ନୂଆଦିଲ୍ଲୀ,୧୮।୪: ଆମ ଆଦମୀ ପାର୍ଟି(ଆପ୍)ର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିିୱାଲଙ୍କ ଘରେ ବାଜିଛି ସାହାନାଇ। ଝିଅ ହର୍ଷିତା କେଜ୍ରିିୱାଲ ଶୁକ୍ରବାର ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ସମ୍ଭବ ଜୈନଙ୍କ ହାତ ଧରିଛନ୍ତି ସେ। ଏହି ହାଇପ୍ରୋଫାଇଲ୍ ବିବାହ ଦିଲ୍ଲୀର କପୁରଥଲା ହାଉସରେ ଅନୁଷ୍ଠିତ ହୋଇଛି। ପୂର୍ବରୁ ୧୭ ଏପ୍ରିଲରେ ଦିଲ୍ଲୀର ଶାଙ୍ଗ୍ରି-ଲା ହୋଟେଲରେ ମେହେନ୍ଦୀ ଏବଂ ଅନ୍ୟାନ୍ୟ ରୀତିନୀତି ଅନୁଷ୍ଠିତ ହୋଇଥିଲା। ଏଥିରେ କେବଳ ସୀମିତ ଲୋକ ଅଂଶଗ୍ରହଣ କରିଥିଲେ, ଯେଉଁଥିରେ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ଏବଂ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଡ଼ିଆ ଉପସ୍ଥିତ ଥିଲେ।
ହର୍ଷିତା କେଜରିୱାଲ ଏବଂ ସମ୍ଭବ ଜୈନଙ୍କ ବିବାହ ପରେ, ଏବେ ରିସେପ୍ସନ କାର୍ଯ୍ୟକ୍ରମ ୨୦ ଏପ୍ରିଲରେ ଅନୁଷ୍ଠିତ ହେବ। ଦୁହେଁ ଆଇଆଇଟିରେ ଏକାଠି ପଢିଛନ୍ତି। ସମ୍ଭବ ଜୈନ ଏବଂ ହର୍ଷିତା କିଛି ମାସ ପୂର୍ବରୁ ଷ୍ଟାର୍ଟଅପ ଆରମ୍ଭ କରିଥିଲେ।
ବିବାହ ପୂର୍ବରୁ ହୋଟେଲରେ ମେହେନ୍ଦୀ ଏବଂ ଅନ୍ୟାନ୍ୟ ରୀତିନୀତି ସମୟରେ, ଅରବିନ୍ଦ କେଜରିୱାଲ ତାଙ୍କ ପତ୍ନୀ ସୁନୀତାଙ୍କ ସହ ନୃତ୍ୟ ମଧ୍ୟ କରିଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ତେବେ ତାଙ୍କ ସହ ତାଳ ଦେଇ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ମଧ୍ୟ ତାଙ୍କ ପତ୍ନୀଙ୍କ ସହ ନୃତ୍ୟ କରିଥିବା ଦେଖାଯାଉଛି।
କହି ରଖୁଛୁ, କେଜରିୱାଲଙ୍କ ଦୁଇଟି ସନ୍ତାନ ଅଛନ୍ତି। ପୁଅଙ୍କ ନାମ ପୁଲକିତ ଏବଂ ଝିଅଙ୍କ ନାମ ହର୍ଷିତା। ହର୍ଷିତା ନୋଏଡାର ଦିଲ୍ଲୀ ପବ୍ଲିକ ସ୍କୁଲରୁ ପାଠପଢ଼ିଛନ୍ତି। ୨୦୧୪ ମସିହାରେ, ସେ IIT-JEE ଆଡଭାନ୍ସଡ ପରୀକ୍ଷାରେ ୩,୩୨୨ତମ ସ୍ଥାନ ହାସଲ କରିଥିଲେ ଏବଂ IIT ଦିଲ୍ଲୀରୁ କେମିକାଲ ଇଞ୍ଜିନିୟରିଂ ପଢିଥିଲେ। ଏଥିରେ ସେ ବିଭାଗରେ ତୃତୀୟ ସ୍ଥାନ ଅଧିକାର କରିଥିଲେ। ପାଠପଢ଼ା ସମୟରେ ତାଙ୍କୁ ଅନେକ କମ୍ପାନୀରୁ ଚାକିରିର ପ୍ରସ୍ତାବ ମିଳିଥିଲା।
ପାଠପଢ଼ା ସମାପ୍ତ କରିବା ପରେ, ହର୍ଷିତା ଗୁରୁଗ୍ରାମର ଏକ କମ୍ପାନୀରେ ସହଯୋଗୀ ପରାମର୍ଶଦାତା ଭାବରେ କାମ କରିଥିଲେ। ସେ Basil Health (ବାସିଲ ହେଲ୍ଥ) କମ୍ପାନୀର ସହ-ପ୍ରତିଷ୍ଠାତା। କାମ ସହିତ ହର୍ଷିତାଙ୍କୁ ରାଜନୀତିରେ ତାଙ୍କ ବାପାଙ୍କ ସହ କାନ୍ଧକୁ କାନ୍ଧ ମିଶାଇ ଚାଲିବାର ମଧ୍ୟ ଦେଖାଯାଇଛି। ସେ ଦଳର ନିର୍ବାଚନ ପ୍ରଚାରରେ ସକ୍ରିୟ ଭାବରେ ଅଂଶଗ୍ରହଣ କରିଥିଲେ। ସେ ୨୦୨୦ ବିଧାନସଭା ନିର୍ବାଚନରେ ତାଙ୍କ ବାପା ଏବଂ ଦଳ ପାଇଁ ପ୍ରଚାର କରିଥିଲେ।