ଗଞ୍ଜାମ,୫ା୩(ବିଦ୍ୟାଧର ସାହୁ): ଗଞ୍ଜାମ ସହରରେ ୫ ଦିନ ଧରି ଅନୁଷ୍ଠିତ ହୋଇଥିବା ପ୍ରସିଦ୍ଧ ଐତିହାସିକ ଦୋଳଯାତ୍ରା ସୁରୁଖୁରୁରେ ଶେଷ ହେଇଛି। ଗଞ୍ଜାମ ଥାନା ପୋଲିସ ଓ ଏନ୍ଏସି ପ୍ରଶାସନର ସହାୟତାରେ ଏହି ଦୋଳଯାତ୍ରା ଏକ ପ୍ରକାର ଶାନ୍ତିଶୃଙ୍ଖଳାର ସହ ସରିଛି। କିନ୍ତୁ ଯାତ୍ରାକୁ ଆସିଥିବା ବେଲୁ୍ନ୍ ଚଣା ବେପାରୀଙ୍କଠାରୁ ୧୦/୨୦ ଟଙ୍କା ବଦଳରେ ୫୦ /୧୦୦ ଟଙ୍କା ଜୋର ଜବରଦସ୍ତ ଆଦାୟ ହୋଇଥିବା ଅଭିଯୋଗ ହୋଇଛି।
ଏ ସମ୍ପର୍କରେ ଇଓ ଅପର୍ଣ୍ଣା ଡାଙ୍ଗୁଆ କହିଛନ୍ତି, ପାନୁ କଲେକ୍ସନ ଠିକା ନେଇଥିବା ବ୍ୟକ୍ତିଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ତଦନ୍ତ ପରେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ବିଭିନ୍ନ କାରଣ ଯୋଗୁ ସ୍ଥାନ ଚି଼ହ୍ନଟ ପ୍ରକ୍ରିୟା ବହୁ ବିଳମ୍ବ ଘଟିଥିଲା। ଅନ୍ୟ ପଟେ ଚନ୍ଦ୍ର ଗ୍ରହଣ ଯୋଗୁ ଠାକୁର ଫେରିବା ସମୟ ପରିବର୍ତ୍ତନ କରାଯାଇ ନିର୍ଦ୍ଧାରିତ ସମୟଠାରୁ ୪ ଘଣ୍ଟା ବିଳମ୍ବରେ ଠାକୁର ନିଜ ନିଜ ସାହିକୁ ଫେରିଥିଲେ। ବଜାରକୁ ବିଭିନ୍ନ ସାହିର ଷୋହଳ ଠାକୁର ବିଜେ କରିବା ବଜାର ଯାତ୍ରା ଅନୁଷ୍ଠିତ ହୋଇଥିଲା। ଛତ୍ରପୁର ଏସ୍ଡିପିଓ ଚନ୍ଦନ ଘଡ଼ାଇ, ଆଇଆଇସି ସୁମିତ୍ରା ପାତ୍ର, ଅତିରିକ୍ତ ଆଇଆଇସି ଶୁଭଲକ୍ଷ୍ମୀ କଅଁର, ଏସ୍ଆଇ ଅନିରୁଦ୍ଧ ସ୍ବାଇଁ, ଏଏସ୍ଆଇ ସୁଦୀପ୍ତ ସାହୁ, ମହିଳା ଏଏସ୍ଆଇ ସୁପ୍ରଭା ସାହୁଙ୍କ ସମେତ ଅନ୍ୟାନ୍ୟ ପୋଲିସ କର୍ମଚାରୀ ଆଇନଶୃଙ୍ଖଳା ନିମନ୍ତେ ବ୍ୟାପକ ବନ୍ଦୋବସ୍ତ କରିଥିଲେ। ବିଭିନ୍ନ ଅନୁଷ୍ଠାନ ପକ୍ଷରୁ ଶ୍ରଦ୍ଧାଳୁଙ୍କୁ ପାନୀୟ ଜଳ ବଣ୍ଟନ କରାଯାଇଥିଲା।