ତେହରାନ,୨୨ା୨: ଇରାନ ଏବଂ ଆମେରିକା ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି। ଟ୍ରମ୍ପଙ୍କ ଧମକ ପରେ ଇରାନ ଏହାର ଜାତିସଂଘ ମିଶନ ମାଧ୍ୟମରେ ଏକ ଚେତାବନୀ ଜାରି କରିଛି, ଯେଉଁଥିରେ କୁହାଯାଇଛି, ଯଦି ଆକ୍ରମଣ ହୁଏ, ତେବେ ତେହରାନ ମଧ୍ୟପ୍ରାଚ୍ୟରେ ଥିବା ଆମେରିକୀୟ ବିମାନ ଘାଟିଗୁଡ଼ିକୁ ଟାର୍ଗେଟ କରିବ।
ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଜଣେ ପୂର୍ବତନ CIA ଅଧିକାରୀ ଇରାନ ଉପରେ ସମ୍ଭାବ୍ୟ ଆମେରିକା ଆକ୍ରମଣ ସମ୍ପର୍କରେ ଏକ ବଡ଼ କଥା କହିଛନ୍ତି। ସେ ଇରାନ ଉପରେ ଆକ୍ରମଣ ପାଇଁ ଆମେରିକୀୟ ସେନାର ସମ୍ପୂର୍ଣ୍ଣ ଯୋଜନାକୁ ରୂପରେଖ ଦେଇଛନ୍ତି।
ପୂର୍ବତନ CIA ଅଧିକାରୀ ଜନ କିରିଆକୋଙ୍କ ଅନୁଯାୟୀ, ଆମେରିକା ଆସନ୍ତା ସପ୍ତାହ ପ୍ରାରମ୍ଭରେ ଇରାନ ଉପରେ ସାମରିକ ଆକ୍ରମଣ ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ନେବ, ଯଦିଓ ଓ୍ବାଶିଂଟନରୁ ସାର୍ବଜନୀନ ବାର୍ତ୍ତା ସୂଚାଇଥାଏ ଯେ କୂଟନୀତିର ପଥ ଖୋଲା ରହିଛି। ଅଧିକାରୀ କହିଛନ୍ତି, ହ୍ବାଇଟ୍ ହାଉସକୁ ଗସ୍ତ କରିଥିବା ଜଣେ ପୂର୍ବତନ ଗୁପ୍ତଚର ସହକର୍ମୀ ତାଙ୍କୁ ସୂଚନା ଦେଇଛନ୍ତି ଯେ, ଇରାନ ଉପରେ ଆକ୍ରମଣ ଖୁବ୍ଶୀଘ୍ର ହୋଇପାରେ।
ସୋମବାର କିମ୍ବା ମଙ୍ଗଳବାର ଇରାନ ଉପରେ ଆକ୍ରମଣ କରିବାକୁ ନିଷ୍ପତ୍ତି ନିଆଯାଇଛି। ସେ ଆହୁରି ମଧ୍ୟ କହିଛନ୍ତି, ‘ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସମ୍ପ୍ରତି ତେହରାନକୁ ଏକ ବ୍ୟାପକ ପ୍ରସ୍ତାବ ଗ୍ରହଣ କରିବା ପାଇଁ ୧୦ ଦିନ ସମୟ ଦେଇଥିଲେ, କିନ୍ତୁ ଏହି ସମୟସୀମା ସାମରିକ କାର୍ଯ୍ୟାନୁଷ୍ଠାନକୁ ଏଡ଼ାଇବାର ଗ୍ୟାରେଣ୍ଟି ଦିଏ ନାହିଁ।