ନୂଆଦିଲ୍ଲୀ ,୧୯।୨: ଭାରତ-ବାଂଲାଦେଶ କ୍ରିକେଟ ସମ୍ପର୍କରେ ସୁଧାର ପାଇଁ ଢାକାର ବଡ଼ ପଦକ୍ଷେପ। ୨୦୨୬ ଟି-୨୦ ବିଶ୍ୱକପ୍କୁ ନେଇ ସୃଷ୍ଟି ହୋଇଥିବା ବିବାଦ ଓ ମହମ୍ମଦ ୟୁନୁସଙ୍କ ଅନ୍ତରୀଣ ସରକାରଙ୍କ ବିଦାୟ ପରେ ବାଂଲାଦେଶର ନୂତନ ବିଏନପି (BNP) ସରକାର ଭାରତ ସହ ସମ୍ପର୍କ ସୁଧାରିବାକୁ ପ୍ରୟାସ ଆରମ୍ଭ କରିଛନ୍ତି।
ବାଂଲାଦେଶର ନୂତନ ଯୁବ ଓ କ୍ରୀଡ଼ା ମନ୍ତ୍ରୀ ଅମିନୁଲ ହକ ଶପଥ ଗ୍ରହଣ କରିବାର ମାତ୍ର କିଛି ଘଣ୍ଟା ମଧ୍ୟରେ ଭାରତର ଡେପୁଟି ହାଇକମିଶନରଙ୍କ ସହ ଆଲୋଚନା କରିଛନ୍ତି। ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା ମାଧ୍ୟମରେ କ୍ରିକେଟ ବିବାଦର ସମାଧାନ ପାଇଁ ସେ ପ୍ରତିଶ୍ରୁତି ଦେଇଛନ୍ତି।
୨୦୨୪ ଡିସେମ୍ବରରେ ଆଇପିଏଲ ଫ୍ରାଞ୍ଚାଇଜ୍ କୋଲକାତା ନାଇଟ୍ ରାଇଡର୍ସରୁ ମୁସ୍ତାଫିଜୁର ରହମାନଙ୍କୁ ରିଲିଜ କରାଯିବା ପରେ ବିବାଦ ଆରମ୍ଭ ହୋଇଥିଲା। ୟୁନୁସ ସରକାର ସୁରକ୍ଷା ଦର୍ଶାଇ ଭାରତରେ ବିଶ୍ୱକପ୍ ଖେଳିବାକୁ ମନା କରିଦେଇଥିଲେ, ଯେଉଁଥିପାଇଁ ଆଇସିସି ବାଂଲାଦେଶ ବଦଳରେ ସ୍କଟଲ୍ୟାଣ୍ଡକୁ ସୁଯୋଗ ଦେଇଥିଲା।
ସେହିପରି ପୂର୍ବତନ ଅଧିନାୟକ ଶାକିବ ଅଲ ହାସନ ଓ ମାଶ୍ରାଫେ ବିନ ମର୍ତ୍ତୁଜାଙ୍କ ବିରୋଧରେ ଥିବା ଆପରାଧିକ ମାମଲାର ଶୀଘ୍ର ସମାଧାନ କରି ସେମାନଙ୍କୁ କ୍ରିକେଟକୁ ଫେରାଇ ଆଣିବାକୁ ମନ୍ତ୍ରୀ ଲକ୍ଷ୍ୟ ରଖିଛନ୍ତି।
ବାଂଲାଦେଶ କ୍ରିକେଟ ବୋର୍ଡର (BCB) ପୂର୍ବ ନିର୍ବାଚନକୁ ‘ସନ୍ଦେହଜନକ’ କହିବା ସହ ବୋର୍ଡ ସଭାପତି ଅମିନୁଲ ଇସଲାମ ବୁଲବୁଲଙ୍କ ବିଦେଶ ଗସ୍ତ ପରେ ସଂଗଠନରେ ବଡ଼ ଧରଣର ପରିବର୍ତ୍ତନର ସଙ୍କେତ ମିଳିଛି।
ନିର୍ବାଚନ ପରେ ତାରିକ ରହମାନଙ୍କ ନେତୃତ୍ୱରେ ଗଠିତ ନୂଆ ସରକାର ଭାରତ ସହ ଭଲ ସମ୍ପର୍କ ରଖିବାକୁ ଚାହୁଁଥିବା ଅମିନୁଲ ହକ ସ୍ପଷ୍ଟ କରିଛନ୍ତି।