ଦିଗପହଣ୍ଡି,୭।୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଥାନା ଆଙ୍କୋରଡ଼ା ଗାଁ ନିକଟରେ ଥିବା କ୍ରସର ୟୁନିଟରୁ ପଶ୍ଚିମବଙ୍ଗ କୋଲକତାସ୍ଥିତ ସିଭିଲ କୋର୍ଟଙ୍କ ଆଦେଶ କ୍ରମେ କୋବେଲକୋ ମେଶିନ -୨୨୦ କୁ ଜବତ କରିବାକୁ ଭୁବନେଶ୍ୱର ଜୟଦେବ ବିହାରସ୍ଥିତ ଏକ ଫାଇନାନ୍ସ କମ୍ପାନୀ ମ୍ୟାନେଜର ଖୋର୍ଦ୍ଧା ଜିଲା ଜଙ୍କିଆ ଥାନା ଛଣଗିରି ଗ୍ରାମର ରଞ୍ଜନ କୁମାର ପ୍ରଧାନ ସୋମବାର ଅପରାହ୍ନରେ ଦିଗପହଣ୍ଡି ଥାନା ପୋଲିସ ଟିମ ସହ ଯାଇଥିଲେ। ସେଠାରେ ଉପସ୍ଥିତ ଥିବା କ୍ରସର ୟୁନିଟର କର୍ମଚାରୀ କେ.ନୂଆଗାଁ ଥାନା ସହଦେବ ଟିକରପଡ଼ା ଗ୍ରାମର ଶିବରାମ ଗୌଡ଼, ସାନଖେମୁଣ୍ଡି ବ୍ଲକ ପାଟପୁର ଗ୍ରାମର ନିତ୍ୟାନନ୍ଦ ପାଟ୍ଟଯୋଶୀ ରଞ୍ଜନଙ୍କୁ ଆପତ୍ତିଜନକ ଭାଷାରେ ଗାଳିଗୁଲଜ କରି ମାଡ଼ ମାରିଥିଲେ। ତାଙ୍କ ବେକରୁ ୧୫ ଗ୍ରାମ ଓଜନର ସୁନା ଚେନ୍ ଛଡାଇ ନେଇଥିଲେ। ଥାନା ଏଏସଆଇ ଝୁନୁ ମାଝୀ ଓ ଅନ୍ୟ ପୋଲିସ କର୍ମଚାରୀଙ୍କ ଉପସ୍ଥିତିରେ କ୍ରସର ୟୁନିଟର ଜଣେ ଟ୍ରଲର ଚାଳକ ରଞ୍ଜନଙ୍କୁ ବନ୍ଧୁକ ଦେଖାଇ ଏଠାରୁ ତୁରନ୍ତ ଚାଲିଯିବାକୁ କହି ହତ୍ୟା ଧମକ ଦେଇଥିଲେ। ପରେ ସେମାନେ ଜବତ କରାଯାଇଥିବା ଟ୍ରଲର ଏବଂ ପୋଲିସ ଗାଡି ସମ୍ମୁଖରେ ଏକ ହାଇୱା ଟ୍ରକ ଓ ଏକ ସ୍କୁଟିକୁ ରଖିଦେଇ ରାସ୍ତା ଅବରୋଧ କରିବା ସହ ଟ୍ରଲର ଗାଡ଼ି ସମେତ ପୋଲିସ ଜିପ ଚକାର ପମ୍ପ ଖୋଲି ଦେଇ ଘଟଣାସ୍ଥଳରୁ ଚମ୍ପଟ ମାରିଥିଲେ । ଖବରପାଇ ଥାନା ଆଇଆଇସି କିଶୋର କୁମାର ସାମଲ ସଦଳବଳେ ସେଠାରେ ପହଞ୍ଚି ମ୍ୟାନେଜର ଏବଂ ପୋଲିସ କର୍ମଚାରୀଙ୍କୁ ଉଦ୍ଧାର କରିଥିଲେ। ମ୍ୟାନେଜର ଏନେଇ ଏତଲା ଦେବାପରେ ଆଇଆଇସି ମାମଲା ନଂ.୧୪୭/୨୬ ଭାରତୀୟ ଆଇନ ସଂହିତାର ଧାରା -୧୯୧(୨)/୧୯୧(୩)/୨୯୬/୧୨୬(୨)/୧୧୫(୨)/୧୧୭(୨)/୧୦୯/୩୦୩(୨)/୩୫୧(୨)/୧୯୦ ଅନୁଯାୟୀ ଅଭିଯୁକ୍ତ ମାନଙ୍କ ବିରୋଧରେ ମକଦ୍ଦମା ରୁଜୁ କରିଥିଲେ। ତଦନ୍ତକାରୀ ଅଧିକାରୀ ଏସ.ଆଇ ସୋଫିଆ ମିଶ୍ର ଏହି ଘଟଣାରେ ସମ୍ପୃକ୍ତ ଶିବରାମ ଗୌଡ଼ ଏବଂ ନିତ୍ୟାନନ୍ଦ ପାଟ୍ଟଯୋଶୀଙ୍କୁ ରାତି ପ୍ରାୟ ୧୧ଟାରେ ଗିରଫ କରି ମଙ୍ଗଳବାର ଅପରାହ୍ନରେ କୋର୍ଟ ଚାଲାଣ କରିଥିଲେ। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତ ଦ୍ବୟଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି।