ବରଗଡ଼, ୧୦।୩ (ପ୍ରେମାନନ୍ଦ ଖମାରୀ): ବରଗଡ଼ ସହରରେ ବଢିଚାଲିଥିବା ଅପରାଧିକ କାର୍ଯ୍ୟକଳାପ ଉପରେ ପାଲିସର ଶକ୍ତ ପ୍ରହାର। ସହରରେ ଲୁଟପାଟ, ଛୁରାମାଡ଼ ଏବଂ ହତ୍ୟାକାଣ୍ଡ ଭଳି ଘଟଣା ସାଧାରଣ ଲୋକଙ୍କ ନିଦ ହଜାଇ ଦେଇଥିବା ବେଳେ, ଏହାର ମୁଖ୍ୟ କାରଣ ସାଜିଥିବା ‘ନିଶା କାରବାର’ ବିରୁଦ୍ଧରେ ଅଭିଯାନ ଆରମ୍ଭ କରିଛି ପ୍ରଶାସନ।
ସହରବାସୀଙ୍କ ବାରମ୍ବାର ଅଭିଯୋଗ ଏବଂ ଅପରାଧ ନିୟନ୍ତ୍ରଣ ପାଇଁ ମଙ୍ଗଳବାର ପୋଲିସ ପ୍ରଶାସନ ସମ୍ପୂର୍ଣ୍ଣ ଆକ୍ସନ ମୋଡକୁ ଆସିଛି। ପୋଲିସ ପକ୍ଷରୁ ସହରର ବିଭିନ୍ନ ସ୍ଥାନରେ ଚାଲିଥିବା ନିଶା ବେପାରୀଙ୍କ ଆଡ୍ଡାଗୁଡ଼ିକୁ ଚିହ୍ନଟ କରାଯାଇଥିଲା। ଏହି କ୍ରମରେ ଉମା ଟୋକିଜ ପାର୍ଶ୍ୱ ଦୋରା ବନ୍ଧ ରାସ୍ତାରେ ରହିଥିବା ଏକ ପ୍ରମୁଖ ନିଶା ଆଡ୍ଡା ଉପରେ ବୁଲଡୋଜର ଚଲାଇ ତାହାକୁ ସମ୍ପୂର୍ଣ୍ଣ ଭାବେ ଧୂଳିସାତ କରିଦିଆଯାଇଛି।
ସହରରେ ବଢୁଥିବା ହିଂସାକାଣ୍ଡକୁ ରୋକିବା ପାଇଁ ଏହା ଏକ ବଡ଼ ପଦକ୍ଷେପ।ବେଆଇନ ଭାବେ ଗଢିଉଠିଥିବା ନିଶା କାରବାର କେନ୍ଦ୍ରଗୁଡ଼ିକୁ ଭାଙ୍ଗି ଦିଆଯାଉଛି। ପୋଲିସର ଏହି କାର୍ଯ୍ୟାନୁଷ୍ଠାନକୁ ସହରବାସୀ ସୱାଗତ କରିଥିଲେ ହେଁ, ଏହି ଅଭିଯାନ କେତେଦିନ ଜାରି ରହିବ ତାହାକୁ ନେଇ ଚର୍ଚ୍ଚା ଜୋର ଧରିଛି। ନିଶା କାରବାର ଯୋଗୁ ଯୁବପିଢ଼ୀ ବିପଥଗାମୀ ହେବା ସହ ଅପରାଧ ବଢୁଛି। ପୋଲିସର ଏହି ବୁଲଡୋଜର ମାଡ଼ ଅପରାଧୀଙ୍କ ମନରେ ଭୟ ସୃଷ୍ଟି କରିବ ବୋଲି ଆଶା କରାଯାଉଛି। ତେବେ ସହରକୁ ଅପରାଧମୁକ୍ତ କରିବା ପାଇଁ ପୋଲିସର ଏହି ଡ୍ରାଇଭ୍ ଆଗକୁ କି ରୂପ ନେଉଛି, ତାହା ଦେଖିବାକୁ ବାକି ରହିଲା।