ ଅନ୍ୟାନ୍ୟ ବିଷୟରେ କହିଥିଲେ। ଜିଲା ମେଡ଼ିକାଲ ପରିଚାଳକ ବୁଲୁନାଥ ସାହୁ ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ ଭଞ୍ଜନଗର ମେଡ଼ିକାଲ ପରିଚାଳକ ବିଚିତ୍ର ପାଣିଗ୍ରାହୀ ଧନ୍ୟବାଦ ପ୍ରଦାନ କରିଥିଲେ। ଏହି ଅବସରରେ ଭାଜପା ଘୁମୁସର ସାଙ୍ଗଠନିକ ଜିଲା ସଭାପତି ନୀଳ ମାଧବ ପାତ୍ର, ଧୋବା ଗୌଡ଼, ଏମପି ପ୍ରତିନିଧି ସୂର୍ଯ୍ୟ ନାରାୟଣ ପଣ୍ଡା,ରବିନ୍ଦ୍ର ଗୌଡ଼, ବିଷ୍ଣୁ ପ୍ରସାଦ ପ୍ରଧାନ, ମାନସ ଜେନା, ଶିବ ଶଙ୍କର ମହାପାତ୍ର,ରମଶେ ବେହେରା ପ୍ରମୁଖ ଉପସ୍ଥିତ ଥିଲେ।